1 Kolɛntikalu 4 - Ala Ya Salatikan Kula Kitabu

Masa Tɔɔmasenin ya keladennu

¹ Wo le y'a ma, fɔ ài yi mɔ jate Masa Tɔɔmasenin ya bɔidennu le, Ala ya gbonokolu kalifanin minu la.

² Ni do baale dɔ kalifanin ka kɛ mɔɔ dɔ la, min yi ɲininna wo tii fɛ, wo le lanandeya le.

³ Ǹe koni, hali ni àilu niwotɛ adamaden dɔlu y'a fɛ ka fɛɛ bɔ ǹa baalekɛɲa la, wo tɛ ǹ ɲana foi le. Tuɲa le, ǹe gbu tɛ kiti tɛɛla ka bɛn ǹa baale ma.

⁴ Ǹe do josolɔgbɛyine ka bɛn ǹa baale ma, kɛɛ wo bɛ n'a kɛ, wo tɛnala kɛla ǹ joko le. Min yi ǹa kiti tɛɛla, wo le mɔ Tii gbu le.

⁵ Wo le y'a ma, ài kà ài lateleja ka mɔɔ ya kiti tɛɛ, ni a waate bɛlɛ ma se ba. Ài y'a to ten haan fɔɔ mɔ Tii yi na. Ko ko doonnin divi lɔ, ale le kɛtɔ wolu lankɛnɛmayala ka mɔɔ bɛ kɔnɔlɔkolu labɔ gbɛ la. Wo vɛ kɛla, mɔɔ kelenkelenna bɛ kɛtɔ matanuli sɔlɔnna Ala bolo.

⁶ M̀ badenmalu, m̀'ɛ ko minu la ǹe ni Apolosi ma ka kɛ misali le ài madɛmɛnko lɔ, fɔsa ko min sɛvɛnin kitabu kɔnɔ, ài kana timin wo la, ani ài kana ài diyanan ta mɔ lɔ fannɔbuɲa boloma.

⁷ Kamasɔlɔn jene n'ài lafisala dɔlu le? Fen mindɛ le ài bolo, ni a dinin tɛ ài ma? Ni a diyine ài ma, mindɛ lɔ ài y'ài wasola k'a kɛ iwo a dinin tɛ ài ma?

⁸ Ài vɛ wasa jɔ! Ài do vɛ banaya jɔ! Ài vɛ masaya damina, k'a talan mɔ fɛ tɛ ài la! A tɛɛ bɛnne ni ài tɛɛ kɛ masa le, fɔsa mɔ fɛ tɛɛ kɛ àiya masaya la!

⁹ Kamasɔlɔn a yi ǹ kɔnɔ ko Ala vɛ ǹu keladennu to mɔɔ bɛ laban na iwo kɛlɛkɔlɔdennu, saya latɛɛnin minu ma. Kamasɔlɔn mɔ vɛ kɛ tɔɔmasefen ne bolokɔni la dunuɲa bɛ yɛ, adamaden ni mɛlɛkalu bɛ.

¹⁰ Mɔɔ hangilindan ne mɔ le Masa Tɔɔmasenin ya ko lɔ, kɛɛ hangilima le àilu le Masa Tɔɔmasenin ya kafonɲɔɔya lɔ. Fangandan ne mɔ le, kɛɛ àilu do yi fangama le le. Mɔɔlu y'ài minala buɲali boloma, ka ǹu lafeya.

¹¹ Hali bi kɔɔn ni jilɔɔ yi mɔ la. Faani kolon ne yi mɔ kanna. Ai yi mɔ gbasila waate bɛ, ado jiya kelen tɛ mɔ la.

¹² M'i sɛyɛla baale gbɛlɛn ne mɔ bolo la. Ai vɛ mɔ jɛvɛla, m'i duwawu le kɛla ai yɛ. Ai vɛ mɔ jangatala, m'i wo manɔla.

¹³ Ai vɛ tɔɔlala mɔ la, m'i wo javila kuma kein ne le. Hali bi mɔ kɛnin ai ɲana iwo dunuɲa ɲama ni nɔɔ suu bɛ.

¹⁴ Ǹ tɛ ko minu sɛvɛla ài lamaloyako lɔ, mafɔ k'ài lali iwo ǹ diyanan dennu.

¹⁵ Hali kalanmɔɔ waa tan (10 000) ka kɛ ài bolo Masa Tɔɔmasenin ya siya kɔkan, ài fanu walanin tɛ. Ǹe do vɛ kɛ ài fa le Masa Tɔɔmasenin Isa ya siya kɔkan ka bɛn Samakan Kein ma.

¹⁶ Wo ma, ǹ'ài madiyala, ài y'ài suma m̀ ma.

¹⁷ Ǹ na Timote lataala ài ma ka bɛn wo le ma, ale min taanin kɛla ǹ diyanan den ne ani lanande mɔ Tii ya siya kɔkan. Ale le kɛtɔ ài hangili bilala ǹ taamaɲa lɔ Masa Tɔɔmasenin ya siya kɔkan, iwo ǹ'i limaniyajamalu bɛ kalanna teme fan bɛ lɔ.

¹⁸ Ài dɔlu vɛ kafa ka kɛ iwo ǹ tɛnala nala ài ma.

¹⁹ Kɛɛ ni mɔ Tii ka diɲa, a lɔ tɛnala mɛnna, ǹ kɛtɔ nala ài ma. Wo vɛ kɛla, ǹ kɛtɔ mɔɔ kafanin wolu fanga lɔnna, ai kumakan makan tɛ.

²⁰ Kamasɔlɔn Ala ya masaya tɛ danna kumalɔbɔko ma dein, mafɔ fanga.

²¹ Ài yi mindɛ kɔ yi ne? Ài y'a fɛ ǹ'i na ài ma gbusan ne, baa ǹ'i na kanundeya ni sɔniyali boloma?