1 Timote 5 - Ala Ya Salatikan Kula Kitabu

Limaniyamɔɔlu minaɲa

¹ I kà kɛmɔba makuma, mafɔ i y'a lali iwo i fa. I yi wo suu kɛ kavelennu la iwo i dɔɔkɛlu,

² ani mosokɔlɔbalu la iwo i banu, ani singbililu la iwo i dɔɔmosolu, sɛnɛyali suu bɛ boloma.

³ Kɛsamoso minu kelen vɛ to bɛlɛbɛlɛ le, i yi wolu mina buɲali boloma.

⁴ Kɛɛ ni dennu ka kɛ kɛsamoso min bolo, niwotɛ mamanilu, fɔ den wolu yi Alaɲasiyanɲɛ jiyaɲa lɔn kunfɔlɔ le ka bɛn aiya demayalu minaɲa ma. Ai banu na min bɛ kɛla ai yɛ, ailu yi wo ɲɔɔzii kɛ, kamasɔlɔn wo le diyanin Ala yɛ.

⁵ Kɛsamoso min kelenpesa tonin, wo jei siinin Ala le la. A do yi Ala madiyala ka Ala dali su ni tele.

⁶ Kɛɛ kɛsamoso min y'a jɛlɛ diyabɔla, wo vɛ sa hali ni a ɲɛnɛma ka kɛ.

⁷ I y'ai jamali ko minu la, fɔsa ai jalakibali yi to.

⁸ Ni mɔɔ min m'i lɔja a balamɔɔlu lasonko ma, ani a jɛlɛkanu demaya bɛlɛbɛlɛ le, wo vɛ kɛla, wo tii ma v'i ban limaniya lɔ, ado mɔɔ suu wo kɛwonyanin vɛ ka timin limaniyabali la.

⁹ I vɛ kɛla kɛsamosolu tɔɔ sɛvɛla ka bɛn ai madɛmɛnko ma, i kà a dɔ tɔɔ sɛvɛ fɔ min si vɛ sanji biwɔɔlɔ (60) bɔ, ani a tɛɛ v'i sii kɛ́ kelen ne kun dein.

¹⁰ A mangutu yi lɔn aa koɲumakɛko lɔ, ko a na a dennu lasonna kobɛn, ka lonalu lɔmina kobɛn, ka mumininnu madɛmɛn fanmajii boloma, ka mɔɔ tɔlɔyaninnu makolu laɲia, ani k'a jɛlɛ di koɲuma suu bɛ dɔ kɛko lɔ.

¹¹ Kɛɛ i man kan ka kɛsamoso singbilimandalu tɔɔ sɛvɛ, kamasɔlɔn ni kɛ́ lɔɔ ka gba ai la, wo y'ai masamana fuluko le ma. Ai do tɛnala gbalala Masa Tɔɔmasenin ya ko le butu.

¹² Wo vɛ kɛla, ai kɛtɔ kolatɔn lanala ai jɛlɛ ma ka bɛn aiya lahedi kunfɔlɔ tiɲako ma.

¹³ K'a dɔ la wo kɔkan, ai yi deinne baalekɛbaliya la, ai vɛ timintiminna luu ni luulu wotɛ. Baalekɛbaliyako tɛ dein, kɛɛ ai yi kɛle tɔɔfɔlikɛbalu le fana, ani mɔɔ minu y'ai da bilala dɔlu ya kolu lɔ, ka kolu fɔ minu man kan ka fɔ.

¹⁴ Wo le y'a ma, a bɛnyine ǹ ɲana kɛsamoso singbilimandalu yi taa kɛ́ la, ka dennu sɔlɔn, ani k'ai jando aiya bonnakolu lɔ, alako mɔ juulu kana mɔ mafin dailu sɔlɔn.

¹⁵ Kamasɔlɔn kɛsamoso dɔlu vɛ ban limaniya siya bilala ka bila Soitana kɔ.

¹⁶ Kɛɛ ni kɛsamoso dɔlu ka kɛ limaniyamoso dɔ ya demaya tɛma, fɔ wo tii i jando ai lɔ. Wo doni kà la limaniyajama kun, fɔsa a yi se ka kɛsamosolu madɛmɛn minu kelenpesa vɛ to.

¹⁷ Ɲamɔɔ minu yi kuntiiya kɛla kobɛn, wolu ka kan ka buɲalifen siiyama fila le sɔlɔn, minu yi kawanili ani kalan kɛla bɛlɛbɛlɛ le.

¹⁸ A sɛvɛnin tan ne kitabu kɔnɔ, ko: «I kà nisi da sili, a vɛ kɛla sɛnɛfensi lɔdɔnna.» A sɛvɛnin kɔtunun, ko: «Baaleden ka kan k'a sala sɔlɔn.»

¹⁹ Ni mɔɔ dɔ ka limaniyajama ɲamɔɔ dɔ jalaki ko dɔ la, i k'i tolomalɔ wo la ni mɔɔ fila niwotɛ mɔɔ sawa ma kɛ wo sele le.

²⁰ Ɲamɔɔlu koni minu vɛ tola julumbu tala, i yi wolu makuma jama ɲana, fɔsa mɔɔ tɔ bɛ yi siyan, ai kana wo ɲɔɔzii kɛ.

²¹ Ǹ'i jamalila Ala ni Masa Tɔɔmasenin Isa ɲakɔlɔ, ani aa mɛlɛka taninnu, ǹ ko, i yi ko minu latelen. I kà dɔ fisa a dɔ le, i kà mɔɔ lɔtɔmɔn.

²² I k'i lateleja i bololako lɔ mɔɔ kɔkan k'a bila Ala ya baale la. I do fɛ kà kɛ dɔlu ya julumbukolu la. I josokun sɛnɛyanin yi to.

²³ I kà to ji gbaanzan minna, mafɔ i yi gbɛ dɔɔni min ka bɛn iya kɔnɔdimin ma, ani iya jangalo mɛsɛnmɛsɛnnilu ma.

²⁴ Mɔɔ dɔlu ya julumbulu lankɛnɛmayayine jani kiti yi tɛɛ. Kɛɛ a dɔlu ta kɛtɔ lɔnna kɔ le fɛ.

²⁵ Wo boloɲa kelen ma, mɔɔ dɔlu kɛko ɲumalu lankɛnɛmayayine, hali ni a minu la ma nkɛnɛmaya, wolu tɛ se tola doon nɔ.