2 Tɛsalonikakalu 1 - Ala Ya Salatikan Kula Kitabu

¹ Ǹe Pɔli ni Silasi ni Timote le yi lɛtɛlɛ min lataala limaniyajama ma Tɛsalonika so kɔnɔ, min yi mɔ Fa Ala ni mɔ Tii Masa Tɔɔmasenin Isa ya kafonɲɔɔya lɔ.

² Mɔ Fa Ala ni mɔ Tii Masa Tɔɔmasenin Isa ya nɛɛma yi kɛ ài yɛ, k'ài josolajii.

Kolatɔn min kɛtɔ kɛla Isa nalon

³ Mɔ badenmalu, a bɛnyine m'i kɛ Ala balika bɔla waate bɛ àiya ko lɔ, kamasɔlɔn àiya limaniya yi wala kan bɛlɛbɛlɛ kɛ, a dɔ le yi lala àiya ɲɔɔkanu kɔkan kudein.

⁴ Wo le n'a kɛla, ǹu gbu ɲalɔkɛnɛyanin àiya ko lasenko lɔ Ala ya limaniyajamalu ma, kamasɔlɔn ài yi jangata ni gbalo suu bɛ le minala ài ma, k'ài bolo kɛ àiya limaniya la kpekpe.

⁵ Ado Ala kɛtɔ jangata wo kɛla sabu le ka aa kiti telennin lagbɛ, fɔsa ài yi kɛ mɔɔlu le minu ni aa masaya donko lɔkaannin, ài yi tɔlɔya masɔlɔnna ka bɛn min ma.

⁶ A yi ko telenin ne le Ala ɲakɔlɔ k'ài ta sala ài tɔlɔyabalu lɔ tɔlɔya le,

⁷ ani ka àilu mɔɔ tɔlɔninnu josolajii, ani ǹu fana, mɔ Tii Isa la vɛ nkɛnɛmayala ka bɔ sangbolo lɔ lon min na, aa mɛlɛka makawanilu v'a fɛ.

⁸ A do kɛtɔ nala taamɛnɛn ne ka Alalɔnbalilu jangata, ani mɔɔ minu yi kolobaliya kɛla mɔ Tii Isa ya Samakan Kein na.

⁹ Aiya kolatɔn kɛtɔ halaki banbali le le, k'ai mataa mɔ Tii la ani aa seetiiya makawanin.

¹⁰ Wo bɛ kɛtɔ mɔ Tii nalon ne, a vɛ nala fɔsa mumininnu y'a magbiliya ani limaniyamɔɔlu y'a buɲa kawakoya boloma. Àilu fana fɛ kɛtɔ wo la, kamasɔlɔn ài vɛ la maa seleyakan na.

¹¹ Wo le y'a ma, m'i Ala dalila ài yɛ waate bɛ, fɔsa a n'ài kilila ko min kanma, ài taamaɲa yi bɛn wo ma. Ala a kɛ, koɲuma min bɛ kɛ lɔɔ y'ài la, ài yi se wo bɛ kɛla ka bɛn aa seetiiya ma, ka àiya limaniya baale dafa.

¹² Wo vɛ kɛla, mɔ Tii Isa tɔɔ kɛtɔ magbiliyali sɔlɔnna ài fɛ. Àilu fana kɛtɔ magbiliyali sɔlɔnna ale le fɛ ka bɛn mɔ Tii Ala ya nɛɛma ma, ani mɔ Tii Masa Tɔɔmasenin Isa.