2 Kolɛntikalu 1 - Ala Ya Salatikan Kula Kitabu

¹ 6 Ǹe Pɔli min kɛnin Masa Tɔɔmasenin Isa ya keladen ne ka bɛn Ala sawo ma, ani mɔ badenma Timote, m'i lɛtɛlɛ min sɛvɛla k'a lataa Ala ya limaniyajama ma Kolɛnti so kɔnɔ, ani muminin minu bɛ yi Akayi koovi bɛ lakafonnin nɔ.

² Mɔ Fa Ala ni mɔ Tii Masa Tɔɔmasenin Isa ya nɛɛma yi kɛ ài yɛ, k'ài josolajii.

Pɔli yi Ala tanula

³ Tanuli yi Ala yɛ, min kɛnin mɔ Tii Masa Tɔɔmasenin Isa Fa le, ale min yi mɔɔmaɲumayenba le, ado Ala le yi mɔ masawalila boloɲa suu bɛ ma.

⁴ A do yi mɔ masawalila maa tɔlɔya bɛ le lɔ, fɔsa ǹu gbu yi se ka mɔɔ tɔlɔyanin suu bɛ masawali, iwo Ala na mɔ masawalila teme.

⁵ Kamasɔlɔn mɔ fɛ bilanin Masa Tɔɔmasenin ya tɔlɔyalu la teme bɛlɛbɛlɛ kɛ, wo boloɲa kelen ma, Ala yi mɔ masawalila bubale ka bɛn Masa Tɔɔmasenin ne ma.

⁶ Ni gbalo vɛ la mɔ kɔkan, wo kɛnin ài masawaliko ni àiya kisiko le lɔ. Ado ni mɔ ma vɛ sawali, wo kɛnin ài masawaliko le lɔ, ni ài ka maa tɔlɔya suu mina ài ma sawali boloma.

⁷ Wo vɛ kɛla, mɔ jei tɛnala tɛɛla àiya ko lɔ tuun, kamasɔlɔn mɔ k'a lɔn ne ko ni ài ka maa tɔlɔya suu sɔlɔn, ài kɛtɔ maa masawali suu le sɔlɔnna fana.

⁸ Mɔ badenmalu, mɔ t'a fɛ ài yi to divi lɔ ka bɛn maa tɔlɔya ma, min na mɔ masɔlɔnna Esiya koovi lɔ. Mɔ lɔ na gbɛnɛla bubale haan fɔɔ ka se mɔ fanga dan ma, ado mɔ jei na tɛɛla mɔ kisiko lɔ.

⁹ Tuɲa le, a tɛɛ mɔ kɔnɔ ko saya la vɛ tɛɛ mɔ ma. Kɛɛ wo kɛnin alako mɔ kana mɔ bolomala mɔ jɛlɛ ma, mafɔ Ala min yi fulenilu lawulila.

¹⁰ Ale le na mɔ lakisila masuwako wo ma, a do kɛtɔ mɔ lakisila kɔtunun. Mɔ jei siinin ale le la k'a fɔ ko a kɛtɔ tola mɔ lakisila ten ne.

¹¹ Àilu fana yi mɔ madɛmɛn ka Ala dali mɔ yɛ, fɔsa mɔɔ siyama yi balika bɔ Ala yɛ maa ko lɔ, ka bɛn nɛɛma min kɛtɔ mɔ yɛ kamasɔlɔn mɔɔ siyama ya duwawu le fɛ.

Pɔli taako ka bɔ a ma teme

¹² Mɔ ɲalɔkɛnɛya kun ne min ne: Mɔ josokun ne yi mɔ sele le k'a fɔ ko mɔ na maa dunuɲalɔtɛɛ kɛla telenmandeya ni Ala ya josolɔgbɛya bolo le ma, ài tɛma bɛlɛbɛlɛ le. Mɔ do bolomalanin tɛɛ Ala ya nɛɛma le ma, adamaden ya hangilimaya tɛ.

¹³ Mɔ tɛ ko ko si sɛvɛla ài ma, ni ài tɛ se min kalanna k'a ɲaye. Ǹ jii y'a ma le k'a fɔ ko ài kɛtɔ mɔ ɲayena bɛlɛbɛlɛ kɛ,

¹⁴ iwo ài vɛ mɔ ɲaye dɔni ne teme. Wo vɛ kɛla, mɔ Tii Isa nalon vɛ sena, m'i kɛle àiya ɲalɔkɛnɛya sabu le, iwo àilu fana kɛtɔ maa ɲalɔkɛnɛya sabu le teme.

¹⁵ Komi ǹ layine tɛɛ wo la kosɛvɛ, ǹ tɛɛ a fɛ ka taa bɔ ài ma kunfɔlɔ le, fɔsa ài yi duwawu sɔlɔn siɲa fila le.

¹⁶ Ǹ tɛɛ taala Masaduwani koovi lɔ waate min nɔ, a lɔɔ tɛɛ ǹ na ka taa bɔ ài ma, ka ban ka bɔ Masaduwani ka na ài fɛlɔ kɔtunun. Ni wo tɛɛ ka kɛ, ài tɛɛ sene ka m̀ makolaɲiafen di m̀ ma ka ǹ lase Jude koovi lɔ.

¹⁷ Ǹ na ko wo jatesiila waate min nɔ, jalasa ǹ tɛɛ ko tisitasa le la wo le? Jalasa ǹ'i ǹa kolatɛɛninnu kɛla ka bɛn dunuɲamɔɔlu kɛɲa le ma k'a fɔ «aan» niwotɛ «ɛnɛn» waate kelen nɔ?

¹⁸ Damanda Ala yi lanande le le, a yi ǹ sele le k'a fɔ ko ǹ na min fɔla ài yɛ, wo ma kɛ «aan» ni «ɛnɛn» ko le.

¹⁹ Kamasɔlɔn Ala Denkɛ Masa Tɔɔmasenin Isa, ǹe ni Silasi ni Timote na min ya ko lasena ài ma, wo ya ko ma kɛ «aan» ni «ɛnɛn» ko le, mafɔ aa ko yi «aan» ko le le kudein.

²⁰ Kamasɔlɔn Ala na lahedi suu suu tala, wo bɛ ma yi fala Isa le sabu la. Wo le y'a kɛla, m'a fɔla «amiina» ka bɛn ale le ma, Ala magbiliyako lɔ.

²¹ Ado Ala gbu yi mɔ ni àilu lasawatila Masa Tɔɔmasenin ya kafonɲɔɔya le lɔ. Ale le na mɔ tala,

²² ka tɔɔmase bila mɔ ma, ani ka Nii Sɛnɛyanin don mɔ josokun nɔ iwo tɔima ka bɛn koɲuma natɔlu ma.

²³ Ala yi ǹ sele le, a do ka ǹ josokun lɔn, ǹ ko, m̀ ma ǹ kɔsei ài fɛlɔ Kolɛnti fɔsa ǹ kana ko lɔgbeleyanin sii ài la.

²⁴ A tɛ k'a fɔ ko mɔ vɛ mɔ jɛlɛ kɛ àiya kuntii le limaniyakolu lɔ, mafɔ baalekɛɲɔɔma le mɔ le ài lasawako lɔ, kamasɔlɔn mɔ k'a lɔn ne ko ài lɔgbeleyayine limaniya lɔ feu.