1 Piyɛli 4 - Ala Ya Salatikan Kula Kitabu

Limaniyamɔɔlu taamaɲa kula

¹ Komi Masa Tɔɔmasenin na tɔlɔyala a falikolo lɔ, wo lɔ, àilu fana y'ài jɛlɛ bama miliya kelen wo le, kamasɔlɔn mɔɔ min vɛ tɔlɔyala a falikolo lɔ, wo tii v'i nɔningɛ julumbu tako ma.

² Wo le y'a ma, a sɔnjanin tɛ adamaden niikanukolu le butu aa dunuɲalɔtɛɛ tɔ bɛ lɔ, mafɔ Ala sawonankolu.

³ Tuɲa le, ài na waate min kɛla Alalɔnbalilu ladiyanankolu la kɔlɔman ne, wo vɛ je bɔ, iwo ài tɛɛ malobaliyakolu kɛla teme, ani niikanuko yonnu, ani gbɛtɔya, ani dannatimin tolonnu, ani joo kɔsɔninnu sɔko.

⁴ Àiya ko vɛ Alalɔnbalilu kawakoya, kamasɔlɔn ài tɛ lala ai kɔkan butu aiya manamanakolu lɔ, wo le n'a kɛla, ai y'ài tɔɔ yon fɔla yi ne.

⁵ Kɛɛ ai kɛtɔ dandɛɛli kɛla wo yɛ min lɔbɛnnin niimalu ni fulenilu bɛ ya kititɛɛko lɔ.

⁶ Wo le n'a kɛla, Samakan Kein la ka se mɔɔ saninnu ma fana, fɔsa hali ni ai la tɛɛ vɛ tɔn ai falikolo lɔ iwo adamaden bɛ, ai yi niimaya kɛ ka bɛn Ala sawo ma ai nii ta fannɔ.

Ài m'i Ala ya senkolu labaale kobɛn

⁷ Dunuɲa laban waate ma vɛ sulunya. Wo le y'a ma, ài y'ài hangili sii k'ài kɛ jɛlɛlɔminamɔɔ le, fɔsa ài yi se Ala dalila a ɲa bɛlɛbɛlɛ ma.

⁸ Min buɲanin ko bɛ le, wo le min ne: Ài ɲɔɔ kanu kosɛvɛ, kamasɔlɔn hakɛ siyama lɔ yi kotola kanundeya le sabu la.

⁹ Ài i ɲɔɔ jiya àiya bonnu la. Ài do kà kunnɔkuma kɛ ka bɛn wo ma.

¹⁰ Komi ài kelenkelenna bɛ vɛ sɔli min sɔlɔn Ala fɛ ka bɛn a jɛlɛkanu ya lɔtalali ma, wo lɔ, ài yi senko wolu labaale kobɛn ka dɔlu madɛmɛn.

¹¹ Mɔɔ min yi kawanili kɛla, fɔ wo tii y'a kɛ iwo a yi Ala gbu le kumakannu lasena. Mɔɔ min do yi madɛmɛli kɛla, fɔ wo tii y'a kɛ ka bɛn fanga ma min dinin a ma Ala bolo, fɔsa Ala yi magbiliyali sɔlɔn ko bɛ lɔ Masa Tɔɔmasenin Isa sabu la, magbiliyali ni seetiiya yi min ta le waate bɛ ani habadan. Amiina!

Ài m'i tɔlɔya mina mɔ ma ka bɛn Masa Tɔɔmasenin ma

¹² Ǹ diyananmɔɔlu, ài kà tɛɛnɛ lɔsumani gbɛlɛn taalamaa min na min y'ài kɔkan yi ne, ka kɛ iwo kawananko le kɛnin ài la.

¹³ Mafɔ, ài y'ài kɔnɔlɔdiya, kamasɔlɔn ài vɛ ài ta sɔlɔn Masa Tɔɔmasenin ya tɔlɔya lɔ, fɔsa ài kɔnɔlɔ yi diya kɔtunun bɛlɛbɛlɛ kɛ aa magbiliyali la vɛ nkɛnɛmayala lon min na.

¹⁴ Ni ài ka jɛvɛli masɔlɔn ka bɛn Masa Tɔɔmasenin tɔɔ ma, wo vɛ kɛla, duwawuden ne ài le, kamasɔlɔn Nii nɔɔlɔnin, min kɛnin Ala Nii le, wo vɛ la ài kɔkan.

¹⁵ Kɛɛ ài dɔ kà tɔlɔya masɔlɔn ka bɛn mɔɔfaako ma, niwotɛ suɲaliko, niwotɛ naafiiyako, niwotɛ koyon suu gbɛlɛ.

¹⁶ Kɛɛ ni ài dɔ ka tɔlɔya masɔlɔn kamasɔlɔn Masa Tɔɔmasenin kɔbiladen ne a le, wo tii kà maloya wo lɔ, mafɔ ka Ala tanu ka bɛn tɔɔ wo ma.

¹⁷ Kiti waate vɛ se, a do daminatɔ Ala ya bonnamɔɔlu le ma. Ni a daminatɔ ǹu gbu le ma, wo vɛ kɛla, mɔɔ wolu ya ko labantɔ di minu yi kolobaliya kɛla Ala ya Samakan Kein na?

¹⁸ A do sɛvɛnin kitabu kɔnɔ tan ne, ko: «Ni telenmande kisiko gbeleyanin ka kɛ, Alaɲasiyanɲɛbali ni julumbutɔ do?»

¹⁹ Wo le y'a ma, mɔɔ minu yi tɔlɔya masɔlɔnna ka bɛn Ala sawonanko ma, wolu y'ai nii kalifa Dannimasa lanande la ka to koɲuma kɛla.