2 Kolɛntikalu 7 - Ala Ya Salatikan Kula Kitabu

¹ Ǹ diyananmɔɔlu, komi lahedi minu tanin mɔ yɛ, wo lɔ, ài m'i mɔ jɛlɛ lasɛnɛya ka bɔ ko bɛ ma minu yi mɔ falikolo ni mɔ josokun lakɔsɔla. Ài m'i lɔja ka maa sɛnɛya dafa Alaɲasiyanɲɛ boloma.

Pɔli ya sawa

² Ài y'ài joso laka mɔ yɛ. Mɔ ma hakɛ ta mɔɔ la, mɔ ma mɔɔ kunnɔtɛɛ, ado mɔ ma mɔɔ foi tɔɲɔ.

³ Ǹ tɛ wo fɔla ài jobaliyako lɔ dɛ! Kamasɔlɔn ǹ n'a fɔla ài yɛ kɔlɔman ne, ǹ ko, àiya ko gbaanyine mɔ josokun na. Niimaya tɛnala mɔ falanna a ma, kumatɛ saya ma.

⁴ Ǹ layine ài la kosɛvɛ. Ǹe do ɲalɔkɛnɛyayine àiya ko lɔ bubale ka ǹ sɛmɛdon. Hali m'i tɔlɔya min bɛ lɔ yi ne, ǹ joso lafayine sawa la.

⁵ Kamasɔlɔn ka ta mɔ senin vɛ Masaduwani, mɔ ma laha ba bene, mafɔ mɔ na gbalo le sɔlɔnna fan bɛ lɔ. Mɔɔlu tɛɛ mɔ sɔsɔla, ado siyan tɛɛ mɔ josokun nɔ.

⁶ Kɛɛ Ala min yi mɔɔ jeitɛɛninnu sɛmɛdonna, wo le na mɔ sɛmɛdonna ka bɛn Tite nako ma.

⁷ A nako ma mɔ sɛmɛdon dein, kɛɛ ài na a sɛmɛdonna teme, a na wo dandɛɛli kɛla mɔ yɛ. A n'a fɔla ko ài sɔnjanin ǹa ko le, ani ài josoma vɛ kasi k'ài tɛsili ǹa ko lɔ. Wo bɛ vɛ a dɔ la ǹa sawa kɔkan kɔtunun.

⁸ Ǹ na lɛtɛlɛ min lataala ài ma, hali ni wo bannin ka kɛ ài josomakasila, ǹ nimisanin tɛ wo lɔ. Ǹe koni ka nimisa kunfɔlɔ le, kamasɔlɔn ǹ k'a ye ko ǹa lɛtɛlɛ wo n'ài josomakasila, hali a ka kɛ waateni kɔlɔ.

⁹ Kɛɛ ǹ sawayine butu. A tɛ k'a fɔ ko ǹ sawanin ka bɛn àiya josomakasi le ma, mafɔ àiya josomakasi le n'ài lɔla ài dajoo kolonnu bilala. Ala le na josomakasi wo latɛɛla ài ma. Wo lɔ, mɔ ma koyon kɛ ài la wo le.

¹⁰ Kamasɔlɔn josomakasi min latɛɛnin Ala bolo, wo le yi kɛla sabu le mɔɔ y'a dajoo kolonnu bilala k'a lakisiko masɔlɔn wo fɛ, ado nimisa foi tɛ wo lɔ. Kɛɛ dunuɲa ta josomakasi koni, wo laban yi saya le le.

¹¹ Ko minu na kɛla ài la ka bɛn àiya josomakasi ma min latɛɛnin Ala bolo, ài y'a ye: àiya kumanɔbɔ, àiya josolakuna, àiya siyan, ài sɔnjako mɔ le, ani àiya koyon latɔn. Ài v'a jiya boloɲa bɛ ma ko ài sen tɛ koyon min nɔ.

¹² Wo lɔ saa, hali m̀ bannin ka kɛ lɛtɛlɛ min sɛvɛla ài ma, m̀ m'a kɛ ka bɛn koyonkɛba ma, niwotɛ koyon siinin mɔɔ min na. Kɛɛ ǹ n'a kɛla fɔsa ài miliya la yi gbɛ Ala ɲakɔlɔ ka bɛn àiya sɔnja ma maa ko lɔ.

¹³ Wo le y'a ma, mɔ josola vɛ jii. K'a dɔ la maa josolajii kɔkan, mɔ na sawala kosɛvɛ ka bɛn Tite sawako ma, kamasɔlɔn ài n'a josolajiila kosɛvɛ.

¹⁴ Ǹ n'ài matɔɔla Tite yɛ ka bɛn ko ko si ma, ài ma ǹ lamaloya wo suu suu lɔ. Mɔ na tuɲa fɔla ài yɛ teme waate bɛ, wo boloɲa kelen ma, mɔ n'ài matɔɔla mingɛ Tite yɛ, wo fana ka kɛ tuɲa le le.

¹⁵ A do yi lala aa kanundeya kɔkan ài yɛ, a hangili vɛ bilala ài bɛ ya kannabatoli lɔ, ani ài n'ài bolo siila a kɔlɔ ɲasiyanɲɛ ni jaajaa boloma teme.

¹⁶ Ǹ sawayine bubale, kamasɔlɔn ǹ'i sene ka ǹ jei sii ài la ko bɛ lɔ.