1 Kolɛntikalu 9 - Ala Ya Salatikan Kula Kitabu

Pɔli ya keladenya nafa ni aa seetiiya

¹ Jalasa ǹ tɛ mɔɔ lafɛlɛnin ne? Isa ya keladen tɛ ǹ ne? M̀ ma mɔ Tii Isa ye ǹ ɲa la? M̀'ɛ baale min kɛ mɔ Tii yɛ, àilu gbu tɛ ǹa baalenɔ dɔ le?

² Hali dɔlu ma kɛ ǹ jatela Isa ya keladen ne, kɛɛ àilu yi ǹ yena wo le le. Kamasɔlɔn àilu gbu yi ǹa keladenya tɔɔmase le le mɔ Tii ya kafonɲɔɔya lɔ.

³ Mɔɔ minu y'a fɛ ka fɛɛ ye ǹa baale la, ǹ'i min ne fɔla ai yɛ ka ǹ kumanɔbɔ:

⁴ Jo tɛ mɔ bolo ka dɔnni kɛ ani k'i min ka bɛn maa baale ma?

⁵ Jo tɛ mɔ bolo ka limaniyamoso fulu ka kɛ mɔ taamaɲɔɔ le, iwo dɔ keladennu ani mɔ Tii Isa dɔɔkɛlu ani Piyɛli n'a kɛla teme?

⁶ Niwotɛ, ǹe ni Baanabasi kelen ne ka kan ka baale gbɛlɛ kɛ ka mɔ jɛlɛ balo?

⁷ Wo sɔdasi yi je min y'a jɛlɛ salala? Wo sɛnɛkɛba yi je min tɛ aa sɛnɛfen dɔ dɔnna? Wo kolofenkunnasiiba yi je min tɛ aa kolofen nɔnɔ dɔ minna?

⁸ Ài y'ài milila ko ǹ'i adamaden miliya le fɔla dein? Seliya kitabu fana ma wo le fɔ?

⁹ Kamasɔlɔn a sɛvɛnin Nabi Musa ya Taulati kɔnɔ, ko: «I kà nisi da sili, a vɛ kɛla sɛnɛfensi ladɔnna.» A yi di vɛ? Jalasa a sɛvɛnin ten ne kamasɔlɔn nisilu ya ko hamin yi Ala la?

¹⁰ A ma wo fɔ maa ko le lɔ? Wo sɛvɛnin maa ko le lɔ jɔ, kamasɔlɔn mɔɔ min yi sɛnɛ buluwala, ani mɔɔ min yi malo gbasila, ai mɔɔ fila ka kan ka baale kɛ, ai vɛ ai jei siila ai ta nii la malo lɔ.

¹¹ Mɔ na Ala ya kolu lasena ài ma iwo sɛnɛkɛba yi malosi falinna teme. Wo lɔ, ni mɔ ka mɔ balo sɔlɔn ài la, jalasa mɔ vɛ dannatiminko le kɛ wo le?

¹² Ni jo ka kɛ dɔlu bolo ko ai yi balo sɔlɔn ài la, jalasa jo tɛ ǹu bolo ka timin wolu la? Kɛɛ wo bɛ n'a kɛ, mɔ na mɔ joko tola ten. Mɔ do yi ko bɛ minala mɔ ma, fɔsa foi kana Masa Tɔɔmasenin ya Samakan Kein lasenko dansii.

¹³ Ài m'a lɔn ko mɔɔ minu yi baale kɛla lɔhɔlɔmabonba la, wolu ya balo yi bɔla je le? Ài m'a lɔn fana ko mɔɔ minu yi baalela salakagbalan kɔkan, wolu y'ai ta nii sɔlɔnna salaka wolu le lɔ?

¹⁴ Wo boloɲa kelen ma, mɔ Tii na jamali dila ko Samakan Kein lasenbalu ka kan k'ai balo sɔlɔn Samakan Kein lasenko lɔ.

¹⁵ Kɛɛ m̀'ɛ ban ǹ joko wolu bɛ lɔ. Ǹe do tɛ lɛtɛlɛ min sɛvɛla k'a fɔ ko ǹ joko wo la yi se m̀ ma. Saya fisayayine m̀ ma jani mɔɔ yi ǹ labɔnɔ ǹa matɔɔli dailu la.

