1 Kolɛntikalu 1 - Ala Ya Salatikan Kula Kitabu

¹ Ǹe Pɔli, min kilinin ka kɛ Masa Tɔɔmasenin Isa ya keladen ne ka bɛn Ala sawo ma, ani mɔ badenma Sositɛnɛ, ǹu mɔɔ fila le yi lɛtɛlɛ min sɛvɛla.

² M'a lataala Ala ya limaniyajama le ma Kolɛnti so kɔnɔ, àilu minu bilanin ài ta fan Masa Tɔɔmasenin Isa bolo ani k'ài kili k'ài kɛ mumininnu le, ani mɔɔ minu bɛ yi Masa Tɔɔmasenin Isa tɔɔ kilila fan bɛ lɔ, ale min yi ǹu ni ailu Tii le.

³ Mɔ Fa Ala ni mɔ Tii Masa Tɔɔmasenin Isa ya nɛɛma yi kɛ ài yɛ k'ài josolajii.

Pɔli ya balika bɔ Ala yɛ

⁴ Ǹ'i balika bɔla ǹ Tii Ala yɛ waate bɛ àiya ko lɔ ka bɛn aa nɛɛma ma, min dinin ài ma Masa Tɔɔmasenin Isa sabu la.

⁵ Ka bɛn ale le ma, ài vɛ sawati boloɲa suu bɛ ma, kumafɔɲa see ni lɔnni bɛ lɔ.

⁶ Wo boloɲa ma, maa seleyakan ka bɛn Masa Tɔɔmasenin ma, wo la vɛ sawati ài tɛma.

⁷ Wo lɔ saa, Ala yi sɔli minu dila, ài dɛsɛnin tɛ wo foi la, ài vɛ mɔ Tii Masa Tɔɔmasenin Isa nalon makɔnɔna.

⁸ A do kɛtɔ a kɛla, ài bamanin totɔ haan fɔɔ a laban na, fɔsa ài yi kɛ jalakibali le mɔ Tii Masa Tɔɔmasenin Isa ya lon na.

⁹ Ala yi lanande le le, ale min n'ài kilila k'ài ladon a Denkɛ ya kafonɲɔɔya lɔ, min taanin kɛla mɔ Tii Masa Tɔɔmasenin Isa le.

Kolɛnti limaniyajama ya bɛnbaliya

¹⁰ M̀ badenmalu, ǹ'ài madiyala mɔ Tii Masa Tɔɔmasenin Isa tɔɔ lɔ, ǹ ko, ài yi bɛn a lɔ, fɔsa falanɲɔɔya kana don ài tɛma, mafɔ ài yi kɛ kelen ne ài miliya ni àiya kolatɛɛnin bɛ lɔ.

¹¹ Kamasɔlɔn m̀ badenmalu, Kolowe ya bonnamɔɔ dɔlu vɛ dandɛɛli kɛ ǹ yɛ ko bɛnbaliya le ài tɛma.

¹² N'i min fɔla yi ne, wo le min ne: A dɔ vɛɛ ko: «Ǹe yi Pɔli le fɛ.» A dɔgbɛlɛ vɛɛ ko: «Ǹe yi Apolosi le fɛ.» A dɔgbɛlɛ vɛɛ ko: «Ǹe yi Piyɛli le fɛ.» A dɔgbɛlɛ vɛɛ ko: «Ǹe yi Masa Tɔɔmasenin le fɛ.»

¹³ A yi di wo lɔ? Jalasa Masa Tɔɔmasenin lɔtalayine? Jalasa ai na ǹe Pɔli le gbaanna kɔlɔman ma àiya ko lɔ? Niwotɛ, ài makonin ji kɔlɔ ǹe Pɔli le tɔɔ lɔ?

¹⁴ Ǹ'i Ala tanu, kamasɔlɔn m̀ ma ài suu suu mako ji kɔlɔ, mafɔ Kilisipusi ni Gayusi,

¹⁵ alako mɔɔ kana a fɔ ko a na makoli sɔlɔnna ǹ tɔɔ le lɔ.

¹⁶ Tuɲa le, ǹ na Sitɛfanasi ya bonnamɔɔlu makola ji kɔlɔ. Ka bɔ wo kɔ, ǹ hangili ma to a lɔ ni ǹ na mɔɔ gbɛlɛ makola ji kɔlɔ.

