1 Yohana 4 - Ala Ya Salatikan Kula Kitabu

Faɲafɔ kelalu

¹ Ǹ diyananmɔɔlu, ài kà la mɔɔ bɛ la minu y'a fɔla ko Ala Nii y'ai fɛ, kɛɛ ài y'ai lakɔlɔsi bene k'a lɔn ni Ala Nii le y'ai fɛ, kamasɔlɔn faɲafɔ kelalu vɛ siyaya dunuɲa.

² Ala Nii yi lɔnna min ne ma: Ni mɔɔ mɔɔ k'i lɔ a la ko Isa le Masa Tɔɔmasenin ne min nanin dunuɲa mɔɔnivin falikolo lɔ, wo vɛ kɛla, Ala Nii yi wo tii fɛ.

³ Kɛɛ ni mɔɔ min m'i lɔ Isa ya ko la, wo vɛ kɛla, Ala Nii tɛ wo tii fɛ, mafɔ Masa Tɔɔmasenin kɛlɛkɛɲɔɔ nii, ài na min mangutu mɛnna ko a natɔ dunuɲa, a do vɛ ban nala butu.

⁴ Ǹ dennu, àilu koni yi Ala ta le le. Ài do vɛ see sɔlɔn faɲafɔ kela wolu ma, kamasɔlɔn ale min y'ài fɛ, a fanga buɲanin vɛ dɔ wo ta le min yi dunuɲamɔɔlu fɛ.

⁵ Faɲafɔ kela wolu yi dunuɲa ta le le. Wo le y'a kɛla, ai yi kumala ka bɛn dunuɲakolu le ma, ado dunuɲamɔɔlu y'ai tolomalɔla ai la.

⁶ Ǹu koni yi Ala ta le le. Mɔɔ min ka Ala lɔn, wo tii y'a tolomalɔla mɔ la. Kɛɛ do, mɔɔ min tɛ Ala ta le, wo tii t'a tolomalɔla mɔ la. Nii Sɛnɛyanin min yi tuɲa lankɛnɛmayala, m'i wo ni faɲafɔ nii wotɛbɔ lɔnna teme, wo le ve.

Ala yi kanundeya le le

⁷ Ǹ diyananmɔɔlu, ài m'i ɲɔɔ kanu, kamasɔlɔn kanundeya bɔnin Ala le lɔ. Mɔɔ min y'a mɔɔɲɔɔ kanula, wo tii vɛ sɔlɔn kula kɛ Ala bolo, a do ka Ala lɔn.

⁸ Kɛɛ kanundeya tɛ mɔɔ min josokun nɔ, wo tii ma Ala lɔn, kamasɔlɔn Ala yi kanundeya le le.

⁹ Ala na aa kanundeya lankɛnɛmayala mɔ yɛ teme, wo le ne: A na a Denkɛ kelenpesa lanala dunuɲa, fɔsa m'i niimaya kɛ wo sabu la.

¹⁰ Kanundeya bɛlɛbɛlɛ le min ne: A tɛ k'a fɔ ko mɔ na Ala kanula, kɛɛ ale le na mɔ kanula ka a Denkɛ lana, k'a kɛ maa julumbulu lɔkoto salaka le.

¹¹ Ǹ diyananmɔɔlu, komi Ala vɛ mɔ kanu boloɲa wo ma, wo lɔ, fɔ ǹu fana y'i ɲɔɔ kanu.

¹² Mɔɔ foi ma Ala ye ba, kɛɛ ni mɔ k'i ɲɔɔ kanu, Ala totɔ maa kafonɲɔɔya lɔ, ani aa kanundeya dafatɔ mɔ josokun nɔ.

¹³ Mɔ n'a lɔnna min ne ma ko m'i Ala ya kafonɲɔɔya lɔ, ani ale fana yi maa kafonɲɔɔya lɔ: A vɛ a Nii Sɛnɛyanin di mɔ ma.

¹⁴ Mɔ v'a ye ka wo seleya di ko mɔ Fa ka a Denkɛ lana dunuɲa k'a kɛ dunuɲa Lakisiba le.

¹⁵ Ni mɔɔ min k'i lɔ a la ko Isa yi Ala Denkɛ le le, wo vɛ kɛla, Ala yi wo tii ya kafonɲɔɔya lɔ, ado wo tii fana yi Ala ya kafonɲɔɔya lɔ.

¹⁶ Wo lɔ, ǹu gbu vɛ kanundeya wo lɔn min yi Ala bolo mɔ yɛ, ka limaniya a ma. Ala yi kanundeya le le. Wo lɔ, ni mɔɔ mɔɔ ka to taamana kanundeya lɔ, wo tii yi Ala ya kafonɲɔɔya le lɔ, ado Ala fana yi wo tii ya kafonɲɔɔya lɔ.

¹⁷ Kanundeya dafanin mɔ tɛma boloɲa wo le ma, fɔsa lanaya yi kɛ mɔ josokun nɔ kititɛɛlon, kamasɔlɔn m'i niimaya min kɛla dunuɲa, wo kɛyine iwo Masa Tɔɔmasenin ta yi teme.

¹⁸ Siyan tɛ kanundeya lɔ, kanundeya dafanin do yi siyan banna feu, kamasɔlɔn siyan jusiinin kolatɔn ne kɔkan. Wo le y'a ma, ni mɔɔ min ka siyan, wo vɛ kɛla, kanundeya dafanin tɛ wo tii josokun nɔ bene.

¹⁹ Ǹu koni yi kanundeya kɛla, kamasɔlɔn Ala le na mɔ kanula kunfɔlɔ le.

²⁰ Ni mɔɔ min k'a fɔ ko a yi Ala kanula, k'a talan a a badenma lagbeyaɲɛla, faɲafɔba le wo tii le. Kamasɔlɔn mɔɔ min tɛ a badenma kanula, a ɲa yi min na, wo tii tɛ se Ala kanula, a ɲa tɛ min na.

²¹ Ado jamali min ne yi mɔ bolo ka bɔ Ala fɛ, ko ni mɔɔ min ka Ala kanu, fɔ wo tii y'a badenma fana kanu.