2 Piyɛli 3 - Ala Ya Salatikan Kula Kitabu

Lahedi ka bɛn mɔ Tii nako ma

¹ Ǹ diyananmɔɔlu, ǹa lɛtɛlɛ filana le min ne, ǹ'i min lataala ài ma. Lɛtɛlɛ fila wolu lɔ, m̀'ɛ ǹ lɔja k'ài hangili bila ko minu lɔ, alako ài miliya lagbɛnin yi to,

² ani ài kana ɲina kelayakumalu lɔ minu fɔnin lɔhɔlɔma kelalu bolo kɔlɔkɔlɔ le, ani mɔ Tii ni mɔ Lakisiba ya jamali min fɔnin ài yɛ keladennu bolo.

³ Ài y'a lɔn kunfɔlɔ le ko dunuɲa laban waate, lafeyalikɛbalu wulitɔ aiya lafeyalikannu le, ai vɛ bilala ai jɛlɛkanu niikanuko yonnu kɔ.

⁴ Ai do kɛtɔ a fɔla, ai vɛɛ: «Jalasa Isa na lahedi tala ko a kɔseitɔ, kɛlɛ? A yi min ne vɛ? Ka ta mɔ bemanu ya saya ma, dunuɲa ka dan boloɲa min ma, a yi wo boloɲa kelen ne ma hali bi.»

⁵ Mɔɔ wolu y'a lawulilama le ka ɲina tuɲa min kɔ, k'a fɔ ko kɔlɔkɔlɔ le, Ala ka sangbolo ladan, ka duukolo ni ji wotɛbɔ i ɲɔɔ na, ani ka duu jalan labɔ ji tɛma a kumakan ne sabu la.

⁶ Ado dunuɲa kɔlɔkɔlɔ wo ka halaki ji kelen wo le bolo, ji ba ka na waate min nɔ.

⁷ Kɛɛ m'i sangbolo ni duukolo minu yena yi ne, wolu ladalonin Ala kumakan kelen wo le sabu la, fɔsa ai yi ɲɛnin taa bolo. Ai do ladalotɔle haan fɔɔ kititɛɛlon yi se, Alaɲasiyanɲɛbalilu kɛtɔ halakila lon min na.

⁸ Ǹ diyananmɔɔlu, ài kà jɔ tuɲa min ma, k'a fɔ ko tele kelen kɛyine iwo sanji waa kelen (1 000) mɔ Tii ɲana, ani sanji waa kelen (1 000) kɛyine iwo tele kelen.

⁹ Mɔ Tii kunsumanin tɛ aa lahedi mafako lɔ iwo a dɔlu y'ai milila teme. A do y'ài minala sawali bolo le ma, kamasɔlɔn a t'a fɛ mɔɔ foi yi halaki, mafɔ bɛ y'ai jɛlɛ lasei a ma.

¹⁰ Wo bɛ n'a kɛ, mɔ Tii nalon kɛtɔ balala mɔɔlu lɔ iwo son. Wo lon na, sangbolo ni a kɔnɔlɔfen bɛ kɛtɔ tununna mangan ba le. Sangbolo kɔnɔlɔfen bɛ kɛtɔ jelenna taa bolo, ani dunuɲa ni a kɔnɔlɔkolu bɛ la kɛtɔ nkɛnɛmayala.

¹¹ Komi fen wolu bɛ kɛtɔ halakila ten ne, ài ka kan ka kɛ mɔɔ suu mindɛ le wo lɔ? Fɔ ài yi kɛ taamana sɛnɛyali ni Alaɲasiyanɲɛ bolo le ma,

¹² ài vɛ Ala ya lon makɔnɔna, k'ài lɔja fɔsa lon wo yi na jona, sangbolo kɛtɔ halakila taa bolo lon min na, ani a kɔnɔlɔfen bɛ lajelentɔ taa wuyen bolo.

¹³ Kɛɛ ǹu koni yi sangbolo ni duukolo kula le makɔnɔna min lahedi tanin Ala bolo, telenmandeya makɛnin tɛɛminja.

¹⁴ Wo lɔ saa, ǹ diyananmɔɔlu, ài vɛ kɛla ko wolu makɔnɔna, ài y'ài lɔja, wo y'ài talan josolajii ni sɛnɛya ni jalakibaliya lɔ.

¹⁵ Ài yi mɔ Tii ya sawali jate àiya kisiko le, iwo mɔ diyanan badenma Pɔli n'a sɛvɛla ài ma teme ka bɛn hangilimaya ma min dinin a ma.

¹⁶ A do yi kumala wo boloɲa le ma aa lɛtɛlɛlu bɛ lɔ, a vɛ kɛla sɛvɛli kɛla ka bɛn ko suu minu ma. Ko dɔlu yi je aa lɛtɛlɛlu lɔ minu ɲayenko gbeleyanin, kolɔnbalilu ni miliyafilatiilu yi minu kɔlɔ majɛlɛmana, iwo ai yi kitabu fan dɔlu kɔlɔ majɛlɛmana teme, ka halakili lase ai jɛlɛ ma.

¹⁷ Àilu ǹ diyananmɔɔlu koni, komi ài la vɛ sovi, wo lɔ, ài y'ài jando ài jɛlɛ lɔ fɔsa ài la kana fili seliya sɔsɔbalu bolo k'ài bɔ ài lɔya bamanin nɔ.

¹⁸ Kɛɛ ài yi to taala ɲafɛ mɔ Tii ni mɔ Lakisiba Masa Tɔɔmasenin Isa ya nɛɛma ni aa lɔnni lɔ. Magbiliyali a yɛ tandainɔ ani waate bɛ. Amiina.