¹⁶ Ni ǹ ka Samakan Kein lase, wo tɛ m̀ matɔɔko le, kamasɔlɔn ǹ kilinin baale wo le kanma diyanigbeya boloma. Gbalo yi ǹ yɛ ni m̀ ma Samakan Kein lase!

¹⁷ Ni ǹ tɛɛ baale min kɛ ka bɛn ǹ jɛlɛkanu sawo le ma, ǹ jii tɛɛ kɛle a tɔnɔ sɔlɔnko ma. Kɛɛ ni ǹ'a kɛla diyanigbeya bolo le ma, wo vɛ kɛla, a yi ǹ kundoni ne le min kalifanin ǹ na.

¹⁸ Wo le y'a ma, ǹ tɔnɔ yi mindɛ le? Ale le min ne: Ka Samakan Kein lase, min tɛ sanna. Wo le n'a kɛla, m̀'ɛ m̀ ban ǹ joko wolu bɛ lɔ, minu yi m̀ bolo ka bɛn Samakan Kein lasenko ma.

¹⁹ Hali ǹ ka kɛ mɔɔ lafɛlɛnin ne min tɛ mɔɔ foi ta le, kɛɛ ǹ na ǹ jɛlɛ kɛla bɛ ya jɔn ne le, fɔsa ǹ'i mɔɔ siyama masɔlɔn.

²⁰ M̀'ɛ kɛla Jahudiyalu tɛma, ǹ'i ǹ jɛlɛ kɛla iwo Jahudiya, fɔsa ǹ'i se Jahudiyalu masɔlɔnna teme. M̀'ɛ kɛla Nabi Musa ya seliya kɔlɔ mɔɔlu tɛma, hali ǹe gbu tɛ seliya kɔlɔ, ǹ'i ǹ jɛlɛ kɛla iwo seliya kɔlɔ mɔɔ, fɔsa ǹ'i se seliya kɔlɔ mɔɔlu masɔlɔnna teme.

²¹ Wo boloɲa kelen ma, m̀'ɛ kɛla siboloma gbɛlɛ mɔɔlu tɛma, Nabi Musa ya seliya tɛ minu bolo, ǹ'i ǹ jɛlɛ kɛla iwo mɔɔ min tɛ seliya kɔlɔ, fɔsa ǹ'i se ai masɔlɔnna teme. A tɛ k'a fɔ ko ǹ tɛ Ala ya seliya labatola, kamasɔlɔn ǹ'i Masa Tɔɔmasenin ya seliya le kɔlɔ.

²² M̀'ɛ kɛla mɔɔlu tɛma minu fanga dɔɔyanin limaniya lɔ, ǹ'i ǹ jɛlɛ kɛla iwo ai dɔ, fɔsa ǹ'i se ai masɔlɔnna teme. Ǹ'i ǹ jɛlɛ kɛla mɔɔ suu bɛ dɔ le mɔɔ bɛ yɛ, fɔsa boloɲa bɛ dɔ ma, ǹ'i se a dɔlu lakisila teme.

²³ Ǹ'i wo bɛ kɛla ka bɛn Samakan Kein ne ma, fɔsa ǹe fana yi ǹ ta nii sɔlɔn a balayi lɔ.

²⁴ Ài k'a lɔn ne ko mɔɔ minu yi bɔli kɛla i ɲɔɔ fɛ, wolu bɛ le yi bɔlila, kɛɛ ai lɔ mɔɔ kelen ne yi jazali sɔlɔnna, kɛlɛ? Àilu fana yi bɔli ten fɔsa ài yi jazali sɔlɔn.

²⁵ Mɔɔ minu yi bɔli suu wo kɛla, wolu bɛ le y'ai jɛlɛ lɔminala k'ai bolo bɔ ko bɛ lɔ, fɔsa ai yi jala sɔlɔn min yi tiɲata le. Kɛɛ ǹu do yi mɔ ta kɛla jala tiɲabali sɔlɔnko le lɔ.

²⁶ Wo le y'a kɛla, ǹ tɛ ǹ bɔlila ǹ kunfɛ. Ǹ'i sɛɛ le kɛla iwo gbuunnikɛba, kɛɛ ǹ tɛ m̀ bolo lafilila fuun.

²⁷ Ǹ'i ǹ falikolo makolola k'a bila ǹa lɔminali kɔlɔ, alako ǹ kana ban mɔɔlu kawanila ka ǹ fo ǹ jaza la.