Tito 2 - U Maganda A Baheta Ni Jesu-Cristo

U Tama a Kákkabiyag

¹ Pero hiko Tito, ay itoldu mo u adal a neayun tu tama a toldu.

² Tolduwan mo u lállakay hide a magin mahinahun, kagalang-galang, mapagpugád ti sadile, matatag ti pánnampalataya, págmahal sakay matiyaga.

³ Kagiyán mu be tu bábbekás a mabiyag hide a tehhod a kabanalan, awan mametmet, sakay awan makánlasingán nan hide u dapat a magtoldu tu maganda a ugale.

⁴ Tánni matolduwan u anak palla hide a bábbey ate kabanga a mahalán u kákkabanga de sakay tu anak de.

⁵ Matolduwan nakwa hide a magin mahinahun, tanni u maganda la u gimitán de sakay isipán, sakay magin masipag tu gággimitán tu bilay, mabait, matapat sakay mágpasakup tu kákkabanga de. Tánni konna hod ay awan ti magkagi ti madukás kontara tu upos nu Diyos.

⁶ Tolduwan mu be u áolito hide a magpugád tu sadile de tu atanan a bagay.

⁷ Sakay hiko a mismo u mángpeta ti maganda tu atanan a gimitán mo tánni magin halimbawa ka tu atanan. Ipeta mo u katapatan tu págtoldu mo tánni ketan de a tatahoden u págserbi mo ni Cristo.

⁸ Gamitán mo u mágkalinis hide a pággupos tánni awan ti makamansa tu kákkagiyán mo. Ni konna hod ay mapasanike u kadima tam hide dipo awan hide ti makagi a madukás kontara nikitam.

⁹ Tolduwan mo be u alipin hide a sumunud tu amo de hide tánni masaya nide u amo de. Sakay dyan de hide tábbeg-tabbegán,

¹⁰ sakay diyan dibe hide pagtakawan, nan ipeta de a tapat hide tu atanan a bagay. Tánni mepeta de u kagandaan nu toldu hide a gábwat tu Diyos a Tagapagligtas tam.

¹¹ Dipo impeta dán nu Diyos u kagbi na a makapangatád ti kaligtasan tu atanan a tolay.

¹² U kagbi na u nangtoldu nikitam tánni adággen tamon u kákkabiyag a makamundu sakay u kagustuwan nu pilas tánni mabiyag kitamon nadid a tehhod a págpugad ti sadile, banal sakay karapat-dapat tu Diyos,

¹³ mentras a maguhay kitam tu dakila a aldew a áasaan tam. Iye u kássole nu dakila tam a Diyos sakay Tagapagligtas a ti Jesu-Cristo.

¹⁴ Inyatád na u biyag na tánni tubusán na kitam tu atanan a kadukássan tam. Sakay lininisan na kitam tánni magin kao na a tolay a magággustuwán a maggimet ti maganda.

¹⁵ Itoldu mo iye hide a atanan sakay kagiyan mo hide a sunudán di iye. Te kapangyariyan ka a pagkagiyan hide ni kailangan kaya dyan mo pabayan a tehhod a mángmemenos niko.