1 Yohana 1 - Ala Ya Salatikan Kula Kitabu

Niimaya kuma

¹ M̀'i min lasena ài ma, wo le niimaya kuma le, min tɛɛ je ko bɛ damina lɔ, mɔ na min mɛnna, ka min ye mɔ ɲa la k'a lasaa, ani mɔ bolo vɛ tuu min na.

² Niimaya wo la ka nkɛnɛmaya, mɔ do na a yena ka kɛ a sele le, ado m'i niimaya banbali wo ya ko lasena ài ma min tɛɛ mɔ Fa fɛlɔ, a do la na nkɛnɛmayala mɔ yɛ.

³ Mɔ na ko minu yena, ani k'ai mɛn, m'i wolu le lasena ài ma, fɔsa àilu fana yi don maa kafonɲɔɔya lɔ. M'i kafonɲɔɔya lɔ min fɛ, wo le mɔ Fa le, ani a Denkɛ Masa Tɔɔmasenin Isa.

⁴ M'i ko minu sɛvɛla ài ma, fɔsa maa kɔnɔlɔdiya da yi fa.

Ala yi kɛnɛya le le

⁵ Mɔ na samakan min mɛnna Isa da, m'i wo le lasena ài ma yi ne, ko: Ala yi kɛnɛya le le, divi pa tɛ a lɔ.

⁶ Ni mɔ k'a fɔ ko m'i Ala ya kafonɲɔɔya lɔ k'a talan m'i divilɔkolu kɛla, wo vɛ kɛla, m'i faɲa le fɔla, ado mɔ tɛ taamana tuɲandeya boloma.

⁷ Kɛɛ ni mɔ ka kɛ kɛnɛyalɔkolu kɛla, iwo Ala gbu yi kɛnɛya lɔ teme, kafonɲɔɔya le kɛtɔ kɛla mɔ wotɛ, ado a Denkɛ Isa jeli yi mɔ lasɛnɛyale ka maa julumbulu bɛ bɔ mɔ ma.

⁸ Ni mɔ k'a fɔ ko julumbu tɛ mɔ ma, m'i mɔ jɛlɛkanu le manɛɛla, ado tuɲa tɛ mɔ josokun nɔ.

⁹ Kɛɛ ni mɔ ka mɔ dalabɔ maa julumbulu le, Ala min yi lanande ni telenmande le, ale le kɛtɔ maa julumbulu lɔkotola ka mɔ lasɛnɛya ka maa telenbaliyako bɛ bɔ mɔ ma.

¹⁰ Ni mɔ k'a fɔ ko mɔ ma julumbu ta, mɔ vɛ Ala kɛ faɲafɔba le, a do kumakan tɛ mɔ josokun nɔ.