1 Kolɛntikalu 7 - Ala Ya Salatikan Kula Kitabu

Fuluko

¹ Ài na ɲiningali min kɛla ǹ na àiya lɛtɛlɛ kɔnɔ, ài m'i ɲa kaa wo lɔ, ni a bɛnyine k'a fɔ ko kɛ́ kà moso fulu.

² Ka bɛn kanukɛko ma, a bɛnyine kɛ́ kelenkelenna bɛ y'a jɛlɛkanu moso fulu, ani moso kelenkelenna bɛ fana y'a sii a jɛlɛkanu kɛ́ kun.

³ Kɛ́ ka kan k'a moso hakɛ di a ma, moso fana ka kan k'a kɛ́ hakɛ di a ma.

⁴ Kamasɔlɔn moso falikolo tɛ a jɛlɛkanu ta le, mafɔ a kɛ́ ta. Wo boloɲa kelen ma, kɛ́ fana falikolo tɛ a jɛlɛkanu ta le, mafɔ a moso ta.

⁵ Ài k'ài ban ài ɲɔɔ yɛ mafɔ ni ài mɔɔ fila ka bɛn a ma waateni kɔlɔ, fɔsa ài y'ài lɔgbeleya Aladaliko ma. Wo waate da vɛ fala, ài yi seikɔ i ɲɔɔ ma kɔtunun, alako Soitana kana ài manɛɛ ka bɛn àiya jɛlɛlɔminabaliya ma.

⁶ Ǹ'i min fɔla yi ne, wo tɛ jamali le, kɛɛ a yi lailikan ne le ài yɛ.

⁷ Ni kɛ́ bɛ tɛɛ kɛ iwo ǹ ne, wo tɛɛ diyale ǹ yɛ. Kɛɛ Ala ma mɔ bɛ sɔ boloɲa kelen ma. A na ko dɔ see kɛla a dɔ yɛ, k'a dɔgbɛlɛ see kɛ a dɔ yɛ.

⁸ Wo lɔ, mɔɔ minu tɛ fulu kɔnɔ, ani kɛsamosolu, ǹ'a fɔla ài yɛ, ǹ ko, ni ài ka to iwo ǹe, wo yi bɛnne.

⁹ Kɛɛ do, ni ài tɛ se ài jɛlɛ lɔminala, fɔ ài yi fulu le kɛ. Kamasɔlɔn fuluko bɛnyine ài ma jani kafonɲɔɔya lɔɔ yi gba ài la bubale.

¹⁰ Mɔɔ fulunilu koni, ǹ'i jamali min dila wolu le ma ka bɔ mɔ Tii fɛ, ǹ ko, moso man kan ka bɔ a kɛ́ kun.

¹¹ Kɛɛ ni a do ka bɔ a kɛ́ kun, fɔ a yi to fulubaliya le lɔ. Niwotɛ, fɔ a yi seikɔ a kɛ́ ma k'ai mɔɔ fila wotɛbɛn. Kɛ́ fana kà a moso bila.

¹² Ǹ'i min fɔla mɔɔ tɔlu yɛ butu, wo le ǹe gbu ya kuma le, mɔ Tii ta tɛ. Ni moso limaniyabali ka kɛ badenmakɛ dɔ kun, k'a talan moso wo diɲanin ka to a bolo, a kà wo tii bila.

¹³ Ni moso siinin ka kɛ kɛ́ limaniyabali dɔ kun, k'a talan kɛ́ wo diɲanin moso yi sii a kun, a kà bɔ kɛ́ wo kun.

¹⁴ Kamasɔlɔn kɛ́ limaniyabali vɛ bila a ta fan Ala yɛ ka bɛn a moso ma, ani moso limaniyabali vɛ bila a ta fan Ala yɛ ka bɛn badenmakɛ wo ma. Niwotɛ, ai dennu tɛɛ kɛle Alalɔnbali le, k'a talan ai vɛ bila ai ta fan Ala yɛ.

¹⁵ Kɛɛ ni limaniyabali dɔ y'a fɛ ka bɔ limaniyamɔɔ dɔ kun, ài y'a to ten, a yi taa. Wo vɛ kɛla, limaniyamɔɔ wo silinin tɛ wo tii ma butu. Kamasɔlɔn Ala n'ài kilila josolajii le kanma.

¹⁶ Kamasɔlɔn ile moso, i y'a lɔnna di, ni i yi sene i kɛ́ lakisila? Ile kɛ́, i y'a lɔnna di, ni i yi sene i moso lakisila?

Ài yi to iwo ài tɛɛ teme, Ala n'ài kilila waate min nɔ

¹⁷ Mɔ Tii na ko min latɛɛla mɔɔ kelenkelenna bɛ ma, ani Ala n'ài kilila ko min kanma, ài yi to wo boloɲa kelen ma. Ǹa jamali le wo le limaniyajamalu bɛ yɛ.

¹⁸ Ni Ala ka kɛ́ dɔ kili k'a talan wo tii makɛnɛkɛnin, wo tii yi to boloɲa wo ma. Ni Ala ka kɛ́ dɔ kili k'a talan wo tii makɛnɛkɛnin tɛ, wo tii kà diɲa kɛnɛkɛko ma.

¹⁹ Kɛnɛkɛko ni kɛnɛkɛbaliya tɛ ko le, mafɔ Ala ya jamalilu latelenko.

²⁰ Ài kelenkelenna bɛ yi to iwo ài tɛɛ teme, Ala n'ài kilila waate min nɔ.

