2 Kolɛntikalu 11 - Ala Ya Salatikan Kula Kitabu

Pɔli ni faɲafɔ keladennu

¹ Ǹ'a fɛ ài yi ǹa hangilindanya kuma mina ài ma dɔni ne. Ài jaanin ne, ài yi ǹa ko mina ài ma!

² Kamasɔlɔn ǹ'ài makeleyala iwo Ala y'ài makeleyala teme. Kamasɔlɔn a kɛyine iwo ǹ n'ài maminala kɛ́ kelen ne yɛ, min taanin kɛla Masa Tɔɔmasenin ne. Ǹ'a fɛ le k'ài lasɛnɛyanin di a ma iwo singbili min ma kɛ́ ko lɔn ba bene.

³ Wo bɛ n'a kɛ, sa na jateeya min suu kɛla Mama Hawa la k'a manɛɛ, ǹ'i siyanna àilu gbu hangili kana ɲaami boloɲa gbɛlɛ ma k'ài kɔdon àiya kanundeya bɛlɛbɛlɛ la Masa Tɔɔmasenin yɛ.

⁴ Kamasɔlɔn ni mɔɔ dɔ ka na ài fɛlɔ ka Isa suu gbɛlɛ ya ko kawanili kɛ ani samakan kein suu gbɛlɛ, mɔ ma min kawanili kɛ ài yɛ, ado ni wo tii ka Nii Sɛnɛyanin suu gbɛlɛ ya ko fɔ, ài ma min sɔlɔn kɔlɔkɔlɔ le, a kɛ diyayine ài y'ài bolo sii wo tii kumakan kɔlɔ.

⁵ Kɛɛ keladen jɛlɛmatɔɔba wolu koni, ǹ ta miliya lɔ, wolu foi fisayanin tɛ ǹ ne.

⁶ Hali ni wolu dalɔdiyanin ka kɛ ka timin ǹ na, ǹa lɔnni dɛsɛnin tɛ. Mɔ do vɛ wo lagbɛ ài yɛ boloɲa suu bɛ ma ko bɛ lɔ.

⁷ Ǹ ka Ala ya Samakan Kein lase ài ma waate min nɔ, ài ma ǹ sala. Ǹe do ka ǹ fanmajii fɔsa ài dalaya kɔlɔ yi ta. Ǹ ka hakɛ le ta ài la wo le?

⁸ Ǹ na limaniyajama dɔgbɛlɛlu bolo latɛla ka m̀ bolo sii ǹ sala kɔlɔ ka bɛn ài madɛmɛnko ma.

⁹ Ǹ tɛɛ ài fɛlɔ waate min nɔ, m̀ mako tɛɛ fen na, wo bɛ n'a kɛ, m̀ ma kɛ mɔɔ kundoni ne. Kamasɔlɔn mɔ badenma minu ka na m̀ ma ka bɔ Masaduwani, wolu le ka m̀ makolu laɲia. Wo ma, m̀ ma diɲa ka ǹ doni sii ài kun boloɲa suu suu ma. A do kɛtɔ ten ne kɔtunun.

¹⁰ Damanda Masa Tɔɔmasenin ya tuɲa yi ǹ josokun nɔ, mɔɔ foi tɛ je Akayi koovi lɔ min yi se ǹ dansiila ǹ ɲalɔkɛnɛyako min na.

¹¹ Jalasa ài diyanin tɛ ǹ yɛ? Ala gbugbu k'a lɔn ko ài diyayine ǹ yɛ!

¹² Ado ǹ'i min na yi ne, ǹ totɔle wo la fɔsa ǹ'i wasokɛba wolu kɔlɔbɔ, minu y'a ɲaɲininna k'a fɔ ko aiya baale ni mɔ ta lɔkaanyine.

¹³ Mɔɔ suu wolu koni, faɲafɔ keladen ne ai le, ani wunafali baaleden minu y'ai jɛlɛ kɛla iwo Masa Tɔɔmasenin ya keladennu.

¹⁴ Wo do pa tɛ kawananko le, kamasɔlɔn Soitana gbu y'a jɛlɛ kɛla iwo mɛlɛka nɔɔlɔnin.

¹⁵ Wo lɔ saa, ni Soitana ya bɔidennu k'ai jɛlɛ kɛ iwo bɔiden telenmandelu, kawananko tɛ wo le. Ado ai laban kɛtɔ bɛnna ai kɛkolu le ma.

Pɔli ya tɔlɔyakolu

¹⁶ Ǹ'a fɔla kɔtunun, mɔɔ mɔɔ kà ǹ jate hangilindan ne! Niwotɛ, ài y'ài bolo sii ǹ kɔlɔ iwo hangilindan fɔsa ǹe gbu yi ǹ jɛlɛ matɔɔ dɔni ne.

