1 Tɛsalonikakalu 1 - Ala Ya Salatikan Kula Kitabu

¹ Ǹe Pɔli ni Silasi ni Timote le yi lɛtɛlɛ min sɛvɛla k'a lataa limaniyajama ma Tɛsalonika so kɔnɔ, minu yi mɔ Fa Ala ni mɔ Tii Masa Tɔɔmasenin Isa ya kafonɲɔɔya lɔ. Ala ya nɛɛma yi kɛ ài yɛ, k'ài josolajii.

Pɔli ya matɔɔli Tɛsalonikakalu yɛ

² M'i balika bɔla Ala yɛ waate bɛ ài bɛ ya ko lɔ, ka to àiya ko fɔla a yɛ kudein maa Aladalilu lɔ.

³ Mɔ Fa Ala ɲakɔlɔ, mɔ hangili toyine ài kɛkolu lɔ limaniya lɔ, ani àiya baalelu kanundeya lɔ, ani àiya sawali ka bɛn ai jeisiiko ma mɔ Tii Masa Tɔɔmasenin Isa la.

⁴ Mɔ badenmalu, Ala diyananmɔɔlu, mɔ k'a lɔn ne ko ale le n'ài tala k'ài kɛ a jɛlɛkanu mɔɔlu le.

⁵ Kamasɔlɔn mɔ na maa Samakan Kein lasena ài ma mingɛ, wo do ma dan dalɔkuma ma dein, mafɔ a nanin seetiiya le le, ani Nii Sɛnɛyanin ya madɛmɛli, ani lanaya dafanin. Ài do k'a lɔn ne mɔ tɛɛ mɔɔ suu min ne ài tɛma ka bɛn ài nafako ma.

⁶ Ài n'ài sumala mɔ taamaɲa le ma ani mɔ Tii Isa taamaɲa, kamasɔlɔn ài n'ài bolo siila Samakan Kein kɔlɔ sawa bolo le ma, sawa min bɔnin Nii Sɛnɛyanin fɛ, hali ài bannin ka kɛ tɔlɔya siyama masɔlɔnna.

⁷ Wo boloɲa ma, ài vɛ kɛ misali le limaniyamɔɔlu bɛ yɛ, minu siinin Masaduwani ni Akayi koovi lɔ.

⁸ Ài do vɛ kɛ sabu le, mɔ Tii kumakan vɛ jɛzɛn Masaduwani ni Akayi fan bɛ lɔ. Kɛɛ a do ma dan dingila wolu ma dein. Ài limaniyanin Ala ma teme, wo mangan vɛ jɛzɛn fan bɛ lɔ, ado mɔ mako tɛ wo fɔko la butu.

⁹ Kamasɔlɔn mɔɔ wolu gbugbu le yi ko minu dandɛɛli kɛla, ài n'ài bolo siila mɔ kɔlɔ teme, ani ài n'ài kɔdonna joolu la teme ka baale kɛ Ɲɛnɛmayatii Ala yɛ, min kɛnin Ala bɛlɛbɛlɛ le.

¹⁰ Ài do yi Ala Denkɛ makɔnɔna ka bɔ haijɛnɛ, a na min lawulila ka bɔ saya lɔ. Ale Isa le yi mɔ lakisila ka mɔ bɔ Ala ya mɔnɛya natɔ kɔlɔ.