¹⁷ Kamasɔlɔn Masa Tɔɔmasenin ma ǹ kelaya ka mɔɔlu mako ji kɔlɔ, kɛɛ a na ǹ kelayala Samakan Kein lasenko le lɔ. Ǹe do tɛ wo kɛla dalɔdiya kuma le ani adamadennu ya hangilimaya, fɔsa Masa Tɔɔmasenin gbaankɔlɔman kana kɛ kofuun ne.

Ala ya seetiiya ni aa hangilimaya

¹⁸ Samakan ka bɛn Isa gbaanko ma kɔlɔman ma, mɔɔ minu yi halaki siya kɔkan, wolu yi wo yena ko kundan ne le. Kɛɛ do, ǹu minu yi lakisili siya kɔkan, wo yi mɔ bolo Ala ya seetiiya le le.

¹⁹ Kamasɔlɔn a sɛvɛnin kitabu kɔnɔ, ko: «Ǹ kɛtɔ hangilimalu ya hangilimaya tiɲala, ka lɔnnilalu ya lɔnni kɛ kofuun ne.»

²⁰ Hangilimalu yi se mindɛ fɔla butu? Seliya kalanmɔɔlu yi se mindɛ fɔla butu? Bi sɔsɔyalindelu yi se mindɛ fɔla butu? Jalasa Ala m'a lagbɛ ko dunuɲa min hangilimaya yi hangilindanya le le?

²¹ Ala k'a latɛɛ aa hangilimaya lɔ ko dunuɲa ni aa hangilimaya bɛ, a ma se Ala lɔnna a jɛlɛkanu ya hangilimaya fɛ. Kɛɛ a do ka diya Ala yɛ ka a malimaniyamɔɔlu lakisi ka bɛn kawanili wo ma, dunuɲamɔɔlu yi min jatela hangilindanya kuma le.

²² Jahudiyalu y'a fɛ ka kawanankolu ye ai ɲa la. Gɛlɛkikalu do yi hangilimaya le ɲininna.

²³ Kɛɛ Masa Tɔɔmasenin gbaanko kɔlɔman ma, m'i wo le kawanili kɛla. Wo do kɛnin kunnɔtɛɛko le le Jahudiyalu ɲakɔlɔ, ani ka kɛ kofuun ne siboloma gbɛlɛ mɔɔlu ɲakɔlɔ.

²⁴ Kɛɛ Ala ya mɔɔ kilininnu koni, ai ka kɛ Jahudiya le o, ai ka kɛ siboloma gbɛlɛ le o, Masa Tɔɔmasenin yi wolu bolo Ala ya seetiiya ani aa hangilimaya le le.

²⁵ Kamasɔlɔn Ala ya hangilimaya min kɛnin hangilindanya le adamadennu ɲakɔlɔ, wo le timinnin adamadennu ya hangilimaya bɛ la. Ado Ala ya fanga min kɛnin fangandanya le adamadennu ɲakɔlɔ, wo le timinnin adamadennu ya fangamaya bɛ la.

²⁶ M̀ badenmalu, ài yi mili ài tɛɛ teme, Ala n'ài kilila waate min nɔ. Dunuɲamɔɔlu tɛɛ tɛ ài siyama yena hangilima le, niwotɛ fangama, niwotɛ hɔlɔden.

²⁷ Kɛɛ dunuɲamɔɔlu yi fen minu tala fen kundan ne, Ala na wolu le tala fɔsa a yi hangilimalu lamaloya. Ado dunuɲamɔɔlu yi fen minu tala fen fangandan ne, Ala na wolu le tala fɔsa a yi fangamalu lamaloya.

²⁸ Dunuɲamɔɔlu yi fen minu dɔɔyala k'ai lagbeyaɲɛ ani ka jɔ ai ma, Ala na wolu le tala fɔsa fen jateninnu kana kɛ fen ne.

²⁹ Wo le n'a kɛla, mɔɔ mɔɔ tɛ se a jɛlɛ matɔɔla Ala ɲakɔlɔ.

³⁰ Ala le n'ài kafonna Masa Tɔɔmasenin Isa kɔkan, min kɛnin maa hangilimaya le ka bɔ Ala fɛ. Wo sabu la, mɔ vɛ kɛ telenmande le Ala ɲakɔlɔ, ka mɔ lasɛnɛya, ani ka mɔ kunmaka.

³¹ Wo le n'a kɛla, a sɛvɛnin kitabu kɔnɔ tan, ko: «Ni mɔɔ min y'a fɛ k'a waso, fɔ wo tii y'a waso mɔ Tii ya kokɛninnu le la.»