1 Kolɛntikalu 6 - Ala Ya Salatikan Kula Kitabu

Kititɛɛko limaniyamɔɔlu wotɛ

¹ Ni ài lɔ mɔɔ fila ka bila i ɲɔɔ na, mindɛ lɔ ài y'ài wakalila ka taa kiti wo le Alalɔnbalilu ɲakɔlɔ, ka mumininnu to je?

² Ài m'a lɔn ko mumininnu le kɛtɔ dunuɲa kititɛɛba le? Komi ài kɛtɔ dunuɲa kititɛɛba le le, jalasa a see tɛ ài yɛ ka ko dennilu ɲabɔ?

³ Ài m'a lɔn ko ǹu le kɛtɔ mɛlɛkalu ya kiti tɛɛla? Ni wo le, dunuɲalɔtɛɛkolu do?

⁴ Wo lɔ, ni kɛlɛ dɔ ka wuli ài tɛma ka bɛn dunuɲalɔtɛɛkolu ma, mindɛ lɔ ài yi wo lasena kititɛɛbalu ma, minu tɛ jatela limaniyajama bolo?

⁵ Ǹ'i min fɔla yi ne, wo y'ài lamaloyako le le. Jalasa hangilima kelen gbu tɛ ài tɛma, min yi se ko suu wo ɲabɔla badenma fila wotɛ?

⁶ Kɛɛ badenma dɔ yi taala a dɔ le kititɛɛya lɔ. Wo do yi kɛla Alalɔnbalilu le ɲakɔlɔ!

⁷ Kɛɛ bɛnbaliya min y'ài lɔla taala ài badenma le kititɛɛya lɔ, wo y'a jiya le la ko ài vɛ koli feu! A tɛɛ fisale ài yi koyon wo mina ài ma, kɛlɛ? A tɛɛ fisale ai y'ài tɔɲɔ, kɛlɛ?

⁸ Kɛɛ àilu gbu yi koyon ni tɔɲɔli kɛla, hali ài badenmalu gbu la.

⁹ Ài m'a lɔn ko mɔɔ telenbalilu tɛnala donna Ala ya masaya lɔ? Ài k'ài jɛlɛ manɛɛ! Kanukɛbalu, joosɔbalu, jalonnu, kɛ́ minu y'ai lala ai kɛ́ ɲɔɔlu fɛ,

¹⁰ sonnu, natabalu, gbɛtɔlu, jɛvɛlikɛbalu, ani gbanalu, wolu suu suu tɛnala donna Ala ya masaya lɔ.

¹¹ Waate lɔ, ài dɔlu tɛɛ ten ne sɔ. Kɛɛ ài ma vɛ ko, ài la vɛ sɛnɛya, ani ài vɛ bila ài ta fan Ala yɛ, k'ài jate telenmandelu le Ala ɲakɔlɔ ka bɛn mɔ Tii Masa Tɔɔmasenin Isa tɔɔ ma, ani mɔ Tii Ala Nii Sɛnɛyanin.

Ài yi Ala magbiliya ài falikolo le

¹² Mɔɔ dɔlu y'a fɔla, ai vɛɛ: «Ko bɛ ladaanyine m̀ ma.» Tuɲa le, kɛɛ nafa tɛ ko bɛ la. Ǹ'i sene a fɔla, ǹ ko: «Ko bɛ ladaanyine m̀ ma.» Kɛɛ ǹ tɛnala ǹ jɛlɛ kɛla fen fen si ya jɔn ne.

¹³ Mɔɔ dɔlu fana y'a fɔla, ai vɛɛ: «Dɔnnifen dinin kɔnɔgbolo le ya ko lɔ, ani kɔnɔgbolo dinin dɔnnifen ne ya ko lɔ.» Tuɲa le, kɛɛ Ala kɛtɔ fen fila wo bɛ le halakila. Mɔɔ falikolo koni la ma dan kanukɛko lɔ, kamasɔlɔn mɔ Tii ta le falikolo le, ado falikolo fana ta le mɔ Tii le.

¹⁴ Ala na mɔ Tii Isa lawulila aa foniseleya le lɔ, a do kɛtɔ ǹu fana lawulila ten ne.

¹⁵ Ài m'a lɔn ko ài falikolo yi Masa Tɔɔmasenin falikolo fan dɔ le le? Jalasa ǹ'i Masa Tɔɔmasenin falikolo fan dɔ ta ka wo kafon sungulunba kɔkan? Wo tɛ bɛn feu!

¹⁶ Ài m'a lɔn ko ni kafonɲɔɔya ka don kɛ́ ni sungulunba wotɛ, wo tii ni sungulunba vɛ kɛ falikolo kelen ne? Kamasɔlɔn a sɛvɛnin tan ne kitabu kɔnɔ, ko: «Ai mɔɔ fila kɛtɔ falikolo kelen ne le.»

¹⁷ Kɛɛ ni mɔɔ min k'a jɛlɛ kafon mɔ Tii kɔkan, mɔɔ wo ni mɔ Tii vɛ kɛ kelen ne miliya kelen nɔ.

¹⁸ Ài yi bɔli kanukɛko ma feu! Ka bɔ kanukɛko kɔ, ni mɔɔ ka hakɛ suu gbɛlɛ ta, wo tɛ a falikolo ya ko le. Kɛɛ kanukɛba yi hakɛ tala ale jɛlɛkanu falikolo le la.

¹⁹ Ài m'a lɔn ko ài falikolo kɛnin Nii Sɛnɛyanin ya lɔhɔlɔmabon ne le? Nii Sɛnɛyanin min y'ài josokun nɔ, ài na wo sɔlɔnna Ala le fɛ. Ài do tɛ ài jɛlɛ ta le.

²⁰ Ala vɛ ban ài kunmaka sala dila. Wo ma, ài yi Ala magbiliya ài falikolo le.