Roma 9 - U Maganda A Baheta Ni Jesu-Cristo

U Diyos sakay tu Pinile na Hide

¹ Nadid, hikán a mánnampalataya ni Cristo ay te kagiyánák nikam. Tatahoden u kagiyán ko awanák magbule-bule, sakay u Banal a Ispirito u mangpatunay a malinis u konsensiya ko a tatahoden u kagiyán ko.

² Garabi a tahod i lungkut kuwáy sakay awan maibut i saket ni puso kuwáy,

³ para tu kabanuwan ko hide a Judio. Ni maare la nakwa ay hikán dálla u sumpaán nu Diyos sakay mehiwalay ni Cristo para la a maligtas hide.

⁴ Bilang Israelita ay inturing hide nu Diyos a anak na, impeta na nide u kadakilaan na, naggimet u Diyos ti kasunduwan nide, inyatád na nide u Kautusan, tinolduwan na hide tu tama a págsamba sakay makpal a pananto u Diyos nide.

⁵ U ninuno de hide ay pinile nu Diyos sakay u lahe de u ginábwatan ni Cristo nikuna a nagin tolay siya, u Diyos a makapangyariyan tu atanan sakay dapat a papuriyan a hanggan-hanggan! Amen.

⁶ Awan na gusto a kagiyán a awan natupad u pananto nu Diyos, dipo awan hide simmapalataya, dipo awan atanan a gábwat ti Israel ay kaguman tu banuwan a pinile na.

⁷ Sakay awan atanan a gábwat ni Abraham ay meturing a anak na. Dipo kinagi nu Diyos ni Abraham, “U gábwat la ni Isaac u ibilang a lahe mo a impananto ko niko.”

⁸ U gusto na a kagiyán ay awan atanan a anak ni Abraham ay imbilang a anak nu Diyos, ni awan u anak la hide ayun tu nepananto u ibilang a lahe na.

⁹ Dipo konna he u pananto, “Soliyák ti taunay, ti konna labe nadid a panahun, sakay magkahod ka ti anak a lállake, Sara.”

¹⁰ Sakay bakán la sa itod. Tu pamamag-itan nu duwwa a anak ni Rebeca sakay tu ninuno tam a ti Isaac, impeta be nu Diyos a bakán a atanan a gábwat ni Abraham ay inturing a anak na hide.

¹¹ Impakilala nu Diyos a u págpile na ay ayun tu sadile na a plano sakay bakán a tu gimet nu tolay. Dipo bagu pa a meenak u anak hide sakay bagu pa a makagimet ti maganda oni madukás,

¹² kinagi nu Diyos ni Rebeca, “Magserbi u ákka tu wadi na.”

¹³ Konna tu kinagi na tu Kautusan, “Minahal ko ti Jacob pero ti Esau ay awan.”

¹⁴ Ni konna hod makagi tam beman a awan makatarungan u Diyos? Awan!

¹⁵ Dipo kinagi na ni Moises, “Mahabagák tu gusto ko a kahabagen sakay kagbiyan ko u gusto ko a kagbiyan.”

¹⁶ Ni konna hod, u págpile nu Diyos ay bakán a ayun tu kagustuwan nu tolay oni tu pággimet ti maganda, ni awan tu kagbi la nu Diyos.

¹⁷ Dipo ayun tu Kasulatan, kinagi nu Diyos ni Faraon a hare ti Egipto, “Indátton taka a hare tánni tu pamamag-itan nu gimitán ko a kontara niko ay mepeta u kapangyariyan ko sakay makilala u ngahan ko ti munduway.”

¹⁸ Kanya kahabagen nu Diyos u gusto na a kahabagen sakay paigáttán na ti ulo u gusto na a paigáttán.

¹⁹ Makay kagiyán de dammán nikán nadid a, “Bakin a kákkagiyán nu Diyos a dapat managut u tolay hide tu kasalanan de? Deya beman u makalaban tu kaluuben na?”

²⁰ Pero hiko a tolay la deya ka beman para tumábbeg ti konna hina tu Diyos? Makagi beman nu ginimet tu nanggimet nikuna a, “Bakin a ginimiták mo a konna he?”

²¹ Konna tu essa a maggimet ti banga, te karapatan siya a gimitán u luta ayun tu gustu na. Te karapatan siya a maggimet ti essa a kasangkapan a mágkamahal sakay essa be a kalase a mágkamura la.

²² Konna pa man hod, gusto nu Diyos a ipeta u iyamut na sakay u kapangyariyan na, pero pinagtiyagaan na sakay pinagtiisan u tolay hide a dapat dán nakwa a parusaan sakay puksaán.

²³ Ginimet na iye tánni ipeta na u awan ti kapareho a kadakilaan na tu tolay hide a kinahabagen na, a tu itod pa ay inhanda na dán para parangalan na.

²⁴ Sakay awan dán ti iba nan hikitam a dinulaw na, bakán la a u gábwat tu Judio hide nan u gábwat be tu Hentil hide.

²⁵ Konna he u kinagi na tu libro ni Oseas: “U date a bakán ko a banuwan ay dulawán a banuwan ko, sakay u date a awan ko mahal ay dulawán a mahal ko.

²⁶ Sakay u kinagiyan na a bakán na a banuwan! Ay madulawan a anak nu Diyos a biyag.”

²⁷ Konna bi he u impahayag ni propeta Isaias tungkul ti Israel, “Maske ni konna ti kakpal tu baybay tu diget u magin anak ni Israel ay sasangan la nide u maligtas.

²⁸ Dipo mahigpit sakay alisto a gimitán nu Panginoon u pághatul na ti munduway.”

²⁹ Kinagi be ni Isaias a, “Ni u Panginoon a Makapangyariyan tu atanan ay awan nángwahak tu lahe tam, hikitam nakwa ay nagin konna ti Sodoma sakay Gomora.”

U Israel sakay u Maganda a Baheta

³⁰ Ánya nadid u makagi tam tungkul ti iye? U bakán hide a Judio a awan nagsikap a magin makasaya tu Diyos ay kinasayaan na hide, imbilang na hide a awan ti kasalanan tu pamamag-itan nu pánnampalataya de nikuna.

³¹ Pero u Judio hide a nagsikap a meturing a awan ti kasalanan tu pamamag-itan nu kássunud de tu Kautusan ay awan nagtagumpay.

³² Bakin awan hide nagtagumpay? Dipo nagtiwala hide tu gimet de sakay awan hide simmampalataya ni Jesu-Cristo. Nehakpa hide tu bito a kákkehakpaan.

³³ Ayun tu nesulat, “Nángdáttonák ti Sion ti essa a bito a kákkesángdulan, essa a bito a kákkehakpaan de. Pero awan mabigu-bigu u manampalataya hide nikuna.”