1 Piyɛli 5 - Ala Ya Salatikan Kula Kitabu

Ala ya saa kulu kunmafɛlɛnko

¹ Ǹ'i min ne fɔla ɲamɔɔlu yɛ k'a magbeleya minu y'ài tɛma, ǹe min yi ɲamɔɔ dɔ le iwo àilu, ani Masa Tɔɔmasenin ya tɔlɔyalu sele min fɛ kɛtɔ kɛla magbiliyali la min lankɛnɛmayatɔ,

² ǹ ko, ài y'ài jando Ala ya saa kulu lɔ min kalifanin ài la. Ài y'ai kunmafɛlɛn lɔfɔlin boloma, diyanigbeyako tɛ, iwo Ala a fɛ ài y'a kɛ teme. Ài do kà a kɛ tɔnɔ sɔlɔnko le min mamaloyanin, mafɔ ài y'a kɛ miliya ɲuma kan.

³ Ài k'ài fanga la mɔɔlu kɔkan minu kalifanin ài la, mafɔ ài yi kɛ misali ɲuma le saa kulu yɛ.

⁴ Wo vɛ kɛla, saakunnasii kuntiiba la vɛ nkɛnɛmayala lon min na, ài kɛtɔ masayafula nɔɔlɔnin sɔlɔnna min dalaya tɛnala banna tuun.

⁵ Wo boloɲa kelen ma, àilu fɔningelu y'ài fanmajii kɛmɔbalu yɛ. Ài bɛ i ɲɔɔ madɛmɛn fanmajii boloma, kamasɔlɔn a sɛvɛnin kitabu kɔnɔ, ko: «Ala yi mɔɔ fannɔbalu le kɛlɛla, kɛɛ a yi nɛɛma le dila mɔɔ fanmajiininnu ma.»

⁶ Wo lɔ saa, ài y'ài fanmajii Ala bolo fangama kɔlɔ, fɔsa a ài kɔlɔta a waate bɛlɛ lɔ.

⁷ Ài y'ài haminnankolu bɛ to a ma, kamasɔlɔn a jandonin ài lɔ.

⁸ Ài yi to ài ɲana k'ài hangili sii. Ài juu Soitana kɛyine iwo jala min yi wolondola, a v'a mataamataamana ka mɔɔ ɲinin a dɔnko lɔ.

⁹ Ài y'ài lɔ Soitana ɲa kili limaniya lɔ, kamasɔlɔn ài v'a lɔn ko ài badenma minu jɛzɛnnin dunuɲa fan bɛ lɔ, wolu yi tɔlɔya wo suu bɛ dɔ le masɔlɔnna fana.

¹⁰ Ado ài vɛ banna tɔlɔyala waateni kɔlɔ, Nɛɛmatii Ala min n'ài kilila aa habadan magbiliyali kanma Masa Tɔɔmasenin ya kafonɲɔɔya lɔ, ale gbu le kɛtɔ ài lasiila kula le, ka fanga di ài ma, ani k'ài bama kili.

¹¹ Seetiiya yi ale le yɛ waate bɛ ani habadan! Amiina.

Folikan labannu

¹² Silasi, ǹ'i min jatela m̀ badenma lanande le, wo vɛ m̀ madɛmɛn lɛtɛlɛ kulunni min sɛvɛko lɔ, fɔsa ǹ'a magbeleya ài yɛ ani ka ǹa seleya di ko Ala ya nɛɛma bɛlɛbɛlɛ le min ne, ài bolo kɛnin min na kpekpe.

¹³ Limaniyajama min yi Babilɔn so kɔnɔ, Ala na minu tala iwo àilu, wolu y'ài fola, ani ǹ denkɛ Malɛkɛ fana.

¹⁴ Ài i ɲɔɔ fo kanundeya boloma. Josolajii yi kɛ ài bɛ yɛ, àilu minu yi Masa Tɔɔmasenin ya kafonɲɔɔya lɔ.