2 Kolɛntikalu 10 - Ala Ya Salatikan Kula Kitabu

Pɔli ya kumanɔbɔ ka bɛn aa keladenya ma

¹ Ǹe Pɔli y'ài madiyala ka bɛn Masa Tɔɔmasenin ya sɔniyali ma, ani aa ɲumaya, hali ài dɔlu ka kɛ a fɔla ko ǹ'i mɔɔ fanmajiinin ne le m̀'ɛ kɛla ài tɛma, ani ko ǹ kɛnin mɔɔ faiyanin ne le ni ǹ tɛ ài tɛma.

² Wo lɔ saa, m̀'ɛ nala ài tɛma, ài jon, ài kà kɛ sabu le ǹ'i kɛ mɔɔ faiyanin ne ài kanma, iwo ǹ jii y'a ma ko ǹ kɛtɔ a kɛla mɔɔ wolu la teme, minu y'ai milila ko m'i maa dunuɲalɔtɛɛ kɛla ka bɛn dunuɲamɔɔlu kokɛɲalu le ma.

³ Hali ni mɔ ka kɛ mɔ nii la dunuɲa min nɔ, mɔ tɛ maa kɛlɛ kɛla iwo dunuɲamɔɔlu y'a kɛla teme.

⁴ Kamasɔlɔn maa kɛlɛkɛfennu tɛ dunuɲa ta ɲɔɔzii le, mafɔ Ala ya kɛlɛkɛfen fangamalu, see yi minu yɛ ka kɛlɛkunkɔlɔbɛn jiinnu laben,

⁵ ani wasoko minu bɛ yi wulila ka dansii Ala lɔnko la. M'i miliya suu bɛ le ladonna Masa Tɔɔmasenin ya kuntiiya kɔlɔ a kannabatoko lɔ.

⁶ Ni àiya kannabato ka dafa waate min nɔ, wo vɛ kɛla, mɔ lɔbɛnyine ka kolobaliya ko suu bɛ latɔn.

⁷ Ài yi kolu lakɔlɔsi kobɛn minu y'ài ɲakɔlɔ! Ni mɔɔ dɔ lanin ka kɛ a la ko Masa Tɔɔmasenin ta le a le, fɔ wo tii y'a lɔn ko ǹu gbu yi Masa Tɔɔmasenin ta le le, iwo ale.

⁸ Wo lɔ saa, hali ni ǹ ka kɛ ǹ jɛlɛ matɔɔla k'a dannatimin ka bɛn seetiiya ma, mɔ Tii na min dila mɔ ma ài lasawatiko lɔ, ài halakiko tɛ, wo vɛ kɛla, wo maloya tɛ ǹ na.

⁹ A tɛ k'a fɔ ko ǹ'a fɛ le k'ài masiyan ǹa lɛtɛlɛlu le.

¹⁰ Kamasɔlɔn mɔɔ dɔlu y'a fɔla, ai vɛɛ: «Pɔli ya lɛtɛlɛlu magbiliyayine k'ai faiya, kɛɛ ale gbu vɛ kɛla mɔ ɲakɔlɔ, fanga tɛ kɛla a la, ani a dalakan tɛ foi ɲia.»

¹¹ Kɛɛ mɔɔ suu wolu y'a lɔn ko m'i kuma minu sɛvɛla maa lɛtɛlɛlu kɔnɔ hali ni mɔ tɛ ài tɛma, m'i wolu gbu le kɛla ni mɔ ka kɛ ài tɛma.

¹² Mɔ tɛ mɔ wakalila ka mɔ la mɔɔ wolu ma minu y'ai jɛlɛ matɔɔla, niwotɛ ka mɔ jate ai ɲɔɔzii le. Kɛɛ ni ai ka kɛ ai sumala i ɲɔɔ ma, ani k'i la i ɲɔɔ ma, wo vɛ kɛla, koɲaye tɛ ai bolo.

¹³ Ǹu koni, mɔ tɛ mɔ wasola ka timin mɔ dan na. Kɛɛ Ala na baale min kalifala mɔ la, min taanin kɛla sabu le mɔ na sena ài fɛlɔ, m'i mɔ wasola ka bɛn wo le ma.

¹⁴ Mɔ tɛ mɔ dan latiminna ka kɛ iwo mɔ ma se ài fɛlɔ, kamasɔlɔn mɔ nayine haan fɔɔ ài fɛlɔ Masa Tɔɔmasenin ya Samakan Kein ne.

¹⁵ Mɔ do tɛ mɔ wasola k'a dannatimin ka dɔlu sɛyɛnɔ kɛ mɔ ta le. Kɛɛ mɔ jii y'a ma le ko ni àiya limaniya ma ka to kafonna, wo vɛ kɛla, maa baale la yi sawatile ài tɛma bubale, ka bɛn maa baale dakun ma.

¹⁶ Wo boloɲa ma, m'i sene ka taa Samakan Kein lase kɔtunun jamanalu lɔ minu y'ài kɔma, jani m'i mɔ waso dɔlu sɛyɛnɔ la, ai na min kɛla ai ta baale dakun nɔ.

¹⁷ A sɛvɛnin tan ne kitabu kɔnɔ, ko: «Ni mɔɔ min y'a fɛ k'a waso, fɔ wo tii y'a waso mɔ Tii ya kokɛninnu le la.»

¹⁸ Kamasɔlɔn mɔɔ min y'a jɛlɛ matɔɔla, wo tii tɛnala jatela, mafɔ mɔ Tii vɛ mɔɔ min matɔɔla.