1 Kolɛntikalu 2 - Ala Ya Salatikan Kula Kitabu

Ala ya gbonoko

¹ M̀ badenmalu, ǹ ka na ài fɛlɔ waate min nɔ Ala ya gbonoko lasenko lɔ, m̀ ma na kuma madiyaninnu le, niwotɛ hangilimaya.

² Ǹ tɛɛ ài tɛma waate min nɔ, ǹ k'a latɛɛ ko ǹ kà ko gbɛlɛ lɔn, mafɔ Masa Tɔɔmasenin Isa dein, ani a sako kɔlɔman ma.

³ Ǹe do tɛɛ fangandan ne le ài tɛma, m̀'ɛ jaajaala siyan boloma.

⁴ Ǹ tɛɛ kumala ài fɛ ani ka kawanili kɛ waate min nɔ, ǹ tɛɛ tɛ ǹ da lɔdiyala iwo hangilima. Mafɔ, Nii Sɛnɛyanin ka aa foniseleya le jiya,

⁵ alako àiya limaniya ju kana sii adamadennu ya hangilimaya kɔkan, mafɔ Ala ya foniseleya.

Ala ya hangilimaya

⁶ Wo bɛ n'a kɛ, m'i hangilimaya kumalu lasena mɔɔlu ma minu sawatinin limaniya lɔ. Kɛɛ do, hangilimaya wo suu tɛ dunuɲa ta le, niwotɛ dunuɲa kuntiilu ta, minu yi tunun boloma yi ne.

⁷ Ǹu do yi Ala ya hangilimaya le lasena, min kɛnin aa gbonoko doonnin ne, a na min latɛɛla jani dunuɲa tɛɛ dan maa magbiliyali sɔlɔnko lɔ.

⁸ Dunuɲa kuntii suu suu tɛɛ ma hangilimaya wo ɲaye. Niwotɛ, ai tɛɛ tɛnala mɔ Tii nɔɔlɔnin gbaanna kɔlɔman ma.

⁹ Kɛɛ a sɛvɛnin kitabu kɔnɔ tan ne, ko: «Ɲa ma la ko minu ma, tolo ma ko minu mɛn, ado ko min miliya ma bila mɔɔ suu suu josokun nɔ, Ala na wolu le latɛɛla a kanundelu yɛ.»

¹⁰ Ala na ko wolu jiyala mɔ la Nii Sɛnɛyanin le fɛ. Kamasɔlɔn Nii Sɛnɛyanin yi ko bɛ le lakɔlɔsila, hali Ala ya gbonolɔkolu.

¹¹ Mɔɔ foi tɛ se a mɔɔɲɔɔ miliyalu lɔnna, mafɔ wo tii gbu nii min y'a kɔnɔ. Wo boloɲa kelen ma, mɔɔ foi tɛ se Ala miliyalu lɔnna, ni Ala Nii Sɛnɛyanin tɛ.

¹² Ǹu koni, mɔ na hangili min sɔlɔnna, wo tɛ dunuɲa ta le. Mɔ do vɛ Ala Nii Sɛnɛyanin sɔlɔn, fɔsa m'i se Ala ya sɔlilu lɔnna teme.

¹³ M'i kuma minu fɔla, wolu ma bɔ adamadennu ya hangilimaya lɔ. Kɛɛ m'a fɔla ka bɛn Nii Sɛnɛyanin ya kalan ne ma. Wo boloɲa ma, m'i Nii Sɛnɛyanin ya tuɲakolu ɲafɔla ka bɛn Nii Sɛnɛyanin sabu le ma.

¹⁴ Kɛɛ adamaden jɛlɛla tɛ a bolo siila Ala Nii Sɛnɛyanin kolu kɔlɔ, kamasɔlɔn wolu y'a ɲana ko kundan ne le. A do tɛ ai ɲayena, kamasɔlɔn wolu wotɛbɔ yi lɔnna Nii Sɛnɛyanin ne fɛ dein.

¹⁵ Nii Sɛnɛyanin yi mɔɔ min fɛ, wo tii yi sene ko bɛ kiti tɛɛla, k'a talan mɔɔ foi tɛ se ale ya kiti tɛɛla.

¹⁶ A do sɛvɛnin kitabu kɔnɔ tan ne, ko: «Jene ka mɔ Tii miliya lɔn, k'a fɔ ko a yi sene k'a lali?» Kɛɛ ǹu koni, Masa Tɔɔmasenin miliya le yi mɔ la.