1 Piyɛli 3 - Ala Ya Salatikan Kula Kitabu

Mosolu ni ai kɛ́nu wotɛko

¹ Wo boloɲa kelen ma, àilu mosolu y'ài fanmajii ài kɛ́nu yɛ, fɔsa ni a dɔlu kolonin ma kɛ Ala kumakan yɛ, hali ni kuma ma fɔ ài bolo, ài taamaɲa yi kɛ sabu le k'ài kɛ́nu latube,

² ai vɛ ài taamaɲa yena sɛnɛyali ni mabuɲali boloma.

³ Ài kà àiya keinya jiya ka bɛn ài falimakolu ma, iwo ài kundanɲalu, ani àiya masilili sanu le, ani àiya faani keinnu bilako,

⁴ mafɔ àiya keinya yi kɛ ài josokun ne lɔ, ka bɛn ài dajoo sɔniyanin ni ài mafaɲa ma. Keinya wo suu tɛ tununna, a do kulugbeleyayine Ala ɲakɔlɔ.

⁵ Muminin moso minu jei siinin tɛɛ Ala la kɔlɔkɔlɔ le, wolu tɛɛ ai jɛlɛ lakeinyala wo boloɲa le ma, ai vɛ ai fanmajiila ai kɛ́nu yɛ.

⁶ Salan tɛɛ wo dɔ le le. A k'a fanmajii Ibulahima yɛ, a v'a fɔla a ma ko: «Ǹ kuntii». Àilu le Salan denmoso le, ni ài ka koɲuma kɛ, ani ni ko foi ma ài masiyan k'ài hangili ɲaami.

⁷ Àilu kɛ́lu fana y'ài mosolu lɔmina koɲaye boloma, k'ài hangili to aiya fangandanya lɔ. Wo lɔ, ài y'ai buɲa, kamasɔlɔn Ala yi niimaya min dila aa nɛɛma lɔ, ài bɛ le kɛtɔ wo sɔlɔnna i ɲɔɔ fɛ. Ài yi wo kɛ, fɔsa ko ko si kana àiya Aladalilu lakoli.

Tɔlɔya min yi sɔlɔnna ka bɛn telenmandeya ma

⁸ Ka ǹa kuma laban: Ài yi kɛ miliya kelen nɔ, ài yi kɛ i ɲɔɔ fɛ ko bɛ lɔ, ài ɲɔɔ kanu iwo badenmalu, ài ɲɔɔ maɲumaye, ani ài y'ài fanmajii i ɲɔɔ yɛ.

⁹ Ài kà koyon sala koyon ne, niwotɛ ka jɛvɛli sala jɛvɛli le. Kɛɛ ài yi duwawu le kɛ ài tɔlɔyabalu yɛ, kamasɔlɔn ài kilinin Ala bolo wo le kanma fɔsa ài yi balaka sɔlɔn min ladalonin ài yɛ.

¹⁰ A sɛvɛnin tan ne kitabu kɔnɔ, ko: «Ni mɔɔ min y'a fɛ ka niimaya diyabɔ, ani ka hɛlɛlonnu ye, fɔ wo tii y'a nɛɛ matanga kuma yon fɔko ma, ani k'a da matanga janvandeyako ma.

¹¹ A a kɔdon koyonkɛko la ka koɲuma kɛ, ka josolajii ɲinin ka to wo kɔ.

¹² Kamasɔlɔn mɔ Tii ɲa yi telenmandelu la, a do tolomalɔnin aiya Aladalikannu la. Kɛɛ a do y'a ɲa yon labɔla koyonkɛbalu le kanma.»

¹³ Wo le y'a ma, ni koɲumakɛko le diyanin ài yɛ, jene yi se koyon kɛla ài la wo lɔ?

¹⁴ Kɛɛ hali ni ài ka tɔlɔya masɔlɔn ka bɛn telenmandeya ma, ài kɛtɔ duwawuden ne le wo lɔ. Ài kà siyan mɔɔlu ɲa, ài do hangili kà ɲaami.

¹⁵ Kɛɛ fɔ ài yi Masa Tɔɔmasenin buɲa ài josokun nɔ iwo ài Tii, k'ài lɔbɛnnin to waate bɛ ài kumanɔbɔko lɔ, ni mɔɔ mɔɔ si k'ài maɲininga ài jeisii ma min y'ài josokun nɔ.

¹⁶ Kɛɛ ài y'ai javi buɲali ni sɔniyali boloma, k'ài joso sɛnɛyanin to, fɔsa mɔɔ minu y'ài mafinna ka bɛn ài taamaɲa ɲuma ma Masa Tɔɔmasenin ya kafonɲɔɔya lɔ, wolu yi maloya.

¹⁷ Tuɲa le, ni a ka kɛ Ala sawo le ko ài yi tɔlɔya masɔlɔn koɲumakɛko lɔ, wo fisayayine jani ài yi tɔlɔya masɔlɔn koyonkɛko lɔ.

¹⁸ Masa Tɔɔmasenin fana ka tɔlɔya masɔlɔn siɲa kelen ne le ka bɛn adamadennu ya julumbulu ma. Ale telenmande na sala mɔɔ telenbalilu ya ko lɔ, fɔsa a tɛɛ ài madon Ala la. A do falikolo ka saya masɔlɔn, kɛɛ a ka niimaya sɔlɔn kɔtunun Nii Sɛnɛyanin sabu la.

¹⁹ Wo boloɲa ma, a ka taa fulenilu niilu kawani, minu tɛɛ kaso la

²⁰ ka bɛn aiya kolobaliya ma kɔlɔkɔlɔ le Sedina Nuho ya waate lɔ, Ala tɛɛ makɔnɔlila sawali boloma waate min nɔ jani kulunba la tɛɛ dan. Kulunba wo kɔnɔ, mɔɔ dana le ka kisi ka bɔ ji wo ma, minu tɛɛ mɔɔ sein ne.

²¹ Ji wo kɛnin makoli misali le le, min àilu fana lakisila yi ne. Wo tɛ nɔɔ bɔla mɔ falikolo ma, kɛɛ a yi jososɛnɛyanin daliko le le Ala la ka bɛn Masa Tɔɔmasenin Isa lawuliko ma ka bɔ saya lɔ,

²² ale min jɛlɛnin ka taa haijɛnɛ k'i sii Ala bolokini fannɔ, mɛlɛkalu ni kuntiilu ni fangatiilu majiinin vɛ a kɔlɔ.