1 Tɛsalonikakalu 2 - Ala Ya Salatikan Kula Kitabu

Pɔli ya baale Tɛsalonika so kɔnɔ

¹ Mɔ badenmalu, àilu gbu k'a lɔn ne ko mɔ nako ài fɛlɔ, wo ma kɛ kofuun ne.

² Ài do k'a lɔn ne mɔ na tɔlɔya ni jɛvɛli masɔlɔnna teme Filipi so kɔnɔ jani mɔ tɛɛ se ài fɛlɔ. Hali mɔɔ siyama tɛɛ v'i wuli mɔ kanma, mɔ Tii Ala na mɔ josolagbeleyala ka aa Samakan Kein lase ài ma.

³ Mɔ do tɛ maa kawanili kɛla ka bɛn mɔɔlafiliko ma, niwotɛ miliya yon ma, niwotɛ mɔɔmajuwayako ma.

⁴ Mafɔ, m'i kuma le la iwo Ala a fɛ m'a kɛ teme, kamasɔlɔn ale le diɲanin mɔ yɛ ka Samakan Kein kalifa mɔ la. Wo le y'a ma, mɔ tɛ mɔ lɔjala ka maa ko diya adamadennu yɛ, mafɔ Ala min yi mɔ josokun lakɔlɔsila.

⁵ Àilu gbu k'a lɔn ne ko mɔ nanin ài ma waate min nɔ, mɔ tɛɛ tɛ ài matɔɔla fuun, niwotɛ ka dalɔdiya kumalu fɔ ài yɛ maa natabaya doonko lɔ. Ala le mɔ sele le.

⁶ Mɔ do tɛɛ tɛ adamadennu ya magbiliyali ɲininna, hali ni a tɛɛ kɛ àilu gbu le niwotɛ mɔɔ suu suu. Komi Masa Tɔɔmasenin ya keladen ne mɔ le, wo lɔ, mɔ tɛɛ sene ka mɔ kunko la ài kun diyanigbeya boloma.

⁷ Kɛɛ do, mɔ sɔniyanin tɛɛ ài tɛma, iwo dematii y'a jandola a dennu lɔ teme.

⁸ Ka bɛn maa kanundeya ba ma ài yɛ, mɔ tɛɛ tɛ a fɛ ka Ala ya Samakan Kein lase ài ma dein, mafɔ mɔ lɔbɛnyine tɛɛ ka hali mɔ jɛlɛkanu nii di àiya ko lɔ, kamasɔlɔn àiya ko tɛɛ vɛ diya mɔ yɛ kosɛvɛ.

⁹ Mɔ badenmalu, ǹ layine a la ài hangili toyine maa baale ni maa sɛyɛ lɔ, mɔ tɛɛ min na su ni tele, alako mɔ kana kɛ doni le ài dɔ kun, mɔ tɛɛ Ala ya Samakan Kein lasena ài ma waate min nɔ.

¹⁰ Àilu gbu le mɔ sele le, ani Ala fana, k'a fɔ ko mɔ tɛɛ àilu limaniyamɔɔlu tɛma waate min nɔ, mɔ tɛɛ taamana sɛnɛya boloma, ani telenmandeya, ani jalakibaliya.

¹¹ Ài do k'a lɔn mɔ tɛɛ ài kelenkelenna bɛ minala iwo fa y'a dennu minala teme.

¹² Mɔ tɛɛ ài lalila, k'ài sɛmɛdon, ani k'a fɔ ài yɛ k'a magbeleya ko ài yi Ala buɲa ài taamaɲa lɔ, ale min y'ài kilila k'ài ladon aa masaya ni aa magbiliyali lɔ.

¹³ M'i balika bɔla Ala yɛ waate bɛ ka bɛn min ne ma, kamasɔlɔn ài na Ala kumakan mɛnna mɔ da mingɛ, ài ma a jate iwo adamaden kumakan dein, mafɔ ài n'ài bolo siila a kɔlɔ iwo a yi teme bɛlɛbɛlɛ kɛ, min yi Ala kumakan ne. Wo le do yi baalela àilu limaniyamɔɔlu josokun nɔ.

¹⁴ Mɔ badenmalu, ài n'ài sumala Ala ya limaniyajamalu le ma Jude koovi lɔ, minu yi Masa Tɔɔmasenin Isa ya kafonɲɔɔya lɔ. Kamasɔlɔn ài na jangata masɔlɔnna àiya jamanamɔɔlu bolo, iwo dɔ wolu na tɔlɔyala Jahudiyalu bolo teme.

¹⁵ Jahudiya wolu le na mɔ Tii Isa faala, ani kelalu, ka ǹu gbu gbɛn aiya jamana kɔnɔ. Ai do yi Ala lagbeyanankolu le kɛla, k'ai lɔ adamaden bɛ ɲa,

¹⁶ kamasɔlɔn ài y'ai lɔjala ka mɔ dansii fɔsa mɔ kana kisiko lase siboloma gbɛlɛ mɔɔlu ma. Wo boloɲa ma, ai y'a dɔ le lala aiya julumbulu kɔkan kudein haan fɔɔ a da yi fa. Kɛɛ a laban nɔ, Ala ya mɔnɛya vɛ ben ai kɔkan.

Pɔli y'a fɛ ka taa bɔ Tɛsalonikakalu ma kɔtunun

¹⁷ Mɔ badenmalu, hali mɔ falannin ka kɛ i ɲɔɔ ma waateni kɔlɔ, kɛɛ mɔ miliya ma bɔ ài kɔ feu! Wo lɔ, mɔ tɛɛ a ɲaɲininna ka na k'ài ye ɲa ni ɲa kɔtunun, kamasɔlɔn ài yenlɔɔ tɛɛ vɛ gba mɔ la kosɛvɛ.

¹⁸ Mɔ tɛɛ a fɛ le ka taa bɔ ài ma. Ǹe Pɔli gbu le n'a latɛɛla siɲa dana le k'a fɔ ko ǹ kɛtɔ taala, kɛɛ do Soitana le na mɔ taako lɔsala.

¹⁹ Mɔ v'i lɔla mɔ Tii Isa ɲakɔlɔ a nalon na, ka bɔ àilu kɔ, mɔ jei siinin jene la ka kɛ maa sawa ni maa ɲalɔkɛnɛya sabu le?

²⁰ Tuɲa le, maa magbiliyali ni maa sawa sabu yi àilu le le.