2 Piyɛli 2 - Ala Ya Salatikan Kula Kitabu

Faɲafɔ kalanmɔɔlu

¹ Iwo faɲafɔ kelalu k'i wuli teme Bani Isilankalu tɛma kɔlɔkɔlɔ le, wo boloɲa kelen ma, faɲafɔ kalanmɔɔlu wulitɔ ài tɛma doon nɔ ka na kalan dɔlu le minu yi halakili lasena mɔɔlu ma, hali k'ai ban ai Tii gbu lɔ min n'ai kunmakala. Ai do kɛtɔ halakili lasena ai jɛlɛ ma jona.

² Mɔɔ siyama kɛtɔ bilala wolu fɛ aiya malobaliyakolu lɔ, ado ka bɛn wolu ma, tuɲandeya siya ma yi finne.

³ Kalanmɔɔ wolu kɛtɔ ài tɔɲɔla natabaya boloma aiya faɲafɔ kumalu le. Kɛɛ ka ta waate jaan ma, aiya kiti vɛ ban tɛɛla, ado ai halaki waate kunnɔjaannin tɛ butu.

⁴ Ala ma kolatɔn lagban mɛlɛkalu kunna minu ka julumbu ta kɔlɔkɔlɔ le, mafɔ k'ai lafili Jahanama k'ai sili jɔlɔkɔlu le je divi fin mainmain nɔ haan fɔɔ kititɛɛlon yi se.

⁵ A do ma kolatɔn lagban dunuɲa kɔlɔkɔlɔ kunna, mafɔ a ka ji ba lana Alaɲasiyanɲɛbalilu bɛ kɔkan. Kɛɛ a ka Sedina Nuho le lakisi, min tɛɛ kawanilikɛba le ka bɛn telenmandeya siya ma, ani aa mɔɔ wolowulan.

⁶ A do ka Sɔdɔmu ni Gɔmɔli solu latɔn k'ai halaki taa le tɛtɛ, ka wo kɛ misali le k'a jiya ko min natɔ Alaɲasiyanɲɛbalilu masɔlɔnna.

⁷ Kɛɛ a ka telenmande Luti lakisi, min nii tɔlɔyanin tɛɛ bubale ka bɛn koyonkɛbalu ya malobaliyakolu ma.

⁸ Kamasɔlɔn telenmande wo tɛɛ siinin ai tɛma waate min nɔ, a nii tɛɛ tɔlɔyala tele o tele ka bɛn aiya koyonnu ma, a tɛɛ minu yena, ani a tɛɛ minu mɛnna.

⁹ Wo le y'a ma, mɔ Tii ka a ɲasiyanɲɛbalu lakisiɲa lɔn k'ai bɔ aiya tɔlɔyalu lɔ, a do ka telenbalilu ladaloɲa lɔn kolatɔn kanma haan fɔɔ kititɛɛlon yi se.

¹⁰ Wo kolatɔn kɛtɔ lala mɔɔ minu kɔkan bɛlɛbɛlɛ kɛ, wolu le yi bɔlila ai niikanuko kɔsɔninnu kɔ, ani ka kuntiiya lagbeyaɲɛ. Faɲafɔ kalanmɔɔ wolu wakaliyine k'ai kafa. Ai do tɛ siyanna nii nɔɔlɔnilu lafeyako lɔ minu yi haijɛnɛ.

¹¹ Kɛɛ hali mɛlɛka minu fanga ni aiya seetiiya walanin ka timin faɲafɔ kalanmɔɔ wolu ta la, wolu tɛ diɲala ka nii nɔɔlɔnin wolu jobaliya lafeyalikan ne mɔ Tii ɲakɔlɔ.

¹² Faɲafɔ kalanmɔɔ wolu koni, ai yi kuma yonnu fɔla ka bɛn kolu ma ai ma minu ɲaye. Ai do kɛyine iwo tuukɔlɔsoo hangilindannu, minu ladannin ai minako ni ai faako kanma. Ai do halakitɔle iwo tuukɔlɔsoo wolu.

¹³ Ai na koyon minu kɛla, wo ɲɔɔzii le kɛtɔ kɛla ai sala le. A do diyayine ai yɛ ka manamanakolu kɛ tele gba la. Ni ai vɛ kɛla ài tɛma àiya feetikɛya lɔ, ai àiya kolu lakɔsɔla k'ài lanɔɔ, ai v'ai jɛlɛ diyabɔla aiya janvandeyakolu le.

¹⁴ Waate bɛ, ai ɲa yi bɔla mosolu la jalonya boloma. Ai tɛ wasala julumbu tako lɔ. Ai yi sɔɔ lasiila mɔɔlu ɲa minu sawatinin tɛ limaniya lɔ. Ai josokun lafanin natabaya le le. Daantɔ le ai le.

¹⁵ Ai vɛ siya ɲuma bila k'ai jɛlɛ lafili. Ai do vɛ Beyɔli denkɛ Balaamu ya siya ta, telenbaliya sala sɔlɔnko diyanin tɛɛ min yɛ.

¹⁶ Kɛɛ a do ma ka kuma aa telenbaliyako le lɔ. Sofalini dandan ka kuma Balaamu yɛ iwo mɔɔnivin, ka kela wo ya fatɔya dansii.

¹⁷ Faɲafɔ kalanmɔɔ wolu kɛyine iwo falakɔɔ vɛ jala, ani sanfin vɛ fola fɔɲɛ bolo. Divi fin mainmain ne ladalonin ai kanma.

¹⁸ Ai y'ai wasola kuma kundannu le, fɔsa mɔɔ minu yi kisi boloma ka bɔ mɔɔ filininnu tɛma, ai yi wolu manɛɛ ka bɛn falikolo niikanukolu ma.

¹⁹ Ai yi lafɛlɛ lahedi tala mɔɔ wolu yɛ, k'a talan ailu gbu taanin kɛla jɔn ne le ka bɛn aiya kolɔtiɲalu ma. Kamasɔlɔn ni ko ko si ka se mɔɔ la, wo tii vɛ kɛ ko wo ya jɔn ne.

²⁰ Ado ni mɔɔ minu k'ai sen bɔ dunuɲa kokɔsɔninnu lɔ ka bɛn mɔ Tii ni mɔ Lakisiba Masa Tɔɔmasenin Isa lɔnko ma, ni ko wolu k'ai mina ka see sɔlɔn ai ma kɔtunun, wo vɛ kɛla, mɔɔ wolu laban kɛwonyatɔle ka timin a kunfɔlɔ ta la.

²¹ A tɛɛ bɛnne ai ma ni ai tɛɛ ma telenmandeya siya lɔn feu, jani ai tɛɛ a lɔn ka ban k'ai kɔdon jamali sɛnɛyanin na min dinin ai ma.

²² Aiya ko yi lala sana bɛlɛbɛlɛ minu le ma iwo: «Wuluni yi fennabɔ kɛla ka ban k'a kɔsei a ma,» ani fana: «Kɔsɛ v'i kola feeya, a a kɔseila ka kulukulu bɔɔ lɔ.»