1 Kolɛntikalu 15 - Ala Ya Salatikan Kula Kitabu

Isa lawuliko ka bɔ saya lɔ

¹ M̀ badenmalu, ǹ'a fɛ ài y'ài hangili to Samakan Kein nɔ, ǹ na min lasena ài ma, ài n'ài bolo siila min kɔlɔ k'ài bolo kɛ a la kpekpe.

² Ài do kɛtɔ kisila Samakan Kein min ne fɛ, ni ài fasanin ka to a ma, iwo ǹ n'ài kawanila teme. Niwotɛ, àiya limaniya yi kɛle kofuun ne.

³ Ǹ na kalan kulugbɛlɛn min sɔlɔnna, ǹ na wo le lasena ài ma kunfɔlɔ le: Masa Tɔɔmasenin sanin maa julumbulu ya ko le lɔ iwo a sɛvɛnin kitabu kɔnɔ teme.

⁴ A do sudoonnin, a tele sawana lon, a k'i wuli ka bɔ saya lɔ, iwo a sɛvɛnin kitabu kɔnɔ teme.

⁵ Wo kɛ, a k'a jɛlɛ jiya Piyɛli la, ka ban k'a jɛlɛ jiya aa keladen mɔɔ tan ni fila (12) la.

⁶ Wo kɔ, a k'a jɛlɛ jiya mɔ badenma mɔɔ kɛmɛ loolu (500) ni kɔ la waate kelen nɔ. Wolu siyama y'ai nii la hali bi, kɛɛ a dɔlu vɛ sa.

⁷ Wo kɔ, a k'a jɛlɛ jiya Janguba la, ka ban k'a jɛlɛ jiya aa keladennu bɛ la.

⁸ Wo bɛ kɔ, a k'a jɛlɛ jiya ǹe fana la, ǹe min kɛnin iwo den min ma sɔlɔn a waate bɛlɛ lɔ.

⁹ Kamasɔlɔn ǹe le keladen bɛ lɔ dɔɔmanda le. Hali k'a fɔ m̀ ma ko keladen, ǹe ni wo kaannin tɛ, kamasɔlɔn ǹ na Ala ya limaniyajama jangatala.

¹⁰ Kɛɛ ǹ'i min ne bi, ǹ kɛnin wo le ka bɛn Ala ya nɛɛma le ma. Ado aa nɛɛma min dinin m̀ ma, wo ma kɛ kofuun ne. Tuɲa le, ǹ na baale kɛla ka timin keladen tɔ bɛ la. Wo do tɛ ǹe gbu senko le, mafɔ Ala ya nɛɛma min kɛnin ǹ yɛ.

¹¹ Wo lɔ, ni a ka taa kɛ ǹe le, niwotɛ dɔ keladennu, mɔ bɛ yi kawanili kelen ne kɛla, ado ài limaniyanin wo le ma.

Fulenilu lawuliko

¹² Komi m'i kawanili kɛla k'a fɔ ko Masa Tɔɔmasenin la vɛ wuli ka bɔ saya lɔ, a yi di vɛ ài dɔlu y'a fɔla ko fulenilu la tɛ wulila ka bɔ saya lɔ?

¹³ Ni fulenilu la tɛ wulila ka bɔ saya lɔ, wo vɛ kɛla, Masa Tɔɔmasenin gbu la ma wuli ka bɔ saya lɔ.

¹⁴ Ni do Masa Tɔɔmasenin la ma wuli ka bɔ saya lɔ, wo vɛ kɛla, maa kawanili kɛnin kofuun ne le, ani àiya limaniya fana.

¹⁵ K'a dɔ la wo kɔkan, mɔ tɛɛ kɛle faɲafɔ selelu le ka bɛn Ala ma, kamasɔlɔn mɔ na seleya dila k'a fɔ ko ale le na Masa Tɔɔmasenin lawulila ka bɔ saya lɔ. Kɛɛ ni fulenilu lawuliko tɛ tuɲa le, wo vɛ kɛla, Ala ma a lawuli feu!

¹⁶ Kamasɔlɔn ni fulenilu la tɛ wulila ka bɔ saya lɔ, wo vɛ kɛla, Masa Tɔɔmasenin gbu la ma wuli ka bɔ saya lɔ.

¹⁷ Ni do Masa Tɔɔmasenin la ma wuli ka bɔ saya lɔ, wo vɛ kɛla, àiya limaniya kɛnin kofuun ne le, ani àiya julumbulu lɔ ma koto ba hali bi.

¹⁸ Ni a yi ten ne, Masa Tɔɔmasenin malimaniyamɔɔ minu vɛ sa, wolu bɛ vɛ halaki.

¹⁹ Ni mɔ jei siinin ka kɛ Masa Tɔɔmasenin na maa dunuɲalɔtɛɛ lɔ dein, wo vɛ kɛla, m'i mɔɔ bɛ lɔ maɲumanintɔ le le.

