1 Kolɛntikalu 8 - Ala Ya Salatikan Kula Kitabu

Joosɔsooko

¹ Ài na ɲiningali min kɛla ǹ na ka bɛn joosɔsoo dɔnko ma, ài m'i ɲa kaa wo lɔ vɛ. Mɔ k'a lɔn ne ko lɔnni yi mɔ bɛ fɛ ka bɛn ko min ma. Kɛɛ do, lɔnni wo suu yi mɔɔ fannɔbuɲala, k'a talan kanundeya le yi dɔlu lasawatila.

² Ni a ka kɛ mɔɔ dɔ kɔnɔ ko a ka ko dɔ lɔn, wo tii ma wo lɔn ba bene iwo a ka kan k'a lɔn teme.

³ Kɛɛ ni mɔɔ mɔɔ ka Ala kanu, Ala ka wo tii lɔn ne.

⁴ Wo lɔ saa, ka bɛn joosɔsoo dɔnko ma, mɔ k'a lɔn ne ko joo tɛ foi le dunuɲa, ani ko tii o tii tɛ je fɔ Ala kelenpesa.

⁵ Wo bɛ n'a kɛ, mɔɔlu y'a fɔla sangbololɔfen ni duukolokɔkanfennu ma ko ai tiilu. Tuɲa le, tiilu ni faamalu walayine,

⁶ kɛɛ mɔ ta fannɔ, Ala kelenpesa le yi je, mɔ Fa min na fen bɛ danna, ado m'i mɔ nii la ale le yɛ. Tii kelenpesa le yi je fana, min taanin kɛla Masa Tɔɔmasenin Isa le, fen bɛ ladannin ka bɛn min ma, ado m'i mɔ nii la ale le sabu la.

⁷ Kɛɛ lɔnni wo tɛ bɛ bolo. Mɔɔ minu deinin tɛɛ joosɔko la, hali bi ni ai ka soo dɔn waate o waate, ai y'a jatela joosɔsoo le le. Komi fanga tɛ ai josokun nɔ, ai y'ai milila ko a vɛ ai lakɔsɔ.

⁸ Ado dɔnnifen tɛ mɔ masulunyala Ala la. Ni mɔ ma a dɔn, wo tɛnala mɔ labɔnɔla foi la. Ni mɔ do k'a dɔn, mɔ tɛnala tɔnɔ foi sɔlɔnna wo la.

⁹ Kɛɛ ài y'ài jando ài jɛlɛ lɔ. Lafɛlɛ min y'ài bolo ka bɛn dɔnnifenko ma, wo kà kɛ dɔlu kunnɔtɛɛko sabu le, minu ya limaniya dɔɔyanin.

¹⁰ Lɔnni ile min bolo limaniya lɔ, ni i limaniyaɲɔɔ fangandan dɔ k'i ye dɔnnila joobatobon na, jalasa wo tii josola tɛnala gbeleyala joosɔsoo dɔnko lɔ?

¹¹ Wo vɛ kɛla, ka bɛn iya lɔnni ma, i limaniyaɲɔɔ fangandan yi halakile, Masa Tɔɔmasenin na sala min ya ko lɔ.

¹² Ni i ka hakɛ ta i badenma la boloɲa min ma, ka aa hangili lagbasi min dɔɔyanin limaniya lɔ, wo vɛ kɛla, i na hakɛ tala Masa Tɔɔmasenin gbu le la.

¹³ Wo le y'a ma, ni dɔnnifen dɔ ka kɛ m̀ badenma kunnɔtɛɛko sabu le, wo vɛ kɛla, ǹ tɛnala soo dɔnna butu feu, fɔsa m̀ badenma kunnɔ kana tɛɛ.