1 Kolɛntikalu 16 - Ala Ya Salatikan Kula Kitabu

Bololadɛnko

¹ Bololadɛn min yi kɛla k'a lataa mumininnu ma Jelusalɛmu, ǹ'a fɛ ài y'ài ta kɛ iwo ǹ na limaniyajamalu lɔla teme Galatiya koovi lɔ.

² Lai o Lai, ài kelenkelenna bɛ y'a dɔ bɔ ài sɔlɔnfennu la ka wo ladalo. Wo vɛ kɛla, m̀'ɛ nala lon min na, bololadɛn tɛnala kɛla.

³ M̀'ɛ sena ài fɛlɔ, ài vɛ mɔɔ minu jiyala ǹ na, ǹ kɛtɔ lɛtɛlɛ dɔlu lala àiya bololadɛnfennu kɔkan k'ai lataa Jelusalɛmu.

⁴ Ni ǹe gbu taako ka bɛn, wo vɛ kɛla, ǹe ni ailu kɛtɔ taala i ɲɔɔ fɛ.

Pɔli ya taamanko

⁵ M̀'ɛ banna Masaduwani koovi lɔtiminna, ǹ kɛtɔ nala ka bɔ ài ma, kamasɔlɔn ǹ'a fɛ ǹ'i Masaduwani le lɔtimin kunfɔlɔ le.

⁶ Tumadɔ ǹ kɛtɔ mɛnna ài fɛlɔ, niwotɛ ka nɛnɛbɔ waate bɛ kɛ je. Wo vɛ kɛla, ài kɛtɔ m̀ madɛmɛnna ǹa taamanko lɔ, m̀'ɛ kɛla taala tɛɛ o tɛɛ lɔ.

⁷ Ǹ t'a fɛ siɲa min nɔ ǹ'i taa ǹ ɲa la ài ma dein ka timin. Ǹ'a fɛ ǹ'i waateni kɛ ài fɛlɔ, ni mɔ Tii ka diɲa.

⁸ Kɛɛ ǹ kɛtɔ tola Ɛfɛsi so kɔnɔ jan ne haan fɔɔ Tele Biloolunanlon Selilon yi se.

⁹ Kamasɔlɔn da ba la vɛ ka ǹ yɛ jan baale nafata kɛko lɔ, ka talan ǹ kɛlɛɲɔɔlu walanin.

¹⁰ Ni Timote ka se je, ài y'ài bolo sii a kɔlɔ fɔsa a josola yi jii ài tɛma, kamasɔlɔn ale fana yi baalela mɔ Tii yɛ iwo ǹe.

¹¹ Wo lɔ, mɔɔ mɔɔ kà jɔ a ma. Ài y'a madɛmɛn k'a lasei m̀ ma jan hɛlɛ lɔ, kamasɔlɔn ǹe ni mɔ badenma tɔlu y'a makɔnɔna.

¹² Mɔ badenma Apolosi koni, ǹ n'a madiyala kosɛvɛ, ǹ ko, ale ni mɔ badenma tɔlu yi taa bɔ ài ma kelen ne, kɛɛ taa lɔɔ t'a la bene feu. Ni a do k'a sen sɔlɔn kɔfɛ, a kɛtɔ nala ài ma.

Folikan labannu

¹³ Ài yi to ài ɲana, k'ài lɔgbeleya limaniya lɔ. Ài y'ài wakali k'ài sɛmɛdon.

¹⁴ Ài do vɛ kɛla ko ko kɛla, ài yi wo kɛ kanundeya boloma.

¹⁵ Ài k'a lɔn ko Sitɛfanasi ya bonnamɔɔlu le na Isa ya siya lataamana kunfɔlɔ le Akayi koovi lɔ, ani k'ai tɛsili mumininnu madɛmɛnko la. Wo lɔ, m̀ badenmalu, ǹ'ài madiyala,

¹⁶ ài yi kolo mɔɔ suu wolu yɛ, ani mɔɔ minu bɛ kafonnin ai kɔkan k'ai lɔja baale wo ma.

¹⁷ Ǹ sawanin ba le Sitɛfanasi ni Fɔtunatusi ni Akaikusi nako lɔ jan. Àilu tɛ jan, kɛɛ wolu le na m̀ madɛmɛnna ài nɔ lɔ.

¹⁸ Ai vɛ ǹ josolajii, ani àilu fana. Ài yi mɔɔ suu wolu koɲuma lɔn.

¹⁹ Limaniyajama minu yi Esiya koovi lɔ, wolu y'ài fola. Akuila ni a moso Pisila, ani limaniyajama min yi ladɛn kɛla aiya bon na, wolu fana y'ài fola kosɛvɛ mɔ Tii tɔɔ lɔ.

²⁰ Mɔ badenma minu yi jan, wolu fana bɛ y'ài fola. Ài i ɲɔɔ fo kanundeya foli sɛnɛyanin ne.

²¹ Ǹe Pɔli le yi folikan min sɛvɛla ǹe gbu bolo le.

²² Ni mɔɔ min tɛ mɔ Tii kanula, wo tii daanyine. Malanata (Na vɛ, mɔ Tii)!

²³ Mɔ Tii Isa ya nɛɛma yi kɛ ài yɛ.

²⁴ Ǹ'ài bɛ kanula Masa Tɔɔmasenin Isa ya kafonɲɔɔya lɔ. Amiina.