1 Kolɛntikalu 12 - Ala Ya Salatikan Kula Kitabu

Nii Sɛnɛyanin yi senko minu dila

¹ M̀ badenmalu, ài na ɲiningali min kɛla ǹ na ka bɛn senkolu ma, Nii Sɛnɛyanin yi minu dila, ǹ t'a fɛ ài yi to divi lɔ ka bɛn wolu ma.

² Ài k'a lɔn ne ko ài tɛɛ Alalɔnbali le waate min nɔ, ài la ka fili boloɲa suu bɛ dɔ ma k'ài bila joo dandannu kɔ.

³ Wo lɔ, ǹ'a fɛ ài y'a ɲaye ko mɔɔ min vɛ kɛla kumala Ala Nii Sɛnɛyanin sabu la, wo tii tɛnala a fɔla ko: «Isa daanyine!» Ado mɔɔ tɛnala a fɔla ko: «Isa yi ǹ Tii le le», ni Nii Sɛnɛyanin tɛ wo tii ma fɛ.

⁴ Senko suu siyama yi dila mɔɔlu ma, kɛɛ wo bɛ yi bɔla Nii Sɛnɛyanin kelen ne lɔ.

⁵ Baale suu siyama yi je fana, kɛɛ wo bɛ yi kɛla mɔ Tii kelen ne yɛ.

⁶ Baale kɛɲa fana walayine, kɛɛ Ala kelen ne yi wo bɛ kɛ see dila mɔɔ bɛ ma.

⁷ Nii Sɛnɛyanin ne yi see dila mɔɔ kelenkelenna bɛ ma, bɛ mako laɲiako lɔ.

⁸ Nii Sɛnɛyanin yi see dila dɔ ma ka kuma hangilimaya boloma, ka see di a dɔgbɛlɛ ma ka kuma lɔnni boloma.

⁹ Nii Sɛnɛyanin kelen wo le yi limaniya dila dɔ ma, ka mɔɔlakɛnɛya see di a dɔgbɛlɛ ma.

¹⁰ A do yi kawananko kɛ see dila dɔ ma, ka kelayakɛ see di a dɔgbɛlɛ ma, ani ka kolakɔlɔsi see di a dɔgbɛlɛ ma kɔtunun fɔsa a yi se Nii Sɛnɛyanin kɛkolu ni Soitana talu wotɛbɔla teme. A yi see dila dɔ ma ka kuma kan gbɛlɛlu lɔ, ka see di a dɔgbɛlɛ ma ka kan wolu kɔlɔ fɔ.

¹¹ Nii Sɛnɛyanin kelen ne yi see wolu bɛ labaalela, ka mɔɔ kelenkelenna bɛ sɔ wo dɔ sɔ ka bɛn a jɛlɛkanu sawo ma.

Falikolo kelen ne mɔ le

¹² Fan siyama le yi mɔɔ falikolo ma, wo bɛ n'a kɛ, ai bɛ lakunnin kɛnin falikolo kelen ne le, hali ai walanin ka kɛ. Masa Tɔɔmasenin fana yi wo boloɲa kelen ne ma.

¹³ Kamasɔlɔn mɔ bɛ makonin Nii Sɛnɛyanin kelen ne bolo ka mɔ kɛ falikolo kelen ne. Wo le y'a ma, i ka kɛ Jahudiya le o, i ka kɛ siboloma gbɛlɛ le o, i ka kɛ jɔn ne o, i ka kɛ mɔɔ lafɛlɛnin ne o, mɔ bɛ laminnin Nii Sɛnɛyanin kelen ne le.

¹⁴ Fan kelen tɛ mɔɔ falikolo ma, mafɔ fan siyama.

¹⁵ Ni sen k'a fɔ, a vɛɛ: «Komi ǹ tɛ bolo le, wo lɔ, ǹ tɛ falikolo fan dɔ le,» jalasa kuma wo yi sene a bɔla falikolo fanya la?

¹⁶ Ni do tolo k'a fɔ, a vɛɛ: «Komi ǹ tɛ ɲaden ne, wo lɔ, ǹ tɛ falikolo fan dɔ le,» jalasa kuma wo yi sene a bɔla falikolo fanya la?

¹⁷ Ni falikolo bɛ tɛɛ ka kɛ ɲaden ne dein, a tɛɛ se ko mɛnna di? Ni do falikolo bɛ tɛɛ ka kɛ tolo le dein, a tɛɛ se fen suma mɛnna di?

¹⁸ Tuɲa le, Ala na falikolo fan kelenkelenna bɛ tuuntuunna i ɲɔɔ na ka bɛn a sawo le ma.

¹⁹ Ni falikolo fan bɛ tɛɛ ka kɛ munungulun, a tɛɛ tɛnala kɛla falikolo bɛlɛbɛlɛ le, kɛlɛ?

²⁰ Wo ma yi ne, fan siyama le yi falikolo ma, kɛɛ falikolo kelen ne.

²¹ Wo lɔ, ɲaden tɛ se a fɔla bolo yɛ, ko: «M̀ mako pa t'i la.» Kun tɛ se a fɔla sennu yɛ, ko: «M̀ mako pa t'ài la.»

²² Kɛɛ mɔ tɛ mɔ falikolo fan minu yena fen kaalama le, mɔ mako yi wolu le la bubale.

²³ Ado mɔ jɔnin falikolo fan minu ma ko ai tɛ fen ne, m'i wolu le magbiliyala ka timin a fan tɔlu la. Mɔ falikolo fan minu yenko bɛnnin tɛ, m'i wolu le ɲamadonna kobɛn,

²⁴ k'a talan mɔ tɛ wo kɛla mɔ fan dɔlu la, minu yenko bɛnnin. Ala gbu na mɔ falikolo fannu tuuntuunna i ɲɔɔ na teme ka magbiliyali ba di fan dɔlu ma, mɔ tɛ minu yena fen kaalama le.

²⁵ A na wo kɛla fɔsa falanɲɔɔya kana don falikolo fannu tɛma, mafɔ ai kelenkelenna bɛ y'ai jando i ɲɔɔ nɔ.

²⁶ Ni falikolo fan dɔ ka tɔlɔya, a fan tɔ bɛ le kɛtɔ tɔlɔyala a fɛ. Ni do falikolo fan dɔ ka buɲali sɔlɔn, a fan bɛ yi sawale a fɛ.

²⁷ Masa Tɔɔmasenin falikolo le ài le, ado ài kelenkelenna bɛ y'a fan dɔ le le.

²⁸ Ala na mɔɔ minu lasiila limaniyajama tɛma, keladennu le ka kɛ a kunfɔlɔ le, ka kelalu kɛ a filana le, ka kalanmɔɔlu kɛ a sawana le. A do ka kawanankokɛbalu tuun wolu la, ani mɔɔ minu yi jangalotɔlu lakɛnɛyala, ani mɔɔ minu yi dɔlu madɛmɛnna, ani ɲamɔɔlu, ani mɔɔ minu yi kumala kan gbɛlɛlu lɔ.

²⁹ Jalasa bɛ yi keladen ne le? Bɛ yi kela le le? Bɛ yi kalanmɔɔ le le? Bɛ yi kawanankokɛba le le?

³⁰ See yi bɛ le yɛ ka jangalotɔlu lakɛnɛya? Bɛ le yi kumala kan gbɛlɛlu lɔ? Bɛ le yi kan gbɛlɛlu kɔlɔ fɔla?

³¹ Wo lɔ saa, fɔ ài y'ài nii la Ala ya senko kaalamalu kɔkan. Ǹe do kɛtɔ siya bɛ lɔ kein ne jiyala ài la butu.