2 Kolɛntikalu 12 - Ala Ya Salatikan Kula Kitabu

Mɔ Tii na ko minu lajɛlɛla Pɔli ɲa ma

¹ Fɔ ǹ'i to ǹ jɛlɛ matɔɔla, hali nafa ma kɛ ǹa matɔɔli la. Mɔ Tii na ko minu lajɛlɛla ǹ ɲa ma, ani a na ko minu lankɛnɛmayala ǹ yɛ, ǹ kɛtɔ wolu le ɲafɔla ài yɛ.

² Ǹ ka kɛ́ dɔ lɔn Masa Tɔɔmasenin ya kafonɲɔɔya lɔ, Ala ka taa min ne poon haan fɔɔ sangbolo dan na, a vɛ kɛ san tan ni naani (14) le. Ni ale gbu jɛlɛnin ka kɛ a falikolo lɔ, niwotɛ a tɛɛ tɛ a falikolo lɔ, m̀ ma wo lɔn. Ala kelenpesa le ka wo lɔn.

³ Ǹe koni k'a lɔn ne ko kɛ́ wo taayine kunnadiyaso la ka ban k'a kɔsei. Ni ale gbu jɛlɛnin ka kɛ a falikolo lɔ, niwotɛ a tɛɛ tɛ a falikolo lɔ, m̀ ma wo lɔn. Ala kelenpesa le ka wo lɔn.

⁴ A ka to kunnadiyaso la, a ka ko dɔlu mɛn, mɔɔ tɛ se minu ɲafɔla, ani minu fɔko ladaannin tɛ adamadennu yɛ.

⁵ Wo lɔ, ǹ'i sene ka ǹ jɛlɛ matɔɔ mɔɔ suu wo ya ko lɔ, kɛɛ ǹ tɛnala ǹ jɛlɛ matɔɔla ǹa ko suu suu lɔ, mafɔ ǹa fangandanyako.

⁶ Hali ni ǹ tɛɛ ka kɛ a fɛ ka ǹ jɛlɛ matɔɔ, ǹ tɛɛ tɛnala kɛla hangilindan ne, kamasɔlɔn ǹ tɛɛ nala kɛla tuɲafɔba le le. Kɛɛ m̀'ɛ m̀ ban wo kɛko ma, fɔsa mɔɔ suu suu kana ǹ jate mɔɔ gbɛlɛ le, ni a tɛ min yena ǹ na ani ka min mɛn ǹ da.

⁷ Kɛɛ jani ǹ'i ǹ fannɔbuɲa ka bɛn ko babalu ma minu lajɛlɛnin ǹ ɲa ma, dimin dɔ ka sii ǹ na iwo wonin min donnin ǹ fali lɔ, ka kɛ Soitana ya keladen ne, fɔsa ɲagba yi se m̀ ma ka m̀ mataa fannɔbaya la.

⁸ Ǹ na mɔ Tii madiyala siɲa sawa le, ǹ ko a yi tɔlɔya wo majaan ǹ na.

⁹ Kɛɛ a do k'a fɔ ǹ yɛ, a vɛɛ: «Ǹ na nɛɛma min kɛla i yɛ, wo y'i wasa, kamasɔlɔn ǹa seetiiya yi jiyala fangandanya le lɔ.» Wo le n'a kɛla, ǹ kɛtɔ ǹ jɛlɛ matɔɔla sawa boloma ka bɛn ǹa fangandanya ma, fɔsa Masa Tɔɔmasenin ya seetiiya yi to ǹ kan.

¹⁰ Wo le y'a ma, ni ǹ ka kɛ fangandan ne, ni mɔɔlu ka ǹ jɛvɛ ka ǹ jangata, ni gbɛlɛgbɛlɛ ni tɔlɔya ka m̀ masɔlɔn, wo bɛ yi ǹ ɲɛnɛle ka bɛn Masa Tɔɔmasenin ya ko ma. Kamasɔlɔn ni ǹ ka kɛ fangandan ne waate min nɔ, ǹ kɛtɔ fangama le le waate wo lɔ.

