1 Timote 1 - Ala Ya Salatikan Kula Kitabu

¹ Ǹe Pɔli le yi lɛtɛlɛ min sɛvɛla, ǹe min kɛnin Masa Tɔɔmasenin Isa ya keladen ne ka bɛn mɔ Lakisiba Ala ya jamali ma, ani Masa Tɔɔmasenin Isa min yi mɔ jeisii le.

² Ǹ'i lɛtɛlɛ min lataala ile Timote le ma, min yi ǹ denkɛ bɛlɛbɛlɛ le limaniya lɔ. Mɔ Fa Ala ni mɔ Tii Masa Tɔɔmasenin Isa ya nɛɛma yi kɛ i yɛ, ka hena i la, ani k'i josolajii.

Faɲafɔ kalanmɔɔlu

³ Iwo ǹ n'a fɔla i yɛ k'a magbeleya teme ǹ taa waate Masaduwani koovi lɔ, fɔ i yi to Ɛfɛsi so kɔnɔ fɔsa i yi mɔɔ dɔlu jamali k'a fɔ ko ai yi faɲafɔ kalanko dabila.

⁴ Ai do kà ai jɛlɛ bila faɲafɔ taliku fɔko lɔ, ani jilijaa ɲafɔko le minu tɛ banna. Ko suu wolu le yi nala sɔsɔyali le, ai do tɛ Ala ya baale lataala ɲafɛ min jusiinin limaniya kɔkan.

⁵ Maa jamali kun ne kanundeya le min yi bɔla josolɔgbɛnin nɔ, ani jososɛnɛyanin, ani limaniya bɛlɛbɛlɛ.

⁶ Mɔɔ dɔlu vɛ ai kɔdon ko wolu la, k'ai jɛlɛ lafili kuma kundannu le.

⁷ Ai do y'a fɛ k'ai jɛlɛ kɛ seliya kalanmɔɔlu le, k'a talan koɲaye foi tɛ ai bolo ka bɛn ai kumakan ma, kumatɛ ai yi ko minu magbeleyala.

⁸ Mɔ k'a lɔn ne ko seliya bɛnnin, ni a la ka baale a ɲa ma.

⁹ Mɔ v'a ɲaye kɔtunun ko seliya la ma jii telenmandelu ya ko lɔ, mafɔ seliya tiɲabalu, ani mɔɔ mulutunilu, ani Alaɲasiyanɲɛbalilu, ani julumbutɔlu, ani Alabuɲabalilu, ani mɔɔ minu yi Ala jɛvɛla, ani mɔɔfaabalu, ani mɔɔ minu y'ai fanu ni ai banu faala,

¹⁰ ani kanukɛbalu, ani kɛ́ minu yi lala i ɲɔɔ fɛ, ani jɔn felebalu, ani faɲafɔbalu, ani faɲafɔ selelu, ani ko minu bɛ yi nala sɔsɔyali le kalan bɛlɛ kanma.

¹¹ Kalan min bɛnnin Samakan Kein ne ma, min yi Tanulitii Ala nɔɔlɔ jiyala, a na min kalifala ǹ na.

Pɔli ya balikabɔ Masa Tɔɔmasenin Isa yɛ

¹² Ǹ'i balika bɔla mɔ Tii Masa Tɔɔmasenin Isa yɛ, ale min na ǹ sɛmɛdonna, kamasɔlɔn a vɛ ǹ jate lanande le ka m̀ bila aa bɔidenya la.

¹³ Waate lɔ, ǹ tɛɛ a jɛvɛla ka aa mɔɔlu jangata kafaya boloma. Kɛɛ wo bɛ n'a kɛ, a na henandeya jiyala ǹ na, kamasɔlɔn ǹ tɛɛ ko suu wolu kɛla kolɔnbaliya ni limaniyabaliya le lɔ.

¹⁴ Mɔ Tii na ǹ sɔla aa nɛɛma sɔ bɛlɛbɛlɛ kɛ, ka limaniya ni kanundeya di m̀ ma minu yi sɔlɔnna Masa Tɔɔmasenin Isa ya kafonɲɔɔya lɔ.

¹⁵ Kuma min yi tuɲa le le, bɛ ka kan k'a bolo sii min kɔlɔ feu: Masa Tɔɔmasenin Isa nanin dunuɲa kɔnɔ julumbutɔlu lakisiko le lɔ, ado ǹ taanin kɛla wolu bɛ lɔ mɔɔ kɛwon ne le.

¹⁶ Kɛɛ Ala na henala ǹ na dailu min ne la, fɔsa Masa Tɔɔmasenin Isa tɛɛ aa sawali dafanin jiya julumbutɔlu bɛ lɔ mɔɔ kɛwon na. A do na ǹ kɛla misali le mɔɔlu yɛ, minu kɛtɔ limaniyala a ma ka niimaya banbali sɔlɔn.

¹⁷ Mɔ Tii, Masa sabali, Masa yenbali, ale min yi Ala kelenpesa le, buɲali ni magbiliyali y'a yɛ waate bɛ ani habadan. Amiina.

¹⁸ Ǹ denkɛ Timote, ǹ'i jamali min kalifala i la, k'a la kelayakumalu kɔkan minu fɔnin ka bɛn i ma kɔlɔman ne. Kuma wolu yi kɛ kɛlɛkɛfen ne, i yi se kɛlɛ ɲuma kɛla min ne,

¹⁹ i bolo kɛnin vɛ limaniya la, k'i joso sɛnɛyanin to. A dɔlu v'i ban wo ma k'aiya limaniya tiɲa tɛtɛ,

²⁰ iwo Himene ni Alɛzandele kɛnin teme, ǹ na minu labilala Soitana yɛ, fɔsa ai yi falan kuma yon fɔla Ala ma.