1 Timote 4 - Ala Ya Salatikan Kula Kitabu

Faɲafɔ kalanmɔɔlu

¹ Nii Sɛnɛyanin v'a lagbɛ ko dunuɲa laban waate, mɔɔ dɔlu kɛtɔ limaniya siya bilala, ka bila mɔɔlafilibalu kɔ minu yi aiya kalan sɔlɔnna jinalu la.

² Ai do la kɛtɔ filila wunafalilu ya filangafoya bolo, minu josokun ma vɛ kɛ tindilin iwo a mabulanin vɛ nɛɛ gbanin bolo.

³ Kalanmɔɔ wolu le yi fuluko dansiila, ani ka dɔnnifen suu dɔlu kɛ tanama fen ne, k'a talan wolu ladannin Ala bolo fɔsa limaniyamɔɔ minu ka tuɲa lɔn, wolu y'a dɔn ka balika bɔ a yɛ.

⁴ Ala ya dannifen bɛ le ɲumayanin, ado mɔɔ man kan k'i ban wo suu suu lɔ, ni a k'a dɔn balikabɔ boloma,

⁵ kamasɔlɔn a la vɛ sɛnɛya Ala kumakan ni Aladali sabu la.

Isa ya bɔiden ɲuma

⁶ Ni i ka ko minu lase mɔ badenmalu ma, i kɛtɔ kɛla Masa Tɔɔmasenin Isa ya bɔiden ɲuma le le, k'a jiya ko i balonin limaniya kuma ni kalan bɛlɛlu le la, i bilanin minu kɔ.

⁷ I fɛ kà kɛ faɲafɔ taliku fɔko la ani tali fuunnu, minu ni Ala ya siya bɛnnin tɛ i ɲɔɔ ma, mafɔ i i jɛlɛ makolo ka bɛn Alaɲasiyanɲɛ ma.

⁸ K'i fali makolo, wo yi nala nafa dɔ le le. Kɛɛ Alaɲasiyanɲɛ yi nala nafa le le boloɲa bɛ ma, kamasɔlɔn a yi mɔɔ madɛmɛnna iya dunuɲalɔtɛɛ le lɔ ani ka balayi lase i ma kiyama.

⁹ Kuma min yi tuɲa le le, bɛ ka kan ka diɲa min ma.

¹⁰ Wo le y'a ma, m'i mɔ lɔjala ka baale kɛ, kamasɔlɔn mɔ jei siinin Ɲɛnɛmayatii Ala le la, min yi adamaden bɛ Lakisiba le, limaniyamɔɔlu bɛlɛbɛlɛ.

¹¹ I yi jamali minu di, ka mɔɔlu kalan ai la.

¹² I kà diɲa mɔɔ mɔɔ yi jɔ i ma ka bɛn iya fɔningeya ma, mafɔ i yi kɛ misali le limaniyamɔɔlu yɛ i kumaɲa lɔ, ani i kokɛɲa, ani iya kanundeya, ani iya limaniya, ani iya sɛnɛya.

¹³ I yi to kitabulu kalanna jama yɛ k'ai kawani ani ka to ai kalanna haan fɔɔ m̀'ɛ nala lon min na.

¹⁴ I kà jɔ Ala ya senko ma min dinin i ma kelayakuma fɛ, limaniyajama ɲamɔɔlu n'ai bolo lala i kɔkan waate min nɔ.

¹⁵ I i lɔja ka ko minu bɛ kɛ, k'i jɛlɛ di baale wo ma kosɛvɛ, fɔsa bɛ y'a ye ko i yi taala ɲa le fɛ.

¹⁶ I i jɛlɛ lakɔlɔsi, ani iya kalan. I i bolo kɛ ko minu la, kamasɔlɔn ni i ka wolu kɛ, i kɛtɔ i jɛlɛ lakisila ani i lamɛnbalu.