²¹ I tonin jɔnya le lɔ i kilinin Ala bolo? I kà hamin wo le. Kɛɛ ni i yi sene k'i jɛlɛ lafɛlɛ, i yi wo kɛ.

²² Ni mɔ Tii ka jɔn min kili, wo tii vɛ kɛ mɔ Tii ya mɔɔ lafɛlɛnin ne. Wo boloɲa kelen ma, ni mɔ Tii ka mɔɔ lafɛlɛnin min kili, wo tii vɛ kɛ Masa Tɔɔmasenin ya jɔn ne.

²³ Ala vɛ ban ài kunmaka sala dila. Wo lɔ, ài kà kɛ mɔɔ foi ya jɔn ne.

²⁴ Wo le y'a ma, m̀ badenmalu, ài kelenkelenna bɛ yi to Ala ɲakɔlɔ iwo ài tɛɛ teme, a n'ài kilila waate min nɔ.

Fulubalilu ni kɛsamosolu ya ko

²⁵ Ǹe do ma jamali sɔlɔn mɔ Tii la ka bɛn singbili ni kavelennu ma minu ma fulu kɛ ba bene. Kɛɛ do, ǹ'i m̀ miliya le jiyala ài la, iwo mɔɔ min kɛnin lanande le ka bɛn mɔ Tii ya henandeya ma.

²⁶ Ǹ'i waate gbɛlɛn min yena teme, a bɛnyine mɔɔ yi to i kɛɲa ma.

²⁷ Ni moso vɛ kɛla i bolo, i kà a bila. Ni moso t'i bolo, i kà dɔ ɲinin.

²⁸ Kɛɛ ni i ka fulu kɛ, wo tɛ julumbuko le. Ni do singbili ka fulu, wo tɛ julumbuko le fana. Kɛɛ do, ni mɔɔ minu ka fulu kɛ, wolu kɛtɔ ɲagba siyama le sɔlɔnna dunuɲa, ado ǹ'a fɛ k'ài matanga wo le ma.

²⁹ M̀ badenmalu, ǹ kan yi min ma, wo le ne: Dunuɲa laban ma vɛ sulunya. Wo lɔ, ka ta bi ma, kɛ́ mosotiilu yi kɛ iwo moso tɛ ai bolo.

³⁰ Mɔɔ minu yi kasila, wolu yi kɛ iwo ai tɛ kasila. Sawa yi mɔɔ minu la, wolu yi kɛ iwo ai sawanin tɛ. Mɔɔ minu yi sanni kɛla, wolu yi kɛ iwo foi tɛ ai bolo.

³¹ Mɔɔ minu yi dunuɲa fennu labaalela, wolu yi kɛ iwo ai mako tɛ wolu la bene. Kamasɔlɔn dunuɲa kɛɲa min tununtɔle ka ban.

³² Ǹ'a fɛ ài la yi fɛlɛ ka bɔ haminkolu lɔ. Kɛ́ min ma moso ta, wo yi haminna mɔ Tii ya kolu le le, kamasɔlɔn a a lɔjala ka mɔ Tii ladiyanankolu le kɛ.

³³ Kɛɛ do, kɛ́ fulunin yi haminna dunuɲakolu le le, kamasɔlɔn a a lɔjala k'a moso ladiyanankolu le kɛ.

³⁴ A do miliya lɔtalanin fila le le. Moso fulubalilu ani singbililu, wolu yi haminna mɔ Tii ya kolu le le. Ai do y'ai lɔjala k'ai falikolo ni ai joso bɛ bila a ta fan mɔ Tii le yɛ. Kɛɛ moso fulunin do yi haminna dunuɲakolu le le, kamasɔlɔn a a lɔjala ka a kɛ́ ladiyanankolu le kɛ.

³⁵ Ǹ'i min fɔla ka bɛn ài madɛmɛnko le ma. A tɛ k'a fɔ ko ǹ'ài dansiila fuluko le ma, mafɔ ài yi kobɛlɛ kɛ ka bila mɔ Tii kɔ ài josokun bɛ le.

³⁶ Ni kɛ́ dɔ k'a mili ko a tɛ kobɛlɛ kɛla aa singbili maminanin la ka bɛn a fuluko matamalako ma, ni do singbili wo lɔɔ y'a minala bubale, wo vɛ kɛla, a a fulu iwo a diyanin a yɛ teme. Wo tɛ julumbuko le.

³⁷ Kɛɛ ni kɛ́ min k'a latɛɛ a josokun nɔ ko a tɛnala fulu kɛla, a do tɛ diyanigbeya le a ma, ni a ka se a jɛlɛ lɔminala, wo yi kobɛnnin ne le fana.

³⁸ Wo lɔ, mɔɔ min na aa moso maminanin fulula, wo tii na kobɛnnin ne kɛla. Kɛɛ do, kɛ́ min ma fulu kɛ, wo fana na kobɛnnin ne kɛla ka timin dɔ la.

³⁹ Moso fulunin siliyine a kɛ́ ma damanda wo y'a nii la. Kɛɛ ni a kɛ́ ka sa, a lafɛlɛyine k'i sii kɛ́ gbɛlɛ kun, min vɛ diyala a yɛ. Kɛɛ do, fɔ kɛ́ wo yi kɛ mɔ Tii malimaniyamɔɔ dɔ le le.

⁴⁰ Ǹe ɲana, ni moso wo ka to fulubaliya lɔ, wo yi hɛlɛ le le a ma. A do yi ǹ kɔnɔ ko Ala Nii Sɛnɛyanin yi ǹe fana fɛ.