2 Kolɛntikalu 3 - Ala Ya Salatikan Kula Kitabu

Ala vɛ mɔ kɛ bɔidennu le aa salatikan kula ya ko lɔ

¹ Jalasa mɔ vɛ mɔ jɛlɛ matɔɔ damina kɔtunun? Fɔ m'a kɛ iwo dɔlu y'a kɛla teme ka na lɛtɛlɛ le min yi maa ɲumaya jiyala ài la? Niwotɛ, fɔ ài yi lɛtɛlɛ wo suu lataa dɔlu ma?

² Àilu gbu kɛnin maa ɲumaya jiya lɛtɛlɛ le le min sɛvɛnin mɔ josokun nɔ, fɔsa bɛ yi se wo kalanna teme ka maa baale ɲuma lɔn ài tɛma.

³ Tuɲa le, ài y'a jiyala gbesekele ko àilu le kɛnin lɛtɛlɛ le, Masa Tɔɔmasenin na min sɛvɛla maa baale sabu la. Wo do sɛvɛnin tɛ duwaji la, mafɔ Ɲɛnɛmayatii Ala Nii Sɛnɛyanin. A do sɛvɛnin tɛ kawa fɛlɛnnu kɔkan, mafɔ adamadennu josokun nɔ.

⁴ Mɔ gbɛyine wo ma feu, kamasɔlɔn mɔ lanin Ala la kosɛvɛ Masa Tɔɔmasenin sabu la.

⁵ A tɛ k'a fɔ ko a see yi mɔ yɛ ka baale suu wo kɛ mɔ jɛlɛ yɛ, kɛɛ maa see bɛ yi bɔla Ala le lɔ.

⁶ Ale le na see dila mɔ ma ka mɔ kɛ bɔidennu le aa salatikan kula ya ko lɔ. Salatikan kula wo ma bɔ seliya sɛvɛnin nɔ, mafɔ Nii Sɛnɛyanin. Kamasɔlɔn seliya sɛvɛnin yi saya le lasena mɔɔlu ma, kɛɛ Nii Sɛnɛyanin yi niimaya le dila.

⁷ Seliya min tɛɛ mɔɔlu latɔnna sayako lɔ, wo kumalu sɛvɛnin tɛɛ kawa fɛlɛnnu le kɔkan. Ado Ala na seliya wo lajiila waate min nɔ, wo nɔɔlɔ ka bɔ gbɛ la haan fɔɔ Bani Isilankalu tɛɛ tɛ se ai ɲa kaana Nabi Musa ɲa lɔ, kamasɔlɔn wo tɛɛ mɛnɛnmɛnɛnna gbesekele, ka talan nɔɔlɔ wo tɛɛ je waatenin ne kɔlɔ dein.

⁸ Ni seliya nɔɔlɔ ka kɛ ten, Nii Sɛnɛyanin ya baale nɔɔlɔ do? Wo nɔɔlɔ tɛnala buɲala ka timin dɔ wo la?

⁹ Ni nɔɔlɔ ka kɛ baale wo la min tɛɛ mɔɔlu jobaliyala, a lagbɛyine feu ko dɔ baale min yi mɔɔlu kɛla telenmande le, wo nɔɔlɔ buɲanin vɛ dɔ wo le feu!

¹⁰ Tuɲa le, ko min nɔɔlɔnin tɛɛ kɔlɔman ne, wo ma kɛ foi le butu, kamasɔlɔn nɔɔlɔ dɔgbɛlɛ vɛ bɔ, min timinnin a kunfɔlɔ ta la.

¹¹ Wo lɔ, ni nɔɔlɔ tɛɛ kɛ baale kɔlɔ la min tɛɛ je waateni kɔlɔ, baale kula min kɛtɔ tola je kudein, wo nɔɔlɔ buɲatɔ ka timin dɔ wo ta la feu!

¹² Komi jeisii wo suu yi mɔ bolo, wo lɔ, mɔ wakaliyine bubale.

¹³ Mɔ kɛnin tɛ iwo Nabi Musa, min na faani bilinna a ɲa la, fɔsa Bani Isilankalu kana nɔɔlɔ majiitɔla ye min tɛɛ ban boloma.

¹⁴ Kɛɛ do, Bani Isilankalu hangili la ka gbasi. Hali bi, ni wolu ka kɛ salatikan kɔlɔ kitabulu kalanna, a kɛyine iwo faani kelen wo le bilinnin ai ɲa la bene. Faani wo ma bɔ je, kamasɔlɔn a tɛ se bɔla je ni mɔɔ ma don Masa Tɔɔmasenin ya kafonɲɔɔya lɔ.

¹⁵ Tuɲa le, hali bi ni ai ka kɛ Nabi Musa ya kitabu kalanna, a kɛyine iwo faani le bilinnin ai hangili ɲa ma.

¹⁶ Kɛɛ ni mɔɔ min k'a jɛlɛ lasei mɔ Tii ma, faani wo kɛtɔ bɔla je.

¹⁷ M'i mɔ Tii min ya ko fɔla yi ne, wo le Nii Sɛnɛyanin ne. Ado mɔ Tii Nii Sɛnɛyanin vɛ kɛla tɛɛminja, lafɛlɛ le yi woja.

¹⁸ Faani bilinnin tɛ ǹu minu ɲa la, m'i mɔ Tii nɔɔlɔ jiyala iwo jiya yi yena duwalen nɔ teme. Wo ma, mɔ Tii min kɛnin Nii Sɛnɛyanin ne, wo yi mɔ mafalinna ka mɔ kɛ iwo ale gbu, ka nɔɔlɔ dɔ la a dɔ kɔkan waate bɛ.