²⁰ Kɛɛ tuɲa le, Masa Tɔɔmasenin la vɛ lawuli ka bɔ saya lɔ, ka kɛ mɔɔ lawulinin kunfɔlɔ le mɔɔ saninnu tɛma.

²¹ Kamasɔlɔn saya nanin dunuɲa teme kɛ́ kelen sabu la, wo boloɲa kelen ma, fulenilu lawuliko nanin kɛ́ kelen ne sabu la.

²² Ado mɔɔ bɛ kɛtɔ sala mɔ bema Adama ya kafonɲɔɔya lɔ teme, wo boloɲa kelen ma, niimaya kɛtɔ dila mɔɔ bɛ ma ten ne minu yi Masa Tɔɔmasenin ya kafonɲɔɔya lɔ.

²³ Kɛɛ wo kɛtɔle bɛ ni a lɔya. Masa Tɔɔmasenin ne lawulinin kunfɔlɔ le ka bɔ saya lɔ. Wo kɔ, a jɛlɛkanu mɔɔlu la kɛtɔ wulila a nalon.

²⁴ Wo vɛ kɛla, dunuɲa laban kɛtɔ sena, Masa Tɔɔmasenin vɛ kuntii yenbalilu bɛ halakila, ani fangatiilu, ani seetiilu, ka ban ka masaya lase Fa Ala ma.

²⁵ Kamasɔlɔn a ka kan ka masaya kɛ haan fɔɔ Ala vɛ a juulu bɛ bilala a sen kɔlɔ.

²⁶ A juu laban min kɛtɔ halakila, wo le saya le.

²⁷ Kamasɔlɔn a sɛvɛnin kitabu kɔnɔ, ko: «Ala vɛ fen bɛ bila a sen kɔlɔ.» Kɛɛ a fɔnin mingɛ ko fen bɛ bilanin a sen kɔlɔ, wo lagbɛyine ko Ala gbu makan tɛ, min kɛtɔ fen bɛ bilala Masa Tɔɔmasenin fanga kɔlɔ.

²⁸ Fen bɛ vɛ bilala Masa Tɔɔmasenin fanga kɔlɔ waate min nɔ, ale Ala Denkɛ gbu le kɛtɔ a jɛlɛ bilala Ala fanga kɔlɔ, fɔsa Ala yi kɛ fen bɛ kunna ko bɛ lɔ.

²⁹ Ni fulenilu lawuliko tɛ tuɲa le, mɔɔ minu yi makoli sɔlɔnna fulenilu ya ko lɔ, wolu yi mindɛ le ɲininna? Ni fulenilu la tɛnala wulila ka bɔ saya lɔ, mindɛ lɔ mɔɔlu yi makoli sɔlɔnna ka bɛn fulenilu ma?

³⁰ Ǹu do? Mindɛ lɔ m'i masuwako dakɔlɔ waate bɛ?

³¹ Lon bɛ ǹ'i saya le dakɔlɔ. M̀ badenmalu, ǹ'i wo fɔla kamasɔlɔn ǹ ɲalɔkɛnɛyanin ka bɛn ài ma mɔ Tii Masa Tɔɔmasenin Isa ya kafonɲɔɔya lɔ.

³² Ǹ na sɛɛ min kɛla Ɛfɛsi so kɔnɔ ka kɛ iwo ǹe ni soofalilu tɛɛ v'i ɲɔɔ na, ni wo kɛnin tɛɛ m̀ bolo adamadennu ya ko le lɔ dein, ǹ kɛtɔ nafa mindɛ le sɔlɔnna wo la? Ni fulenilu la tɛnala wulila ka bɔ saya lɔ, wo vɛ kɛla: «Ài m'i dɔnni kɛ k'i min, kamasɔlɔn mɔ satɔle sinin.»

³³ Ài k'ài jɛlɛ lafili: «Diɲɔɔ yon ne yi sɔn ɲuma tiɲala.»

³⁴ Ài y'ài hangili sii iwo ài ka kan k'a kɛ teme! Ài do kà to julumbu tala. Kamasɔlɔn ài dɔlu ma Ala lɔn feu. Ǹ'i wo fɔla ka bɛn ài lamaloyako le ma.

Limaniyamɔɔlu falikolo kula

³⁵ Mɔɔ dɔ kɛtɔ ɲiningali kɛla, a vɛɛ: «Fulenilu lawuliko kɛtɔ kɛla di? Falikolo suu mindɛ le kɛtɔ kɛla ai ma?»

³⁶ Ile hangilindan! Ni i ka malo kolo sɛnɛ, a tɛnala fɛlɛnna ni a ma don fulu kɔlɔ ka tunun kunfɔlɔ le.

³⁷ Ado i yi min sɛnɛna, wo tɛ a fɛlɛn ne, mafɔ a kolo, a ka kɛ malo le o, niwotɛ fen kolo suu suu.

³⁸ Ala le y'a lafɛlɛnna ka bɛn a sawo ma, kolo suu bɛ ni ai ta fɛlɛn ne.

