1 Yohana 5 - Ala Ya Salatikan Kula Kitabu

Maa see sɔlɔnko dunuɲa ma

¹ Ni mɔɔ mɔɔ ka limaniya a ma ko Isa yi Masa Tɔɔmasenin ne le, wo tii vɛ sɔlɔn kula kɛ Ala bolo. Ni do mɔɔ min vɛ den fa kanula, wo tii vɛ a den fana kanu.

² Ni mɔ ka Ala kanu, ani ka aa jamalilu labato, m'a lɔnna wo le ma ko m'i Ala dennu kanula.

³ Ka Ala kanu, wo le ka aa jamalilu labato, ado aa jamalilu tɛ doni gbili le.

⁴ Kamasɔlɔn mɔɔ minu vɛ sɔlɔn kula kɛ Ala bolo, wolu bɛ vɛ see sɔlɔn dunuɲa ma. Maa see sɔlɔnko dunuɲa ma, wo le maa limaniya le.

⁵ Jene vɛ see sɔlɔn dunuɲa ma ni a tɛ mɔɔ le min limaniyanin a ma ko Isa yi Ala Denkɛ le le?

Seleyakan ka bɛn Masa Tɔɔmasenin ma

⁶ Masa Tɔɔmasenin Isa le nanin ji ni jeli fɛ. A ma na ji kelen fɛ, mafɔ ji ni jeli. Nii Sɛnɛyanin ne yi wo seleya dila, kamasɔlɔn Nii Sɛnɛyanin ne tuɲa le.

⁷ Ado seleya sawa le yi je:

⁸ Nii Sɛnɛyanin, ji, ani jeli. Wo sawa bɛ bɛnnin kan kelen ne ma.

⁹ Ni m'i mɔ bolo siila adamadennu ya seleyakan kɔlɔ, Ala ya seleyakan buɲanin vɛ wo le, kamasɔlɔn Ala gbu ya seleyakan ne, a na min dila ka bɛn a Denkɛ ma.

¹⁰ Ni mɔɔ min ka limaniya Ala Denkɛ ma, wo tii yi Ala ya seleyakan wo ladalola a josokun nɔ. Kɛɛ do, ni mɔɔ min ma limaniya Ala ma, wo tii vɛ Ala kɛ faɲafɔba le, kamasɔlɔn a ma limaniya seleyakan wo ma, Ala na min dila ka bɛn a Denkɛ ma.

¹¹ Seleyakan wo le min ne: Ala vɛ niimaya banbali di mɔ ma, ado niimaya wo yi sɔlɔnna a Denkɛ le sabu la.

¹² Ni mɔɔ min ka kɛ Denkɛ ta le, niimaya banbali yi wo tii le bolo. Ni do mɔɔ min ma kɛ Ala Denkɛ ta le, niimaya banbali tɛ wo tii bolo.

Jeisii min yi limaniyamɔɔlu bolo

¹³ Ǹ'i ko minu sɛvɛla ài ma, àilu minu limaniyanin Ala Denkɛ tɔɔ ma, fɔsa ài y'a lɔn ko niimaya banbali y'ài bolo.

¹⁴ Lanaya min yi mɔ josokun nɔ Ala ɲakɔlɔ, wo le min ne: Ni mɔ ka a dali ko ko si la ka bɛn a sawo ma, a yi wo mɛnne.

¹⁵ Ni mɔ do k'a lɔn ko a yi maa dailikan bɛ mɛnna, wo vɛ kɛla, mɔ k'a lɔn fana ko mɔ na a dalila ko ko si la, mɔ vɛ ban wo sɔlɔnna.

¹⁶ Ni mɔɔ mɔɔ ka a badenma ye julumbu dɔ tala min la tɛ banna saya ma, wo tii yi madaili kɛ, Ala do kɛtɔ niimaya dila a badenma wo ma. Mɔɔ minu ya julumbu la tɛ banna saya ma, ǹ kan yi wolu le ma. Kɛɛ julumbu dɔ yi je min la yi banna saya ma. Ǹ t'a fɔla ài yi Ala dali ka bɛn wo ma.

¹⁷ Telenbaliyako bɛ yi julumbu le le, kɛɛ julumbu dɔ yi je min la tɛ banna saya ma.

¹⁸ Mɔ k'a lɔn ne ko mɔɔ min vɛ sɔlɔn kula kɛ Ala bolo, wo tii tɛ tola julumbu tala, kamasɔlɔn Ala Denkɛ y'a lakanala, ado Soitana tɛ se foi kɛla a la.

¹⁹ Mɔ k'a lɔn ne ko Ala ta le mɔ le, ado dunuɲa bɛ yi Soitana fanga le kɔlɔ.

²⁰ Ado mɔ k'a lɔn ne fana ko Ala Denkɛ nanin ka koɲaye di mɔ ma, fɔsa m'i wo lɔn, ale min y'a bɛlɛbɛlɛ le. Mɔ do kafonnin a bɛlɛbɛlɛ le kɔkan, ani a Denkɛ Masa Tɔɔmasenin Isa. Ala bɛlɛbɛlɛ le a le, ani niimaya banbali.

²¹ Ǹ dennu, ài y'ài jando ài jɛlɛ lɔ ka bɛn joo batokolu ma.