2 Kolɛntikalu 2 - Ala Ya Salatikan Kula Kitabu

¹ Wo le n'a kɛla, ǹ n'a latɛɛla ko ǹ tɛnala seikɔla ài ma bene, jani ǹ'ài josomakasi kɔtunun.

² Kamasɔlɔn ni ǹ k'ài josomakasi, jene kɛtɔ tola min yi se ka ǹ kɔnɔlɔdiya ni àilu tɛ, ǹ na àilu minu josomakasila?

³ Wo le n'a kɛla, ǹ na lɛtɛlɛ wo sɛvɛla boloɲa wo ma, fɔsa m̀'ɛ sena ài fɛlɔ, ǹ kana josomakasi sɔlɔn mɔɔlu ya ko lɔ, minu tɛɛ ka kan ka ǹ kɔnɔlɔdiya. Ǹe do layine tɛɛ a la k'a fɔ ko ǹa kɔnɔlɔdiya y'ài bɛ le ta le.

⁴ Ǹ na lɛtɛlɛ wo sɛvɛla ài ma josomakasi ni niilafin ba le boloma, ǹ ɲaji vɛ jiila palapala. Ǹ tɛɛ t'a fɛ k'ài josomakasi, mafɔ k'ài lalɔnni ǹa kanundeya wala jate la ài yɛ.

Ài yi hakɛtaba makoto

⁵ Ni a k'a sɔlɔn mɔɔ dɔ vɛ josomakasiko dɔ kɛ, wo tii ma ǹe kelen josomakasi, mafɔ a na àilu bɛ le josomakasila, hali ni a ka kɛ a dɔni ne, ni ǹ tɛ ko makawala.

⁶ Ài fanba na makumali min siila a la, wo vɛ je bɔ.

⁷ Wo ma yi ne, fɔ ài yi wo tii makoto k'a masawali, fɔsa a jei kana tɛɛ josomakasi boloma.

⁸ Wo lɔ, ǹ'ài madiyala, ài yi kanundeya gbugbu lagbɛ wo tii yɛ.

⁹ Dailu min na kɛla ǹ na lɛtɛlɛ wo sɛvɛla ài ma, wo le ǹ tɛɛ a fɛ le k'ài lɔsuma k'a lɔn ni ài koloyine ko bɛ lɔ.

¹⁰ Ni ài do ka mɔɔ min makoto yi ne, ǹe fana vɛ wo tii makoto. Ni do ko dɔ ka kɛ je, ǹ ka kan ka min lɔkoto, m̀'ɛ a lɔkoto àiya ko lɔ ka Masa Tɔɔmasenin kɛ ǹ sele le,

¹¹ fɔsa Soitana kana a hangili labaale mɔ ma, kamasɔlɔn mɔ tɛ divi lɔ ka bɛn aa kojatesiininnu ma.

Pɔli haminko Tolohasi so kɔnɔ

¹² Ǹ ka se Tolohasi so kɔnɔ mingɛ Masa Tɔɔmasenin ya Samakan Kein lasenko lɔ, ǹ k'a ye ko mɔ Tii tɛɛ vɛ da laka ǹ yɛ wo ko lɔ.

¹³ Kɛɛ ǹ josolajiinin tɛɛ tɛ, kamasɔlɔn m̀ ma m̀ badenma Tite talan je. Wo lɔ, ǹ k'ai diɲa ɲinin ka bɔ je ka taa se Masaduwani koovi lɔ.

Mɔ vɛ see sɔlɔn Masa Tɔɔmasenin sabu la

¹⁴ Kɛɛ ǹ'i balika bɔla Ala yɛ, min yi bilala mɔ ɲa kudein Masa Tɔɔmasenin ya seesɔlɔn taama lɔ. A do yi baalela mɔ fɛ ka Masa Tɔɔmasenin lɔnko lajɛzɛn fan bɛ lɔ, iwo wusulan suma yi jɛzɛnna fan bɛ lɔ teme.

¹⁵ Kamasɔlɔn mɔ kɛyine iwo wusulan, Masa Tɔɔmasenin yi min lasena Ala ma salaka le, min suma diyanin yi jɛzɛnna mɔɔ lakisininnu ni halakibatɔlu bɛ tɛma.

¹⁶ Wo do kɛyine iwo saya suma halakibatɔlu yɛ, min yi saya lasena ai ma. Kɛɛ a kɛyine iwo niimaya suma mɔɔ lakisininnu yɛ, min yi niimaya lasena ai ma. Ado jene senin baale wo la?

¹⁷ Mɔ do kɛnin tɛ iwo dɔ mɔɔ siyama minu yi Ala kumakan kɛla julayafen ne, mafɔ mɔɔ sɔvɛ le mɔ le, minu yi kumala Ala ɲakɔlɔ Masa Tɔɔmasenin ya see lɔ, iwo mɔɔ minu kelanin Ala bolo.