1 Timote 2 - Ala Ya Salatikan Kula Kitabu

Ài yi Ala dali mɔ bɛ yɛ

¹ Ǹ'i ko kunfɔlɔ min fɔla k'a magbeleya, wo le ài yi Ala madiya, ka Ala dali i ɲɔɔ yɛ, ani ka balika bɔ a yɛ mɔɔ bɛ ya ko lɔ.

² Ài m'i Ala dali masakɛlu ni jamana ɲamɔɔlu bɛ yɛ, fɔsa m'i maa dunuɲalɔtɛɛ kɛ josolajii ni hɛlɛ lɔ, Alaɲasiyanɲɛ ni mɔɔsɔvɛya lɔ.

³ Wo le bɛnnin, ado wo le diyanin mɔ Lakisiba Ala yɛ,

⁴ min y'a fɛ mɔɔ bɛ yi kisi ka tuɲa lɔnni sɔlɔn.

⁵ Kamasɔlɔn Ala kelenpesa le yi je, ado mɔɔwotɛlɔbɛnba kelen ne yi Ala ni adamadennu wotɛ. Wo le Masa Tɔɔmasenin Isa le, ale adamaden

⁶ min n'a jɛlɛ bɔla salaka le ka bɛn mɔɔ bɛ kunmakako ma, min seleya dinin a waate bɛlɛ lɔ.

⁷ Wo le n'a kɛla, Ala na m̀ bilala aa keladenya la ka ǹ kɛ kawanilikɛba le, ko ǹ'i siboloma gbɛlɛ mɔɔlu kalan ka bɛn limaniya ni tuɲandeya ma. Ǹ'i tuɲa le fɔla, ǹ tɛ faɲa fɔla.

⁸ Wo lɔ saa, ǹ'a fɛ kɛ́lu yi kɛ Ala dalila dingila bɛ lɔ, k'ai bolo sɛnɛyanin sii Ala yɛ. Mɔnɛya ni sɔsɔyali kà talan ai tɛma.

⁹ Wo boloɲa kelen ma, mosolu y'ai masili boloɲa bɛlɛ ma, jɛlɛlɔmina ni buɲali boloma. Ai do kà ai jɛlɛ lakeinya kundan daagbɛlɛn ne, k'ai masili sanu ni lulu ni faani daagbɛlɛnnu le,

¹⁰ mafɔ ai kɛko ɲumalu, iwo a bɛnnin teme mosolu ma minu y'a fɔla ai jɛlɛ ma ko Alaɲasiyanɲɛmɔɔ.

¹¹ Mosolu ka kan k'ai tolomalɔ kalan na mafali ni fanmajii bɛlɛ le boloma.

¹² Ǹ tɛ diɲa moso yi kɛ́ kalan, niwotɛ ka kuntiiya kɛ kɛ́ kunna. A do yi jeden.

¹³ Kamasɔlɔn Mema Adama le la ka dan kunfɔlɔ le, wo kɔ, Mama Hawa.

¹⁴ Ado Soitana ma Mema Adama manɛɛ, kɛɛ a ka moso le manɛɛ, wo do ka kɛ seliya tiɲaba le.

¹⁵ Wo bɛ n'a kɛ, moso kɛtɔ kisila ka bɛn densɔlɔnko le ma, ni a ka to taamana limaniya, ni kanundeya, ni sɛnɛyali, ani jɛlɛlɔmina boloma.