Pɔli ya hamin ka bɛn Kolɛntikalu ma

¹¹ Àilu le na kɛla sabu le m̀'ɛ ǹ jɛlɛ kɛ iwo hangilindan! Kamasɔlɔn àilu le tɛɛ ka kan ka ǹ tɔɔɲuma fɔ. Kamasɔlɔn hali ni ǹ tɛ foi le, ài yi keladen jɛlɛmatɔɔba minu buɲala, wolu fisanin tɛ ǹe le feu.

¹² Kawananko ni tɔɔmase minu y'a jiyala ko keladen bɛlɛbɛlɛ le ǹ ne, ǹa wolu labaalela ài tɛma sawali ba boloma.

¹³ Ǹ na limaniyajama tɔlu lafisayala ài le boloɲa mindɛ ma? Fɔ ko kelenpesa min, m̀ ma ǹ doni la ài kun. Ài jon jaani, ài yi hakɛ to ǹ yɛ ka bɛn wo ma!

¹⁴ A siɲa sawana le ne, ǹ lɔbɛnnin taako lɔ ài fɛlɔ. Ado ǹ tɛnala kɛla doni le ài kun, kamasɔlɔn ǹ tɛ ài bolofennu kɔ, mafɔ àilu gbu. Tuɲa le, a bɛnnin tɛ k'a fɔ ko dennilu yi fennu ladalo ai wolobalu yɛ, mafɔ wolobalu le yi wo kɛ ai dennu yɛ.

¹⁵ Ǹ kɛtɔ m̀ bolofen bɛ dila sawa boloma, ani ka ǹ jɛlɛ di ka la wo kɔkan ài nunakili ya ko lɔ. Ni ǹ k'ài kanu k'a dannatimin tan, fɔ ài yi ǹ kanu dɔni ne wo lɔ?

¹⁶ Àilu gbu k'a lɔn ne ko m̀ ma kɛ doni le mɔɔ foi kun. Kɛɛ a dɔlu y'a fɔla, ai vɛɛ ko ǹ na jateeya le kɛla k'ài mina janvandeya boloma.

¹⁷ Ǹ na mɔɔ minu kelayala ài ma, jalasa ǹ n'ài tɔɲɔla wo dɔ le fɛ?

¹⁸ Ǹ n'a fɔla Tite yɛ k'a magbeleya, ǹ ko a yi taa ài fɛlɔ, ani mɔ badenmakɛ dɔ. A yi di? Tite n'ài tɔɲɔla? Dajoo kelen ne tɛɛ tɛ ǹu mɔɔ fila la? Mɔ ma siya kelen ne taama?

¹⁹ Tumadɔ ài y'ài milila ko m'i mɔ lɔjala waate min bɛ lɔ ka mɔ kumanɔbɔ ài yɛ. Wo tɛ dɛ! Tuɲa le, mɔ na kuma min bɛ fɔla Ala gbu ɲakɔlɔ, iwo mɔɔ minu yi Masa Tɔɔmasenin ya kafonɲɔɔya lɔ. Mɔ diyananmɔɔlu, m'i ko bɛ kɛla yi ne ka bɛn ài lasawatiko le ma limaniya lɔ.

²⁰ M̀'ɛ siyan k'a fɔ ko ni ǹ ka taa ài fɛlɔ, ǹ kɛtɔ ài talanna boloɲa dɔ ma min tɛnala bɛnna m̀ ma. Ado àilu fana kɛtɔ ǹ yena boloɲa dɔ ma min tɛnala bɛnna ài ma. M̀'ɛ siyan k'a fɔ ko ǹ kɛtɔ sɔsɔyali talanna ài tɛma, ani keleya ni josobɔ ni jɛlɛlafisaya ni tɔɔtiɲali ni mafɔli ni fannɔbaya ani sɔɔnsɔɔn.

²¹ M̀'ɛ siyan fana k'a fɔ ko m̀'ɛ nala ài fɛlɔ kɔtunun, ǹ Tii Ala kana ǹ lafeya ài ɲakɔlɔ, ani ǹ kana josomakasi masɔlɔn ka bɛn mɔɔ siyama ya ko ma, minu tɛɛ julumbu tala kɔlɔman ne, kɛɛ ai ma ai dajoo mafalin ka bɔ aiya kokɔsɔninnu ma, ani kanukɛkolu, ani malobaliyakolu.