2 Kolɛntikalu 4 - Ala Ya Salatikan Kula Kitabu

Ala ya nafolo ladalonin bɔɔdaalu kɔnɔ

¹ Komi baale min kalifanin mɔ la ka bɛn Ala ya henandeya le ma, wo le y'a ma, mɔ falilɔ tɛ teeyala.

² Ǹu koni v'i ban maloyakolu ma minu yi kɛla divi lɔ. Mɔ do tɛ gbanaya kɛla, kumatɛ ka Ala kumakan jɛlɛma. Mafɔ, m'i tuɲa le fɔla k'a lagbɛ, fɔsa bɛ y'a jate ai jɛlɛ kɔnɔ m'i mɔɔ suu min ne Ala ɲakɔlɔ.

³ Ni do maa Samakan Kein lagbɛnin tɛ mɔɔ minu ɲana, wo vɛ kɛla, a lagbɛnin tɛ halakibatɔlu le ɲana.

⁴ Mɔɔ wolu limaniyanin tɛ, kamasɔlɔn dunuɲa min kuntii yon vɛ ai hangili bila divi lɔ, fɔsa ai kana se Samakan Kein ya kɛnɛya yena, min yi Masa Tɔɔmasenin nɔɔlɔ lagbɛla, ale min yi Ala sawula le.

⁵ Mɔ tɛ kawanili kɛla ka bɛn mɔ jɛlɛ ma, mafɔ Masa Tɔɔmasenin Isa ya Tiiya. Ado mɔ vɛ mɔ jɛlɛ kɛ àiya jɔn ne ka bɛn Isa ya ko ma.

⁶ Kamasɔlɔn Ala min n'a fɔla, ko: «Kɛnɛya yi mɛnɛn divi lɔ,» ale kelen ne vɛ kɛnɛya lamɛnɛn mɔ josokun nɔ, fɔsa m'i Ala ya nɔɔlɔ lɔn min yi mɛnɛnna Masa Tɔɔmasenin Isa ɲakɔlɔla lɔ.

⁷ Kɛɛ Ala ya nafolo kalifanin ǹu minu la, mɔ kɛyine iwo bɔɔdaalu, k'a jiya ko fanga makawanin min bɔnin Ala le bolo, ǹu tɛ.

⁸ Tɔlɔya yi siila mɔ la boloɲa bɛ ma, kɛɛ wo do tɛ mɔ lɔgbɛnɛngɛla. Mɔ kɔnɔlɔfilinin, kɛɛ mɔ jei tɛɛnin tɛ.

⁹ Ai yi mɔ jangatala, kɛɛ Ala ma mɔ labila. Ai yi mɔ gbasila ka mɔ laben, kɛɛ mɔ ma halaki.

¹⁰ Isa ya saya tɔlɔya ɲɔɔzii le yi lala mɔ falikolo kan waate bɛ, fɔsa aa niimaya fana la yi nkɛnɛmaya mɔ falikolo fɛ.

¹¹ Damanda m'i mɔ nii la, m'i saya le dakɔlɔ kudein Isa ya ko lɔ, fɔsa Isa ya niimaya la yi nkɛnɛmaya mɔ fali sata lɔ.

¹² Wo boloɲa ma, saya le yi baalela mɔ lɔ, kɛɛ niimaya le yi baalela àilu lɔ.

¹³ A sɛvɛnin kitabu kɔnɔ, ko: «M̀'ɛ limaniya. Wo le n'a kɛla, ǹ na kumala.» Komi ǹu gbu vɛ limaniya wo boloɲa kelen ma, wo le y'a kɛla, m'i kumala.

¹⁴ Ado mɔ k'a lɔn ne ko Ala min na mɔ Tii Isa lawulila ka bɔ saya lɔ, wo le kɛtɔ ǹu fana lawulila ka kɛ Isa fɛ, ka mɔ ni àilu bɛ ladɛn a ɲakɔlɔ.

¹⁵ Tuɲa le, ko wo bɛ yi mɔ masɔlɔnna àiya ko le lɔ, fɔsa Ala ya nɛɛma la vɛ sena mɔɔ jilika jilika ma, ai yi balika bɔ Ala yɛ a magbiliyako lɔ.

¹⁶ Wo le y'a ma, mɔ jei tɛɛnin tɛ. Hali ni mɔ falikolo fanga ma ka kɛ jiila, mɔ nii yi kɛla a kula le tele o tele.

¹⁷ Ado m'i tɔlɔyani minu masɔlɔnna waateni kɔlɔ, wolu yi mɔ lɔbɛnna habadan magbiliyali le lɔ, min buɲanin ka timin tɔlɔya wolu la feu.

¹⁸ Wo le y'a ma, mɔ ɲa lɔnin tɛ fen yentalu lɔ, mafɔ fen yenbalilu. Kamasɔlɔn fen yentalu bantɔle, kɛɛ fen yenbalilu tɛnala banna habadan.