1 Tɛsalonikakalu 5 - Ala Ya Salatikan Kula Kitabu

Mɔ lɔbɛnnin yi to ka bɛn mɔ Tii Isa nalon ma

¹ Mɔ badenmalu, dailu t'a la k'a fɔ ko m'i ko dɔ sɛvɛ ài ma ka bɛn waatelu ni ko natɔlu ma.

² Kamasɔlɔn àilu gbu k'a lɔn ne mɔ Tii nalon kɛtɔle iwo son yi nala teme su lɔ.

³ Mɔɔlu vɛ kɛla a fɔla waate min nɔ ko kolu vɛ bɛn ani tɔlɔya tɛ je butu, wo waate kelen ne, masuwako kɛtɔ balala ai lɔ, iwo tinkɔnɔdimin yi balala kɔnɔma lɔ teme. Wo do tɛnala polola ai ma feu!

⁴ Kɛɛ m̀ badenmalu, ài tɛ divi lɔ k'a fɔ ko wo lon kɛtɔ balala ài lɔ iwo son.

⁵ Ài do yi taamana kɛnɛya le lɔ, k'ài kɛ telelɔmɔɔ le. Mɔ tɛ sulɔmɔɔ le, kumatɛ divilɔmɔɔ ma.

⁶ Wo le y'a ma, mɔ kà sunɔɔ iwo dɔlu y'a kɛla teme. Ài m'i to mɔ ɲana, ka mɔ jɛlɛ lɔmina.

⁷ Kamasɔlɔn sunɔɔkɛbalu yi sunɔɔla su le lɔ. Gbɛtɔlu fana yi lala gbɛ lɔ su le lɔ.

⁸ Kɛɛ komi m'i telelɔmɔɔ le le, wo lɔ, ài m'i mɔ jɛlɛ lɔmina. Ài m'i mɔ jɛlɛ lɔbɛn, ka limaniya ni kanundeya kɛ iwo sisimakalanfen, ani ka kisiko kɛ mɔ jeisii le, iwo nɛɛ fula.

⁹ Kamasɔlɔn Ala ma aa mɔnɛya latɛɛ mɔ ma, mafɔ ka kisili sɔlɔn mɔ Tii Masa Tɔɔmasenin Isa fɛ,

¹⁰ min na sala maa ko lɔ, fɔsa ni a nalon ka mɔ talan mɔ nii la, niwotɛ ni wo ka mɔ sanin talan, m'i niimaya kɛ a fɛ.

¹¹ Wo lɔ, ài yi to ài ɲɔɔ sɛmɛdonna k'i ɲɔɔ lasawati, iwo ài y'a kɛla teme yi ne.

Lailikan ni folikan labannu

¹² Mɔ badenmalu, m̀'ài madiyala ko ài yi mɔɔlu magbiliya minu yi baale gbɛlɛn kɛla ài tɛma, ka kuntiiya kɛ ài kunna, k'ài lali ani k'ài kalan mɔ Tii ya ko la.

¹³ Ài yi wolu magbiliya bɛlɛbɛlɛ kɛ kanundeya boloma ka bɛn aiya baale ma. Josolajii yi to ài wotɛ.

¹⁴ Mɔ badenmalu, m'a fɔla ài yɛ k'a magbeleya ko ài yi baalekɛbalilu lali, ka mɔɔ jeitɛɛninnu sɛmɛdon, ani ka fangandannu madɛmɛn. Ài yi mɔɔ minu bɛ mina sawali boloma.

¹⁵ Ài y'alama ài dɔ kà koyon julu sala koyon na, kɛɛ ài y'ài lɔja kudein ka koɲuma kɛ i ɲɔɔ yɛ, ani mɔɔ bɛ yɛ.

¹⁶ Ài yi sawa waate bɛ.

¹⁷ Ài kà Aladali boloka.

¹⁸ Ài yi balika bɔ Ala yɛ ko bɛ lɔ, kamasɔlɔn a sawo le wo le ài yɛ Masa Tɔɔmasenin Isa ya kafonɲɔɔya lɔ.

¹⁹ Ài kà Nii Sɛnɛyanin ya baale lɔsa.

²⁰ Ài kà kelalu ya kumalu lafeya.

²¹ Ài do yi ko bɛ lakɔlɔsi k'ài bolo kɛ a ɲuma la.

²² Ài y'ài mataa koyon suu bɛ la.

²³ Ala gbu min yi josolajii dila, wo y'ài kɛ mɔɔ sɛnɛyanin ne boloɲa bɛ ma. Ala yi ài nunakili ni ài josokun ni ài falikolo bɛ matanga, fɔsa ài yi kɛ jalakibali le mɔ Tii Masa Tɔɔmasenin Isa nalon.

²⁴ Ala min n'ài kilila, lanande le a le. A do kɛtɔ wo le kɛla jɔ!

²⁵ Mɔ badenmalu, ài yi Ala dali mɔ yɛ.

²⁶ Ài yi mɔ badenmalu fo kanundeya foli sɛnɛyanin ne.

²⁷ Ǹ'a fɔla ài yɛ k'a magbeleya mɔ Tii Isa tɔɔ lɔ ko ài yi lɛtɛlɛ min kalan mɔ badenmalu bɛ yɛ.

²⁸ Mɔ Tii Masa Tɔɔmasenin Isa ya nɛɛma yi kɛ ài yɛ.