Roma 8 - U Maganda A Baheta Ni Jesu-Cristo

Mabiyag Ayun tu Ispirito

¹ Kanya nadid, ay awan dán mahatulan ti kaparusaan u katoy ni Cristo Jesus.

² Dipo tu pákpagkaessa tam ni Cristo Jesus, ay napalaya kitamon tu kapangyariyan nu kasalanan sakay kamatayan tu pamamag-itan nu kapangyariyan nu Banal a Ispirito a makapangatád ti biyag.

³ U Kautusan ay awan makapangibut tu kapangyariyan nu kasalanan tu biyag tam dipo tu kahinaan nu makasalanan tam a pagkatolay. U Diyos u nangibut nikuna a pinaangay nahe u sadile na a anak a konna tu essa a tolay a makasalanan tánni magin alay para tu kasalanan tam. Sakay nikuna a nagin tolay siya ay tinapos nu Diyos u kapangyariyan nu kasalanan.

⁴ Ginimet iye nu Diyos tánni u ipatupad nu Kautusan ay matupad tam be a mabiyag tu págiyya nu Banal a Ispirito sakay bakán a ayun tu makasalanan tam a pagkatolay.

⁵ Dipo u mabiyag hide ayun tu hilig nu pilas ay gugusto de u bagay hide a ayun tu pilas, pero u mabiyag ayun tu pággiya nu Ispirito ay magsumikap a maggimet tu bagay hide a ayun tu kagustuwan nu Banal a Ispirito.

⁶ U sapitán nu kássunud tu makasalanan a pagkatolay ay kamatayan, pero u sapitán nu kássunud tu kagustuwan hide nu Banal a Ispirito ay kapayapaan sakay biyag a awan ti kahád.

⁷ Dipo kalaban nu Diyos u deyaman a sumunud tu gusto nu makasalanan a pagkatolay, dipo umád na a sumunud tu Kautusan nu Diyos sakay talaga a awan na magimet a sumunud.

⁸ Kanya u tolay hide a mabiyag ayun tu makasalanan de a pagkatolay ay awan hide maare a kasayaan nu Diyos.

⁹ Pero awan kamon mabiyag a ayun tu makasalanan a pagkatolay nan ayun tu pággiya nu Banal a Ispirito, ni talaga a mágyan nikam u Ispirito nu Diyos. Ni u Ispirito ni Cristo ay awan tu essa a tolay ay bakán siya a kán Cristo.

¹⁰ Pero dipo mágyan dán nikam ti Cristo maski matay dán u bággi moy dipo tu kasalanan ay biyag u ispirito moy dipo imbilang kamon nu Diyos a matuwid.

¹¹ Sakay dipo mágyan dán nikam u Ispirito nu Diyos a nangbiyag a huway ni Jesu-Cristo, itod be a Diyos u mangatád ti biyag tu bággi moy a te kamatayan tu pamamag-itan nu Ispirito nu Diyos a mágyan nikam.

¹² Kanya kákkapatkákka ko hide, dyan kitamon mabiyag a ayun tu makasalanan tam a pagkatolay.

¹³ Dipo matay kam ni mabiyag kam ayun tu makasalanan moy a pagkatolay. Pero mabiyag kam ni adággen moy u makasalanan moy a pagkatolay tu pamamag-itan nu pággiya nu Banal a Ispirito.

¹⁴ U atanan a igiya nu Ispirito nu Diyos ay anak hide nu Diyos.

¹⁵ Dipo awan kam timmanggap ti ispirito nu kákkaalipin tánni huway a manteng. U tinanggap moy ay Ispirito a magin anak nu Diyos, sakay iye u mangatád nikitam ti karapatan a dumulaw nikuna a, “Ama! Ama ko!”

¹⁶ U Banal a Ispirito sakay u ispirito tam ay pareho a mangpatunay a anak kitam nu Diyos.

¹⁷ Sakay bilang anak hide nu Diyos, hikitam ay tagapagmana nu Diyos sakay kaguman ni Cristo a magmana tu págpapala hide a inhanda na. Dipo ni magtiis kitam a konna ni Cristo tu itod ay dumemát u aldew a parangalan na kitam a kaguman na.

U Gantimpala a Dumemat

¹⁸ Para nikán, u paghihirap tam nadid hide ay awan mekompara tu maganda a kalagayan a makao tam káddemát nu aldew.

¹⁹ Maski ni u buo a linalang hide nu Diyos ay gusto di dán a ipahayag nu Diyos u anak na hide.

²⁰ Dipo atanan a ginimet nu Diyos ay awan nanatile tu date de a maganda a kákkagimet dipo nesale hide tu kaparusaan a gábwat tu Diyos. Nangyare iye dipo bakán a gusto de nan dipo iye u gusto nu Diyos. Pero inatádden na hide ti pag-asa.

