1 Timote 6 - Ala Ya Salatikan Kula Kitabu

Jɔnnu ni jɔnfalu wotɛko

¹ Mɔɔ minu yi jɔnya lɔ, fɔ wolu bɛ yi aiya jɔnfalu jate mɔɔlu le minu ni buɲali bɛ kaannin, fɔsa Ala tɔɔ ni maa kalan la kana feya.

² Jɔn minu ya jɔnfalu taanin kɛla limaniyamɔɔlu le, ai kà aiya jɔnfalu lafeya k'a fɔ ko ai bɛ yi badenma le le. Kɛɛ ai do ka kan k'a dɔ la aiya baale ɲuma kɔkan, kamasɔlɔn mɔɔ minu yi nafa sɔlɔnna aiya baale fɛ, limaniyamɔɔ le wolu le ani Ala diyananmɔɔlu. I yi mɔɔlu kalan ko minu la k'a magbeleya.

Faɲafɔ kalanmɔɔlu ni wɔliko nata

³ Ni mɔɔ mɔɔ ka na kalan gbɛlɛ le, min ni mɔ Tii Masa Tɔɔmasenin Isa ya kuma sɔvɛlu tɛ kelen ne, niwotɛ min bɛnnin tɛ Alaɲasiyanɲɛ ma,

⁴ wo vɛ kɛla, wo tii v'a fannɔbuɲa, a do ma foi lɔn. Wo ma, sɔsɔyali diyayine a yɛ, ani sɔɔnsɔɔn ka bɛn kumalu kɔlɔ ma. Ko minu yi nala keleya ni falanɲɔɔya le, ani tɔɔtiɲali, ani miliya yon,

⁵ ani kɛlɛ banbalilu mɔɔ hangili tiɲaninnu tɛma, minu dɛsɛnin tuɲa la. Wolu le y'ai milila ko Ala ya siya lataamanko yi nafolo ɲinin siya le le.

⁶ Tuɲa le, Ala ya siya lataamanko yi nala nafolo ba le le, ni i sɔlɔnfen k'i ɲɛnɛ.

⁷ Kamasɔlɔn mɔ ma na foi le mɔ fɛ dunuɲa, mɔ do tɛ se bɔla fen ne dunuɲa.

⁸ Wo ma, ni balo ni feeyabɔ ka kɛ mɔ bolo, ài m'i wasadon wolu lɔ.

⁹ Kɛɛ a lɔɔ yi mɔɔ minu la ka nafolotiiya kɛ, wolu ma yi nɛɛla ka ben nata kolon suu bɛ le ma, minu yi mɔɔlu minala iwo sɔɔ ka tiɲali ni halaki lana ai ma.

¹⁰ Kamasɔlɔn koyon suu siyama jusiinin wɔliko nata le kɔkan. Ka bɛn nafolo lɔɔ ma, mɔɔ dɔlu vɛ limaniya siya bila k'ai josokun tɔlɔya ko siyama le.

Jamali labannu Timote yɛ

¹¹ Ile Ala ya mɔɔ koni, i i jɛlɛ matanga ko wolu ma, ka bɔli telenmandeya kɔ, ani Alaɲasiyanɲɛ, ani limaniya, ani kanundeya, ani sawali, ani sɔniyali.

¹² I i lɔja ka kɛlɛ ɲuma kɛ ka bɛn limaniya ma. I i bolo kɛ niimaya banbali la, Ala n'i kilila min kanma, i na seleya ɲuma dila waate min nɔ sele siyama ɲakɔlɔ.

¹³ Ǹ'i jamalila Ala ɲakɔlɔ min yi niimaya dila fen bɛ ma, ani Masa Tɔɔmasenin Isa ɲakɔlɔ min na seleya ɲuma dila Ponsi Pilati ɲakɔlɔ:

¹⁴ ǹ ko, i yi jamali min labato sɛnɛyali ni jalakibaliya boloma, haan fɔɔ mɔ Tii Masa Tɔɔmasenin Isa la vɛ nkɛnɛmayala

¹⁵ Ala bolo aa waate latɛɛnin nɔ, Ala min yi Seetii le, ani Tanulitii, ani masalu ya Masa, ani tiilu ta Tii.

¹⁶ Ale kelenpesa le Masa sabali le, min makɛya nɔɔlɔ walanin haan fɔɔ mɔɔ tɛ se i madonna a la. Mɔɔ mɔɔ ɲa ma la ba a kan bene, ado mɔɔ tɛ se a yena. Buɲali ni seetiiya y'a yɛ habadan. Amiina.

¹⁷ Dunuɲa nafololu vɛ kɛla mɔɔ minu bolo, i yi wolu lali ko ai kà ai fannɔbuɲa. Ai do kà ai jei sii nafolo bantalu la, mafɔ Ala min yi fen bɛ dila mɔ ma bɛlɛbɛlɛ kɛ ka bɛn mɔ ladiyako ma.

¹⁸ A fɔ ai yɛ ko ai yi koɲumalu kɛ, ka nafolotiiya kɛ koɲumakɛko lɔ, ani k'ai bolo fɔlin dɔlu sɔko lɔ.

¹⁹ Wo boloɲa ma, ai kɛtɔ nafolo ladalola ai jɛlɛ yɛ, ai yi se k'ai bolomala min ma sinin, fɔsa ai bolo yi kɛ niimaya bɛlɛbɛlɛ la.

²⁰ Ile Timote, ko minu kalifanin i la, i yi wolu ladalo kobɛn. I i jɛlɛ matanga kuma fuunnu ma minu ni Ala ya siya bɛnnin tɛ i ɲɔɔ ma, ani sɔsɔyali kolon, mɔɔ dɔlu y'a fɔla min ma filibandeya boloma ko lɔnni.

²¹ Mɔɔ dɔlu n'ai jɛlɛ kɛla lɔnnila ba le ka bɔ limaniya siya kɔkan. Ala ya nɛɛma yi kɛ ài yɛ.