³⁹ Niimafennu bɛ falikolo tɛ kelen ne. Adamadennu falikolo yi je jɛ. Kolofennu ta yi je jɛ. Kɔnɔlu ta yi je jɛ. Jɛɛlu fana yi wo boloɲa le ma.

⁴⁰ Sangbololɔfennu yi je ani duukolokɔkanfennu, kɛɛ sangbololɔ talu dalaya yi je jɛ, ani duukolokɔkan talu dalaya yi je wo boloɲa kelen ne ma.

⁴¹ Tele ta dalaya yi je jɛ, ani kalo ta, ani lolonilu ta. Hali loloni dɔlu ni a dɔlu dalaya tɛ kelen ne.

⁴² Fulenilu lawuliko kɛtɔ kɛla boloɲa wo le ma. Falikolo min sudoonnin, wo yi tiɲata le le. Kɛɛ falikolo min la kɛtɔ wulila ka bɔ saya lɔ, wo yi tiɲabali le le.

⁴³ Ai y'a magbeyanin donna duu kɔlɔ, kɛɛ a lawulitɔ dalaya le lɔ. Ai do y'a donna duu kɔlɔ a fangandanya le lɔ, kɛɛ a lawulitɔ fangamaya le lɔ.

⁴⁴ Falikolo jɛlɛla le su yi doonna, kɛɛ a lawulitɔ haijɛnɛ falikolo le lɔ. Komi falikolo jɛlɛla yi je jɛ, haijɛnɛ ta yi je fana jɛ.

⁴⁵ Wo le n'a kɛla, a sɛvɛnin kitabu kɔnɔ, ko: «Mɔɔ kunfɔlɔ, min taanin kɛla Adama le, wo ka kɛ niimafen ne.» Kɛɛ Adama laban ka kɛ Nii le le, min yi niimaya dila.

⁴⁶ Kɛɛ haijɛnɛ falikolo tɛ falikolo kunfɔlɔ le, mafɔ falikolo jɛlɛla le y'a kunfɔlɔ le. Min yi nala wo kɔ, wo le haijɛnɛ falikolo le.

⁴⁷ Mɔɔ kunfɔlɔ bɔnin duukolo le lɔ, k'a ladan duu bamu le, k'a talan mɔɔ filana bɔnin haijɛnɛ le lɔ.

⁴⁸ Mɔɔ minu yi duukolo ta le, wolu bɔnin kɛ́ kelen wo le la, min ladannin duu bamu le. Kɛɛ mɔɔ minu yi haijɛnɛ ta le, wolu bɔnin kɛ́ kelen wo le la, min bɔnin haijɛnɛ.

⁴⁹ Mɔ sɔlɔnnin kɛ́ wo sawula lɔ teme min ladannin duu bamu le, wo boloɲa kelen ma, mɔ kɛtɔ kɛ́ kelen wo le sawula tala min bɔnin haijɛnɛ.

⁵⁰ M̀ badenmalu, ǹ'i min fɔla yi ne, wo kɔlɔ le ko mɔ falikolo min yi bu ni jeli le, wo tɛ se donna Ala ya masaya lɔ, ado fen tiɲata fɛ tɛ se kɛla fen tiɲabali la.

⁵¹ Ài y'ài tolomalɔ gbonoko min na: Mɔ bɛ tɛnala sala, kɛɛ mɔ bɛ mafalintɔle

⁵² telemanin ɲamakaliya kelen kɔlɔ. Kamasɔlɔn buulufɛkan laban vɛ bɔla waate min nɔ, fulenilu la kɛtɔ wulila falikolo kula le lɔ, tiɲali fanga tɛ min nɔ, ani mɔ bɛ ma yi falinne.

⁵³ Kamasɔlɔn falikolo tiɲata min yi mɔ ma, fɔ wo ma yi falin ka kɛ a tiɲabali le, ado fɔ mɔ falikolo sata ma yi falin ka kɛ a sabali le.

⁵⁴ Ni falikolo tiɲata ma ka falin ka kɛ a tiɲabali le, ani fen sata ma ka falin ka kɛ a sabali le, wo vɛ kɛla, kitabu kɔnɔ kuma min mafatɔle, ko: «See vɛ sɔlɔn saya ma, ka saya latunun!

⁵⁵ Ile saya, iya seetiiya yi min? Ile saya, iya dimin yi min?»

⁵⁶ Saya dimin yi bɔla julumbu le lɔ, ado julumbu fanga yi bɔla seliya le lɔ.

⁵⁷ Kɛɛ m'i balika bɔla Ala yɛ, min yi see dila mɔ ma mɔ Tii Masa Tɔɔmasenin Isa sabu la!

⁵⁸ Wo le y'a ma, ǹ diyanan badenmalu, ài y'ài lɔgbeleya. Foi kà ài laseikɔ. Ài y'ài sɛmɛdon mɔ Tii ya baale ma waate bɛ, kamasɔlɔn ài k'a lɔn ne ko ài yi baale min kɛla mɔ Tii ya kafonɲɔɔya lɔ, wo tɛnala kɛla kofuun ne.