1 Yohana 3 - Ala Ya Salatikan Kula Kitabu

Ala den ne mɔ le

¹ Ài y'a ye mɔ Fa na mɔ kanula teme, haan fɔɔ ai y'a fɔla mɔ ma ko Ala dennu. Mɔ gbu do yi wo le le! Dailu min na kɛla dunuɲa ma mɔ lɔn, wo le, dunuɲa ma Ala lɔn.

² Ǹ diyananmɔɔlu, Ala den ne mɔ le tandainɔ! Kɛɛ mɔ kɛtɔ teme, wo la ma nkɛnɛmaya ba bene. Ǹu koni k'a lɔn ne ni Masa Tɔɔmasenin la ka nkɛnɛmaya waate min nɔ, mɔ kɛtɔle iwo ale, kamasɔlɔn mɔ kɛtɔ a yena iwo a gbu yi teme.

³ Ni jeisii wo ka kɛ mɔɔ min bolo, wo tii y'a jɛlɛ lasɛnɛyale iwo Isa sɛnɛyanin teme.

⁴ Ni mɔɔ mɔɔ ka to julumbu tala, wo tii yi Ala ya seliya le tiɲala, kamasɔlɔn julumbu tako yi seliya tiɲako le le.

⁵ Ài k'a lɔn ko Isa la na nkɛnɛmayala fɔsa a yi maa julumbulu bɔ mɔ ma, ado julumbu foi tɛ ale ma.

⁶ Mɔɔ min aa kafonɲɔɔya lɔ, wo tii tɛnala tola julumbu tala. Mɔɔ min do yi julumbu tala, wo tii ma Isa ye ba bene, a do m'a lɔn.

⁷ Ǹ dennu, ài kà diɲa mɔɔ mɔɔ y'ài lafili. Mɔɔ min yi taamana telenmandeya lɔ, wo tii telenyine iwo Isa gbu telennin teme.

⁸ Ni do mɔɔ min ka to julumbu tala, wo tii yi Soitana ya mɔɔ le le, kamasɔlɔn Soitana yi julumbu ta le la ka ta dunuɲa damina waate ma. Dailu min na kɛla Ala Denkɛ na nala dunuɲa, wo le Soitana kɛkolu lɔtiɲako le.

⁹ Ni mɔɔ mɔɔ ka sɔlɔn kula kɛ Ala bolo, wo tii tɛnala tola julumbu tala, kamasɔlɔn Ala dajoo le y'a la. A do tɛ se tola julumbu tala, kamasɔlɔn a vɛ sɔlɔn kula kɛ Ala bolo.

¹⁰ Ala dennu ni Soitana dennu wotɛbɔ yi lɔnna teme, wo le ne: Mɔɔ min tɛ taamana telenmandeya lɔ, wo tii tɛ Ala ta le, kumatɛ mɔɔ min tɛ a badenma kanula.

Ɲɔɔkanuko

¹¹ Ài na kuma min mɛnna ka ta a damina ma, wo le ne: Ài m'i ɲɔɔ kanu.

¹² Mɔ kà kɛ iwo Kabila, min ka kɛ Soitana ya mɔɔ le k'a dɔɔkɛ faa. A k'a dɔɔkɛ faa mindɛ lɔ? A ka wo kɛ kamasɔlɔn a kɛkolu kɛwonyayine tɛɛ, k'a talan a dɔɔkɛ kɛkolu telenyine tɛɛ.

¹³ M̀ badenmalu, ài ka kawakoya ni dunuɲa k'ài lagbeyaɲɛ.

¹⁴ Mɔ k'a lɔn ne mɔ vɛ bɔ saya lɔ ka don niimaya lɔ, kamasɔlɔn m'i mɔ badenmalu kanula. Ni mɔɔ min do tɛ a badenmalu kanula, wo tii tonin saya le lɔ.

¹⁵ Ni mɔɔ min k'a badenma lagbeyaɲɛ, wo tii ni mɔɔfaaba kaanyine, ài do k'a lɔn ko niimaya banbali tɛ mɔɔfaaba foi josokun nɔ.

¹⁶ Mɔ na kanundeya lɔnna min ne ma: Isa ka a nii di maa ko le lɔ. Wo le y'a ma, fɔ ǹu fana yi mɔ nii di mɔ badenmalu ya ko lɔ.

¹⁷ Ni dunuɲa nafololu ka kɛ mɔɔ min bolo, ni wo tii k'a badenma gbalanin ye k'i ban henala a la, wo vɛ kɛla, wo tii yi se a fɔla di ko Ala ya kanundeya y'a josokun nɔ?

¹⁸ Ǹ dennu, maa ɲɔɔkanuko kà dan dalɔkuma ma dein. Fɔ a yi kɛ kanundeya bɛlɛbɛlɛ le le, min yi lɔnna mɔ kɛkolu fɛ.

Lanaya min yi mɔ josokun nɔ Ala ɲakɔlɔ

¹⁹ Mɔ kɛtɔ a lɔnna min ne ma ko mɔ bolo kɛnin tuɲa la, ani lanaya kɛtɔ mɔ josokun nɔ Ala ɲakɔlɔ.

²⁰ Hali ni mɔ josokun ka kɛ mɔ jobaliyala, mɔ k'a lɔn ko Ala buɲayine mɔ josokun ne, ale le do ka ko bɛ lɔn.

²¹ Ǹ diyananmɔɔlu, ni mɔ josokun tɛ mɔ jobaliyala, lanaya yi mɔ josokun nɔ Ala ɲakɔlɔ.

²² Ado mɔ v'a dalila ko ko la, m'i wo sɔlɔnne, kamasɔlɔn m'aa jamalilu labatola k'a diyanankolu kɛ.

²³ A na jamali min ne dila mɔ ma, ko m'i limaniya a Denkɛ Masa Tɔɔmasenin Isa tɔɔ ma, ani k'i ɲɔɔ kanu iwo a na mɔ jamalila teme.

²⁴ Mɔɔ min yi Ala ya jamalilu labatola, wo tii yi Ala ya kafonɲɔɔya le lɔ, ado Ala fana yi wo tii ya kafonɲɔɔya le lɔ. Mɔ n'a lɔnna boloɲa min ne ma ko a yi maa kafonɲɔɔya lɔ: A na Nii Sɛnɛyanin dila mɔ ma.