1 Tɛsalonikakalu 3 - Ala Ya Salatikan Kula Kitabu

¹ Mɔ k'a ye mingɛ ko mɔ tɛ se ài yenlɔɔ minala butu mɔ ma, mɔ k'a latɛɛ ko ǹu mɔɔ dana yi to Atɛn so kɔnɔ.

² Wo lɔ, mɔ ka mɔ badenma Timote lataa ài ma, ale min yi mɔ baalekɛɲɔɔ le Ala ya baale lɔ Masa Tɔɔmasenin ya Samakan Kein lasenko lɔ, fɔsa a tɛɛ ài sɛmɛdon ani k'àiya limaniya lasawati,

³ alako ài suu suu hangili kana ɲaami ka bɛn waate min jangatalu ma. Kamasɔlɔn àilu gbu k'a lɔn ne, wo la vɛ tɛɛ mɔ ma Ala bolo.

⁴ Wo le k'a kɛ, mɔ tɛɛ ài fɛlɔ waate min nɔ, mɔ tɛɛ ài lasovila kudein ko jangata kɛtɔ mɔ masɔlɔnna, ado àilu gbu k'a lɔn kolu timinnin teme.

⁵ Wo le y'a ma, ǹ tɛɛ tɛ se a minala m̀ ma mingɛ, ǹ na Timote lataala ài ma k'a lɔn àiya limaniya yi teme. Kamasɔlɔn ǹ tɛɛ siyanna k'a fɔ ko Soitana vɛ ài manɛɛ boloɲa dɔ ma, ka maa baale kɛ kofuun ne.

⁶ Kɛɛ tandainɔ, Timote vɛ na ka bɔ ài fɛlɔ, ani a vɛ samakan ɲuma fɔ mɔ yɛ ka bɛn àiya limaniya ni àiya kanundeya ma. A do vɛɛ ko ài hangili toyine mɔ lɔ kudein sawa boloma, ani mɔ yenlɔɔ y'ài la iwo ài yenlɔɔ yi ǹu gbu la teme.

⁷ Wo le y'a ma, mɔ badenmalu, ka mɔ to maa gbɛlɛgbɛlɛ ni tɔlɔya bɛ lɔ, mɔ josola vɛ jii àiya ko lɔ ka bɛn àiya limaniya ma.

⁸ Tandainɔ, mɔ vɛ niimaya sɔlɔn kɔtunun, kamasɔlɔn ài lɔyine kili mɔ Tii ya kafonɲɔɔya lɔ.

⁹ Àiya ko vɛ mɔ kɔnɔlɔdiya bubale Ala ɲakɔlɔ, haan fɔɔ mɔ m'a lɔn m'i Ala balika bɔ teme.

¹⁰ Su ni tele, m'i Ala dalila kosɛvɛ fɔsa ài m'i ɲɔɔ ye ɲa ni ɲa ka ko dɔlu dafa, ài dɛsɛnin minu la àiya limaniya lɔ.

¹¹ Mɔ Fa Ala ni mɔ Tii Isa yi siya di mɔ ma fɔsa m'i taa bɔ ài ma!

¹² Mɔ Tii y'a dɔ la àiya kanundeya kɔkan, k'àiya kanundeya wala i ɲɔɔ yɛ ani mɔɔ bɛ yɛ, iwo ǹu gbu y'ài kanula teme.

¹³ Mɔ Tii y'ài joso bama fɔsa ài yi kɛ mɔɔ sɛnɛyanin ni jalakibali le mɔ Fa Ala ɲakɔlɔ, mɔ Tii Isa vɛ nala lon min na aa mumininnu bɛ fɛ.