1 Tɛsalonikakalu 4 - Ala Ya Salatikan Kula Kitabu

Taamaɲa min diyanin Ala yɛ

¹ Mɔ badenmalu, ka maa kuma laban, mɔ vɛ ban ài kalanna k'a fɔ ko ài ka kan ka taama teme, fɔsa àiya ko yi diya Ala yɛ. Tuɲa le, ài yi wo le la yi ne. Kɛɛ m'ài madiyala mɔ Tii Isa tɔɔ lɔ k'a magbeleya ko ài y'ài lɔja k'a dɔ la wo kɔkan.

² Kamasɔlɔn ài k'a lɔn mɔ na jamali minu dila ài ma mɔ Tii Isa sabu la.

³ Ala a fɛ le ài yi kɛ mɔɔ sɛnɛyanin ne k'ài matanga kanukɛko ma feu.

⁴ Ài kelenkelenna bɛ y'ài falikolo minaɲa lɔn sɛnɛyali ni buɲali boloma.

⁵ Ài do kà bila ài falikolo niikanukolu kɔ, iwo Alalɔnbalilu y'a kɛla teme.

⁶ Mɔɔ mɔɔ kà hakɛ ta niwotɛ ka janva ladon a badenma ma ko minu lɔ. Kamasɔlɔn mɔɔ minu yi ko suu wo kɛla, mɔ Tii kɛtɔ wo hakɛ bɔla mɔɔ wolu lɔ, iwo mɔ n'a fɔla ài yɛ teme kɔlɔkɔlɔ le k'a magbeleya.

⁷ Kamasɔlɔn Ala ma mɔ kili kokɔsɔninnu kanma, mafɔ sɛnɛyali.

⁸ Wo le y'a ma, ni mɔɔ mɔɔ si k'i ban jamali min ma, wo tii m'i ban adamaden nɔ, mafɔ Ala min y'a Nii Sɛnɛyanin dila ài ma.

⁹ Dailu tɛ a la butu k'a fɔ ko mɔɔ dɔ yi sɛvɛ lataa ài ma ka bɛn ɲɔɔkanuko ma, kamasɔlɔn Ala vɛ ài kalan ka bɛn ɲɔɔkanuko ma.

¹⁰ Tuɲa le, ài yi wo le kɛla ài badenmalu bɛ yɛ Masaduwani koovi fan bɛ lɔ. Kɛɛ m'a fɔla ài yɛ k'a magbeleya ko ài y'a dɔ la kanundeya wo kɔkan kudein.

¹¹ Ài y'ài lɔja k'àiya dunuɲalɔtɛɛ kɛ josolajii boloma, ka gbala ài jɛlɛkanu kunkolu le, ani k'ài bolo bila baale nafata dɔ lɔ, iwo mɔ n'ài jamalila teme.

¹² Wo vɛ kɛla, ài taamaɲa yi bɛnne limaniyabalilu ɲakɔlɔ, ài do tɛnala ài bolomalala mɔɔ mɔɔ si ma.

Mɔ Tii Isa nalon

¹³ Mɔ badenmalu, mɔ t'a fɛ le ài yi to divi lɔ ka bɛn mɔɔ saninnu ya ko ma, alako ài josoma kana kasi iwo jeisiibalilu.

¹⁴ Mɔ limaniyanin teme k'a fɔ ko Isa na sala k'i wuli ka bɔ saya lɔ, mɔ limaniyanin ten ne k'a fɔ ko Isa malimaniyamɔɔ minu sanin, Ala kɛtɔ wolu fana lawulila k'ai lana a fɛ.

¹⁵ M'i kuma min ɲafɔla ài yɛ yi ne, mɔ na wo sɔlɔnna mɔ Tii le la, k'a fɔ ko ǹu minu vɛ tola mɔ nii la ka sii mɔ Tii nalon na, mɔ tɛnala taala mɔɔ saninnu ɲa a labɛnya lɔ.

¹⁶ Kamasɔlɔn wo lon na, jamalikan ba dɔ kɛtɔ bɔla, ani mɛlɛka kuntiiba kan, ani Ala ya buulufɛkan, ado mɔ Tii Isa gbu kɛtɔ jiila ka bɔ sangbolo lɔ. Wo vɛ kɛla, mɔɔ minu sanin Masa Tɔɔmasenin ya kafonɲɔɔya lɔ, wolu le kɛtɔ ai wulila kunfɔlɔ le.

¹⁷ Wo kɔ, ǹu minu vɛ kɛla mɔ nii la wo waate lɔ, mɔ ni ailu la kɛtɔ jɛlɛla kelen ne sanbiliyalu lɔ, ka taa mɔ Tii Isa labɛn sanma. Wo vɛ kɛla, mɔ bɛ kɛtɔ tola mɔ Tii le fɛ kudein.

¹⁸ Ài ɲɔɔ sɛmɛdon kuma minu le.