2 Kolɛntikalu 13 - Ala Ya Salatikan Kula Kitabu

Lailikan labannu ani folikan

¹ A siɲa sawana le ne, ǹ kɛtɔ nala bɔla ài ma. A do sɛvɛnin tan ne kitabu kɔnɔ, ko: «Kiti bɛ yi tɛɛla ka bɛn mɔɔ fila niwotɛ mɔɔ sawa ya seleya le ma.»

² Mɔɔ minu na julumbu tala kɔlɔman ne, m̀'ɛ ban wolu ni dɔlu lalila ǹ siɲa filana lɔ ài fɛlɔ. Hali ni m̀ ma kɛ ài fɛlɔ yi ne, ǹ'a fɔla kɔtunun, m̀'ɛ ǹ kɔseila, mɔɔ mɔɔ si tɛnala gbanna kolatɔn kunna.

³ Ài yi tɔɔmase min ɲininna k'a jiya ko Masa Tɔɔmasenin le yi kumala ǹ nɔ, ài yi wo sɔlɔnne. A tɛ fangandan ne ka bɛn ài ma, kɛɛ a yi baale kɛla fanga le la ài tɛma.

⁴ Tuɲa le, a gbaannin tɛɛ kɔlɔman ma fangandanya bolo le ma, kɛɛ a a nii la yi ne ka bɛn Ala ya foniseleya le ma. Wo boloɲa kelen ma, ǹu fana yi fangandan ne le a fɛ, kɛɛ m'i mɔ nii la yi ne ale le fɛ ka bɛn Ala ya foniseleya ma àiya ko lɔ.

⁵ Ài y'ài jɛlɛ lakɔlɔsi k'a ye ni ài yi limaniya siya le kɔkan. Ài y'ài jɛlɛ lɔsuma. Jalasa ài m'a ɲaye ko Masa Tɔɔmasenin Isa y'ài tɛma? Mafɔ, ni a ka talan ài vɛ koli lɔsumani wo lɔ.

⁶ Ǹ jii y'a ma le ko ài kɛtɔ a lɔnna mɔ ma koli lɔsumani wo lɔ.

⁷ Wo bɛ n'a kɛ, m'i Ala dalila fɔsa ài kana koyon suu suu kɛ. A tɛ k'a fɔ ko m'a fɛ le k'a jiya ko lɔsumani diyayine mɔ la, mafɔ m'a fɛ le ài yi kokein kɛ, hali ni a kɛnin ka kɛ iwo mɔ vɛ koli.

⁸ Kamasɔlɔn see tɛ mɔ yɛ ka Ala ya tuɲa dansii, mafɔ m'i baale kɛ tuɲa wo yɛ.

⁹ Ni fanga ma kɛ mɔ la waate min nɔ, k'a talan ài fanga walanin, m'i sawale wo lɔ. Mɔ do yi Ala dalila fɔsa àiya ko bɛ yi dafa.

¹⁰ Wo le y'a ma, ǹ'i ko minu sɛvɛla ài ma k'a talan m̀ majaannin ài la, fɔsa m̀'ɛ sena je, ǹ kana faiya ài ma seetiiya boloma, mɔ Tii na min dila m̀ ma ài lasawatiko lɔ, ài halakiko tɛ.

¹¹ Mɔ badenmalu, a tonin min ma, wo le ne: Ài yi sawa, k'ài lɔja ka kɛ mɔɔ dafanin ne, k'i ɲɔɔ sɛmɛdon, k'ài bɛn a lɔ, ka josolajii ladon i ɲɔɔ wotɛ. Wo vɛ kɛla, Ala min yi kanundeya ni josolajii dila, wo kɛtɔ tola ài tɛma.

¹² Ài ɲɔɔ fo kanundeya foli sɛnɛyanin ne.

¹³ Jan mumininnu bɛ y'ài fola.

¹⁴ Mɔ Tii Masa Tɔɔmasenin Isa ya nɛɛma, ni Ala ya kanundeya, ani Nii Sɛnɛyanin ya kafonɲɔɔya yi to ài bɛ fɛ.