²¹ Dipo dumemát u aldew a baguwán nu Diyos u atanan a bagay para awan ti mahunot sakay mesale hide tu maluwalhate a kalayaan nu anak hide nu Diyos.

²² Tukoy tam a hanggan nadid, u buo a linalang ay maghirap sakay mágdadaingán a konna tu essa a bábbey a magenak dán.

²³ Sakay bakán la a hide! Maski hikitam a timmanggap tu Banal a Ispirito bilang dipalongo a kaluub nu Diyos ay mágdadaingán be mentaras a maguhay kitam a matubus u bággi tam sakay ihayag nu Diyos a anak na kitam.

²⁴ Ligtas kitamon sakay maguhay kitam dálla a makompleto i kaligtasanan iye. Umasa kitam dipo awan palla u asaan tam. Deya beman u umasa tu katoy dán hina a asaan na?

²⁵ Pero ni umasa kitam tu awan tam áelingan ay uhayán tam ina a tehhod a págtiyaga.

²⁶ Sakay tulungan kitam nu Banal a Ispirito tu kahinaan tam. Awan tam tukoy ni kodya kitam a magdasal, kanya u Ispirito u mamagitan nikitam tu Diyos tu paraan a awan tam kaya a ikagi.

²⁷ Sakay maintendiyan nu Diyos a makatukoy tu lasán nu puso nu tolay u ánya man a kagiyán nu Banal a Ispirito. Dipo u Banal a Ispirito u mamagitan para nikitam a anak nu Diyos, sakay iye ay palagi a ayun tu kaluuben nu Diyos.

²⁸ Tukoy tam atu atanan a bagay, ay magahikad u Diyos para tu kapiyyaan nu atanan a mangmahal nikuna. Iye u gággimitán nu Diyos tu atanan a mangyare tu tolay hide a pinili na a makaguman tu plano na.

²⁹ Dipo sapul pa tu itod ay tukoy dán nu Diyos ni tideya u para nikuna, pinile na dán hide a magin konna tu Anak na ati Jesus, tánni siya u magin panganay tu makpal a mátkaka.

³⁰ Kanya u tolay hide a pinile nu Diyos tu itod pa ay dinulaw na tánni magin anak na hide, sakay u dinulaw na hide ay imbilang na hide a matuwid, sakay u imbilang na hide a matuwid ay inatádden na ti karangalan.

U Págmahal nu Diyos

³¹ Nadid, ni isipán tam u atanan a mágkaganda a bagay a ginimet nu Diyos para nikitam dapat konna he u makagi tam: Ni u Diyos ay kakampe tam tideya u magtagumpay kontara nikitam?

³² Ni u sadile na a Anak ay awan na inkemot ni awan inyatád na nikitam, siguradu a iyatád nabe nikitam u atanan a bagay.

³³ Awan ti makapángkaso kontara nikitam a pinile nu Diyos a hikitam ay makasalanan pade, dipo u Diyos dán a mismo u nángturing nikitam a matuwid kitamon?

³⁴ Awan be ti makahatul nikitam a dapat kitam a maparusaan dipo ti Cristo Jesus dán a mismo u hinatulan a matay para nikitam. Sakay bakán la a ina; nan biniyag siya a huway sakay nadid ay hod dán siya tu kawanan nu Diyos sakay siya u mamagitan para nikitam.

³⁵ Awan ti makapánghiwalay nikitam tu págmahal ni Cristo. Maski magdanas kitam pa ti pághirap, saket, seste, aláp, awan ti mesulot, panganib, oni maski u kamatayan, dakál pade u págmahal ni Cristo nikitam.

³⁶ Ayun tu kinagi na tu Kasulatan a, “Alang-alang niko ay palagi a dilikadu ti kamatayan u biyag me. Kumán kame a u tupa hide a bunuwán.”

³⁷ Pero maski konna he u pághirap tam nadid, mapagtagumpayan tam pade i atananan iye, dipo ni Cristo a nangmahal nikitam.

^38-39 Awanák magduwwa-duwwa a awan ti makapánghiwalay nikitam tu págmahal nu Diyos. Maski dumemát u kamatayan tam, oni biyag kitam palla, maski u anghel hide, u puno hide u bagay hide nadid a kasalukuyan, u bagay hide a pademát, u tehhod hide a kapangyariyan, u kalangkawan, u kadisaladen, oni ányaman a linalang ay awan makapánghiwalay nikitam tu págmahal nu Diyos, u págmahal a impabate na nikitam tu pamamagitan ni Cristo Jesus a Panginoon tam.