2 Kolɛntikalu 8 - Ala Ya Salatikan Kula Kitabu

Limaniyamɔɔlu ya bololadɛnko

¹ M̀ badenmalu, Ala na min kɛla limaniyajamalu tɛma ka bɛn aa nɛɛma ma Masaduwani koovi lɔ, m'a fɛ ài yi kɛ wo ko kalama.

² Tɔlɔya siyama tɛɛ ai kan ai lɔsumanko lɔ, kɛɛ ka bɛn aiya sawa dafanin ma, ailu ni aiya fandanya bɛ, ai k'ai bolo fɔlin kosɛvɛ dɔlu madɛmɛnko lɔ.

³ Ǹ'i sene seleya dila ko ai n'ai senko bɛ le kɛla, ka ban k'a dɔ la wo kɔkan lafɛlɛli boloma.

⁴ Ai do na mɔ madiyala kosɛvɛ ko m'i diɲa ài fɛ yi kɛ mumininnu madɛmɛnko la.

⁵ Ado mɔ jii tɛɛ min ma, ai n'a kɛla ka timin wo la. Ai do n'ai jɛlɛ dila mɔ Tii ma kunfɔlɔ le, k'ai jɛlɛ di ǹu fana ma ka bɛn Ala sawo ma.

⁶ Komi Tite tɛɛ vɛ baale min damina ài tɛma, wo le n'a kɛla, mɔ n'a fɔla a yɛ k'a magbeleya ko a yi koɲuma min laban ài tɛma.

⁷ Ài dafanin ko minu bɛ le lɔ: limaniya, kumafɔ, lɔnni, sɛmɛdon bɛ, ani àiya kanundeya ka bɛn mɔ ma kɔtunun. Wo boloɲa kelen ma, ài y'ài lɔja k'ài dafa koɲuma min kɛko lɔ.

⁸ Ǹ tɛ ài jamalila, kɛɛ mɔɔ dɔlu sɔnjanin dɛmɛliko le teme, ǹ'ài ta lala wolu le ma k'a lɔn ni kanundeya bɛlɛbɛlɛ le ài bolo.

⁹ Kamasɔlɔn ài ka mɔ Tii Masa Tɔɔmasenin Isa ya nɛɛma lɔn. Hali a tɛɛ banaya lɔ, kɛɛ a k'a jɛlɛ kɛ bolokolon ne ka bɛn àiya ko le ma, fɔsa ài yi kɛ bana le aa bolokolonya fɛ.

¹⁰ Ǹ'i m̀ miliya le jiyala ko min nɔ, min kɛtɔ ài nafala. Salon, ài ka kɛ mɔɔ kunfɔlɔ le ka bɔ ài jɛlɛ lɔ, k'ài bolo ladɛn ko min kanma.

¹¹ Wo lɔ saa, ài y'ài sɛmɛdon ka baale min laban kobɛn, iwo ài n'a daminala teme, ka bɛn ài senko ma.

¹² Ni mɔɔ min ka bɔ a jɛlɛ lɔ ka fen di, bolo yi siile wo kɔlɔ ka bɛn a senko ma. Kɛɛ ni fen t'a bolo, wo tɛ jatela.

¹³ A tɛ k'a fɔ ko ài yi dɔlu ya doni ta haan fɔɔ ài yi lɔ yi gbɛnɛ, mafɔ ǹ'a fɛ le bɛ lɔ yi kaan.

¹⁴ Komi fen walanin ài bolo waate min nɔ, wo lɔ, ài yi sene k'ai makolu laɲia. Ado ni ài lɔ ka gbɛnɛ lon min na k'a talan wolu vɛ kɛ fentii le, wolu fana yi sene k'ài makolu laɲia. Wo vɛ kɛla, bɛ lɔ yi kaanne.

¹⁵ A do sɛvɛnin tan ne kitabu kɔnɔ, ko: «Mɔɔ minu n'a siyama tala, wolu ta tɔ ma to. Kɛɛ mɔɔ minu k'a dɔni ta, wolu ta ma dɛsɛ.»

Tite ni a taamaɲɔɔlu ya baale

¹⁶ Tanuli yi Ala yɛ, kamasɔlɔn ale le na àiya ko diyala Tite yɛ iwo àiya ko diyanin mɔ yɛ teme.

¹⁷ Kamasɔlɔn mɔ na min ɲininna Tite fɛ, a n'a bolo siila wo kɔlɔ, a v'a sɛmɛdon fana, ka bɔ a jɛlɛ lɔ ka taa ài fɛlɔ.

¹⁸ Ado m'i mɔ badenma dɔ lataala Tite fɛ, min malɔnnin limaniyajamalu bɛ tɛma ka bɛn aa Samakan Kein lasenko ma.

¹⁹ K'a dɔ la wo kɔkan, limaniyajamalu gbu le n'a jiyala k'a kɛ mɔ taamaɲɔɔ le, mɔ vɛ taala niilifen ɲuma wo le, m'i min kɛla mɔ Tii gbu buɲako le lɔ, ani k'a jiya ko m'ai madɛmɛnko le lɔ.

²⁰ M'a kɛla tan ne fɔsa mɔɔ mɔɔ kana a bolo telen mɔ la ka bɛn niilifen ba min minaɲa ma.

²¹ Kamasɔlɔn m'a fɛ le mɔ taamaɲa yi bɛn mɔ Tii ɲakɔlɔ, ani mɔɔlu.

²² Wo ma, m'i mɔɔ fila wolu ni mɔ badenmakɛ dɔgbɛlɛ le lataala ài ma kelen ne. Badenma wo v'a jiya mɔ la boloɲa siyama ma ani siɲa siyama le ko a sɔnjanin mɔɔlu madɛmɛnko le. A do sɔnjayine butu ka timin a kunfɔlɔ ta la, kamasɔlɔn a layine ài la kosɛvɛ.

²³ Tite koni, ǹ tɔva le a le, ani m̀ baaledenɲɔɔ ài madɛmɛnko lɔ. Mɔ badenma tɔ fila koni, limaniyajamalu ya mɔɔ kelayanin ne ai le Masa Tɔɔmasenin magbiliyako lɔ.

²⁴ Wo le y'a ma, ài àiya kanundeya lagbɛ ai yɛ, fɔsa limaniyajamalu yi wo ye k'a lɔn ko jo yi mɔ bolo ka bɛn maa ɲalɔkɛnɛya ma àiya ko lɔ.