1 Timote 3 - Ala Ya Salatikan Kula Kitabu

Limaniyajama kunmafɛlɛnbalu

¹ Kuma min yi tuɲa le le ko, ni mɔɔ dɔ y'a fɛ ka kɛ limaniyajama kunmafɛlɛnba le, wo tii yi baale ɲuma le kɔ wo le.

² Wo ma, fɔ limaniyajama kunmafɛlɛnba yi kɛ mɔɔ jalakibali le le, ani moso kelen tii, ani jɛlɛlɔminamɔɔ min k'a dan lɔn kolu lɔ, ani mɔɔ sɔvɛ, ani jetii ɲuma, a do yi se mɔɔlu kalanna.

³ A do kà kɛ gbɛtɔ le, niwotɛ mɔɔ faiyanin, mafɔ mɔɔ sɔniyanin. A kà kɛ sɔsɔyalikɛba le, niwotɛ wɔliko nata yi mɔɔ min na.

⁴ Fɔ wo tii yi se aa bonnakolu ɲabɔla kobɛn, k'a dennu makolo mɔɔsɔvɛya suu bɛ boloma.

⁵ Kamasɔlɔn ni mɔɔ min ma se a jɛlɛkanu ya bonnakolu ɲabɔla kobɛn, wo tii yi se a jandola Ala ya limaniyajama lɔ di?

⁶ A kà kɛ mɔɔ tubenin kula le, fɔsa a kana a fannɔbuɲa ka Soitana ya kolatɔn ɲɔɔzii sɔlɔn.

⁷ Wo bɛ kɔ, mangutu ɲuma yi kɛ a kɔ mɔɔlu bolo, hali minu fɛ tɛ limaniyajama la, alako a kana bila maloya lɔ ka kɛlɛ Soitana ya sɔɔ la.

Limaniyajama makoɲabɔbalu

⁸ Wo boloɲa kelen ma, limaniyajama makoɲabɔbalu yi kɛ mɔɔ sɔvɛ le. Ai do kà kɛ wunafalilu le, niwotɛ gbɛtɔlu, niwotɛ wɔliko nata yi mɔɔ minu la.

⁹ Gbono ko min lankɛnɛmayanin ka bɛn limaniya ma, ai y'ai bolo kɛ wo la ai joso sɛnɛyanin ne.

¹⁰ Kɛɛ fɔ ài y'ai lakɔlɔsi bene. Wo kɔ, ài y'ai bila makoɲabɔ baale wo la, ni ai ka kɛ jalakibali le.

¹¹ Wo boloɲa kelen ma, ai mosolu yi kɛ mɔɔ sɔvɛlu le. Ai kà kɛ tɔɔtiɲabalu le, mafɔ jɛlɛlɔminamɔɔlu minu yi lanande le ko bɛ lɔ.

¹² Fɔ limaniyajama makoɲabɔbalu yi kɛ moso kelen tii le le, minu yi se ai jandola ai dennu ni aiya bonnakolu lɔ kobɛn.

¹³ Kamasɔlɔn mɔɔ minu vɛ aiya makoɲabɔ baale kɛla kobɛn, wolu kɛtɔ lɔya ɲuma sɔlɔnna ai jɛlɛ yɛ, ani lanaya bɛlɛ ka bɛn aiya limaniya ma Masa Tɔɔmasenin Isa ma.

Ala ya gbonoko

¹⁴ Ǹ jii y'a ma le k'a fɔ ko ǹ kɛtɔ nala i fɛlɔ jona. Wo bɛ n'a kɛ, ǹ'i ko minu sɛvɛla i ma yi ne, fɔsa

¹⁵ ni ko ka m̀ matamala, i y'a lɔn Ala ya bon dongolu ka kan ka taama teme, minu kɛnin Ɲɛnɛmayatii Ala ya limaniyajama le, tuɲa jusiinin min kɔkan k'a bama.

¹⁶ Bɛ k'a lɔn ne Alaɲasiyanɲɛ yi gbonoko ba le le, ko: A la ka nkɛnɛmaya mɔɔnivin falikolo lɔ, Nii Sɛnɛyanin ka aa telenmandeya jiya, ado mɛlɛkalu ka a ye. Aa ko la ka se siboloma gbɛlɛ mɔɔlu tɛma, ani mɔɔlu ka limaniya a ma dunuɲa. A do la ka jɛlɛ Ala bolo ka don nɔɔlɔ lɔ.