1 Kolɛntikalu 3 - Ala Ya Salatikan Kula Kitabu

Ala ya bɔidennu

¹ M̀ badenmalu, m̀ ma se kumala ài yɛ iwo Nii Sɛnɛyanin yi mɔɔ minu josokun nɔ, mafɔ iwo adamaden jɛlɛla ni dennilu Masa Tɔɔmasenin ya kolu lɔ.

² M̀ ma ài balo dɔnnifen lɔjanin na, mafɔ sinji, kamasɔlɔn ài tɛɛ ma se ba wo ma bene. Ado ài lɔbɛnnin tɛ wo ma hali bi,

³ kamasɔlɔn dunuɲamɔɔlu dajoo le y'ài la bene. Komi keleya ni bɛnbaliya y'ài tɛma, jalasa wo t'a jiyala ko dunuɲamɔɔlu dajoo le ài la, ani ài yi taamana iwo adamaden jɛlɛla?

⁴ Ài lɔ mɔɔ kelen vɛɛ ko: «M̀ bilanin Pɔli le kɔ.» A dɔgbɛlɛ vɛɛ ko: «M̀ bilanin Apolosi le kɔ.» Ài tɛ adamaden jɛlɛla le le wo lɔ?

⁵ Apolosi yi jene le? Pɔli yi jene le? Bɔiden ne mɔ le, minu kɛnin sabu le ài limaniyanin. Mɔ Tii na ke minu dila ǹu mɔɔ fila ma, m'i wo le la yi ne.

⁶ Ǹe le na jili kolo sɛnɛna, ado Apolosi n'a sɔla ji la, kɛɛ Ala le n'a lafɛlɛnna k'a ɲia.

⁷ Wo lɔ, mɔɔ min yi fen sɛnɛna, ani mɔɔ min y'a sɔla ji la, wolu tɛ jatela, mafɔ Ala min y'a lafɛlɛnna k'a ɲia.

⁸ Mɔɔ min yi fen sɛnɛna ani min y'a sɔla ji la, wolu kaanyine. Ai kelenkelenna bɛ kɛtɔ ai sala sɔlɔnna ka bɛn aiya baale le ma.

⁹ Kamasɔlɔn baalekɛɲɔɔma le mɔ le Ala ya baale lɔ, àilu do yi Ala ya sɛnɛ le le, ani aa bon.

¹⁰ Ka bɛn Ala ya nɛɛma ma min dinin m̀ ma, ǹ na bon jusiila iwo bonlɔba ɲuma. Ado mɔɔ gbɛlɛ le yi bonlɔ kɛla bonjusii wo kɔkan. Kɛɛ fɔ mɔɔ kelenkelenna bɛ y'a jando aa bonlɔɲa lɔ.

¹¹ Kamasɔlɔn mɔɔ mɔɔ tɛ se ka bonjusii gbɛlɛ kɛ, ni a tɛ wo le min jusiinin kɔlɔkɔlɔ le, min taanin kɛla Masa Tɔɔmasenin Isa le.

¹² Ni mɔɔ dɔ ka bon lɔ bonjusii wo kɔkan sanu le, niwotɛ wɔligbɛ, niwotɛ kawa kulugbɛlɛn, niwotɛ kɔlɔman, niwotɛ bin, niwotɛ malo gban,

¹³ mɔɔ kelenkelenna bɛ bolonɔ kɛtɔ bɔla gbɛ la. A jiyatɔle kititɛɛlon, kamasɔlɔn kolu lankɛnɛmayatɔle taa bolo, ado taa kɛtɔ mɔɔ kelenkelenna bɛ bolonɔ lɔsumana.

¹⁴ Ni mɔɔ min baalenɔ lɔnin ka to, wo tii ma kɛtɔ balayi le sɔlɔnna.

¹⁵ Kɛɛ do, ni mɔɔ min baalenɔ ka ɲɛnin, wo tii ma bɔnɔtɔle a balayi la. Ale gbu kɛtɔ kisila, kɛɛ a kɛtɔle iwo mɔɔ min timinnin vɛ taa lɔ.

¹⁶ Ài m'a lɔn ba bene ko Ala ya lɔhɔlɔmabon ne ài le, ani Ala Nii Sɛnɛyanin makɛnin àilu le kɔnɔ?

¹⁷ Ni mɔɔ min vɛ Ala ya lɔhɔlɔmabon lɔtiɲala, Ala kɛtɔ wo tii lɔtiɲala. Kamasɔlɔn Ala ya lɔhɔlɔmabon sɛnɛyayine, ado àilu taanin kɛla lɔhɔlɔmabon wo le le.

¹⁸ Mɔɔ mɔɔ kà a jɛlɛ manɛɛ. Ni mɔɔ dɔ y'ài tɛma min y'a jɛlɛ tala hangilima le ka bɛn dunuɲamɔɔlu miliyalu ma, wo tii y'a jɛlɛ kɛ hangilindan ne, fɔsa a yi kɛ hangilima bɛlɛbɛlɛ le.

¹⁹ Kamasɔlɔn dunuɲamɔɔlu ya hangilimaya yi Ala ɲana hangilindanya le le. A do sɛvɛnin kitabu kɔnɔ tan ne, ko: «Ala yi hangilimalu minala aiya jateeya le fɛ.»

²⁰ A do sɛvɛnin fana, ko: «Mɔ Tii ka hangilimalu miliya bɛ lɔn ko miliya fuun ne ai la.»

²¹ Wo le y'a ma, mɔɔ mɔɔ man kan k'i waso adamaden dɔ ya ko lɔ. Kamasɔlɔn fen bɛ y'ài ta le le:

²² ǹe Pɔli o, Apolosi o, Piyɛli o, dunuɲa o, ɲɛnɛmaya o, saya o, bi kolu o, ani sinin kolu, ài ta le wo bɛ le.

²³ Ado Masa Tɔɔmasenin ta le ài le, Ala fana ta le Masa Tɔɔmasenin ne.