¹⁷ Ni ǹ ka ǹ jɛlɛ matɔɔ tan, wo lɔ, ǹ tɛ wo fɔla mɔ Tii ya siya kɔkan, kɛɛ ǹ'a fɔla hangilindanya bolo le ma.

¹⁸ Komi mɔɔ siyama y'ai jɛlɛ matɔɔla ka bɛn dunuɲakolu le ma, wo lɔ, ǹe gbu kɛtɔ ǹ jɛlɛ matɔɔla.

¹⁹ Ài yi hangilindannu ya ko minala ài ma sawa boloma, àilu minu yi hangilimalu le!

²⁰ Kamasɔlɔn ài yi mɔɔlu ya ko minala ài ma minu y'ài minala jɔnya boloma, k'ài bolo latɛ, k'ài tɔɲɔ, ka kafa ài ma, ani k'ài gbasi ài ɲa lɔ.

²¹ A yi maloyako le le m̀ ma k'a fɔ ko, ko wolu kɛko fanga tɛɛ tɛ mɔ la! Wo bɛ n'a kɛ, ni dɔlu y'ai wakalila k'ai jɛlɛ matɔɔ ko ko si lɔ, ǹe fana yi sene ka wo ɲɔɔzii kɛ. Ǹe do yi kumala iwo hangilindan!

²² Jalasa keladen wolu yi Hebulu le le? Ǹe fana yi wo le le. Jalasa Bani Isilanka le ai le? Ǹe fana yi wo le le. Jalasa Nabi Ibulahima bɔzɔn ne ai le? Ǹe fana yi wo le le.

²³ Jalasa ai y'a fɔla ai jɛlɛ ma ko Masa Tɔɔmasenin ya bɔiden? Ǹe vɛ wo le ka timin ai la feu! Ǹe do yi kumala iwo fatɔ. M̀'ɛ baale ka timin ai la. M̀'ɛ kasolabila kɛ ka timin ai la. Ai vɛ m̀ gbasi gbusan na ka timin ai la. Saya ma vɛ sulunya ǹ na siɲa siyama le.

²⁴ A vɛ kɛ siɲa loolu le, Jahudiya kuntiilu yi gbusan ɲa bisawa ni kɔnɔ (39) bɔla ǹ nɔ.

²⁵ A vɛ kɛ siɲa sawa le, Lɔmukalu yi m̀ gbasila bele le. Mɔɔlu ka m̀ bon kawakulun ne siɲa kelen ne ko ai yi ǹ faa. Kulunba ka tiɲa ǹ ne siɲa sawa le kɔɔji kɔkan, ado ǹ ka tele kelen ni su kelen kɛ kɔɔji lɔ.

²⁶ M̀'ɛ waate siyama kɛ taamana masuwakolu dakɔlɔ ka bɛn kɔɔtɛɛko ma, ani benkannikɛbalu, ani ǹ jɛlɛkanu mɔɔlu, ani siboloma gbɛlɛ mɔɔlu. Ǹ tɛɛ masuwakolu le dakɔlɔ solu kɔnɔ, ani tuu kɔlɔ, ani kɔɔji kɔkan, ani ka bɛn faɲafɔ badenmalu ma.

²⁷ Baale gbɛlɛn ni gbeleya ka kun ǹ nɔ. Ǹ ka siɲana siyama kɛ, kɔɔn ni minkɛlɔɔ vɛ ǹ na. Ado siɲa siyama lɔ, balo tɛɛ tɛ m̀ bolo. Ǹe do ka tɔlɔya nɛnɛ bolo, kamasɔlɔn feeyabɔ ɲɛnɛma tɛɛ tɛ m̀ bolo.

²⁸ Wo bɛ kɔ, ǹ haminyine lon bɛ limaniyajamalu bɛ ya ko le.

²⁹ Ni limaniyamɔɔ dɔ falilɔ ka teeya, ǹe gbu falilɔ yi teeyale. Ni ai dɔ kunnɔ ka tɛɛ, wo do yi ǹ josomagbale.

³⁰ Ni ǹ ka kan ka ǹ jɛlɛ matɔɔ, fɔ ǹ'i ǹ jɛlɛ matɔɔ ǹa fangandanyako le lɔ.

³¹ Ala min yi mɔ Tii Isa Fa le, tanuli yi min yɛ kudein, ale le k'a lɔn ko ǹ tɛ faɲa fɔla.

³² Ǹ tɛɛ Damase so kɔnɔ waate min nɔ, jamanakunnasiiba min tɛɛ Masakɛ Alɛtasi kɔlɔ, wo ka aa bɔidennu lɔ so dondalu lakɔlɔsila m̀ minako lɔ.

³³ Kɛɛ limaniyamɔɔlu ka m̀ bila gbɔlɔ lɔ ka ǹ labɔ funɛtɛlɛ la, ka ǹ lajii julu le so jiin kɔma. Wo lɔ, ǹ ka kisi ten ne ka bɔ jamanakunnasiiba bolo.