Roma 7 - U Maganda A Baheta Ni Jesu-Cristo

Malaya Kitamon tu Kautusan

¹ Kákkapatkákka ko hide, tukoy ko a maintendiyan moy u batas a u essa a tolay ay sakup la nu batas mentaras biyag siya.

² Halimbawa, ayun tu batas, u essa a bábbey a tehhod a kabanga ay sakup la nu kabanga na habang biyag siya. Pero ni matay dán u kabanga na a lállake, ay malaya dán siya tu batas tungkul tu magkabanga.

³ Kaya ni mák-agum siya tu iba a lállake mentaras a biyag palla u kabanga na, ay nagkasala siya ti pángngalunya. Pero ni patay dán u kabanga na a lállake, malaya dán siya tu batas tungkul tu magkabanga. Sakay ni mákkabanga siya a huway, awan siya nagkasala ti pángngalunya.

⁴ Konna labe hod kákkapatkákka ko hide. Natay kamon tu Kautusan tu pamamag-itan nu kákkatay ni Cristo. Nabiyag a huway. Sakay hikam ay kao na dán tánni magbunga kam ti mágkaganda a gimet para tu ikasaya nu Diyos.

⁵ Nikuna a mabiyag kitam palla tu date tam a pagkatolay, u mágkadukás a kagustuwan nu bággi tam u naghare, sakay lalo pa a pinadukás nu Kautusan kaya nakagimet kitam ti bagay hide a madukás a u resulta na ay u kamatayan tam.

⁶ Pero nadid u kapareho tam ay u patay a awan sakup nu Kautusan i Kautusanan iye ay siya u nangalipin nikitam dipo awan tam kaya a sunudán. Pero nadid ay nawan dán u pagkukulang tam tu awan tam págsunud tu Kautusan. Kaya nadid u págserbi tam tu Diyos ay bakán dán a tu date a biyag a sakup nu Kautusan ni awan tu bigu a biyag a inyatád nu Ispirito Santo.

⁷ U gusto na beman a kagiyán ay madukás u Kautusan? Awan! Dipo awan ko nakwa natukuyan u kasalanan ni awan u Kautusan. Awan ko nakwa natukuyan ni ánya u pagin sakim ni awan kinagi nu Kautusan, “Dyan ka magin sakim.”

⁸ Pero dipo tu Kautusan, ay linukag nu kasalanan u baggi ko para tu atanan a kalase ni kasakiman. Dipo awan ti kasalanan ni awan ti Kautusan.

⁹ Nikuna a mabiyagák a awan ti Kautusan. Pero nikuna a matukuyan ko u Kautusan, sakay natukuyan ko a makasalananák bál sakay nahatulan ti kamatayan.

¹⁰ Kanya u Kautusan a dapat nakwa a mangatád ti biyag ay siya pa u nangatád nikán ti kamatayan.

¹¹ Dipo ginamit nu kasalanan u Kautusan tánni dayaánnák na, sakay dipo hod ay nahatulanák ti kamatayan dipo awan ko masunud u Kautusan.

¹² U Kautusan ay gábwat tu Diyos, kanya iye ay banal matuwid sakay maganda.

¹³ U gusto na beman a kagiyán a u mágkaganda a bagay u nangatád nikán ti kamatayan? Awan! U kasalanan ay siya u nangatád nikán ti kamatayan. Ginamit nu kasalanan u Kautusan a essa a maganda a bagay, tánni mahatulanák ti kamatayan. Sakay dipo hod, ay natukuyan ko ni sakodya ti kadukás u kasalanan.

¹⁴ Tukoy tam a u Kautusan ay maganda dipo gábwat tu Banal a Ispirito nu Diyos. Pero hikán ay makamundu, sakay alipin nu kasalanan.

¹⁵ Awan ko maintendiyan u sadili ko. Dipo awan ko magimet u mágkaganda hide a bagay a gusto ko a gimitán, sakay u bagay hide a umád ko a gimitán u gággimitán ko.

¹⁶ Nadid, ni awan ko gimitán u mágkadukás hide a gággimitán ko, u gusto na a kagiyán ay sang-ayunák tu kinagi nu Kautusan ay maganda.

¹⁷ Kanya kumán a bakán a hikán u maggimet ti madukás, nan dipo tu pagin makasalanan ko kanya magkasalaák.

¹⁸ Tukoy ko a awan ti maganda tu makasalanan ko a pagkatolay, dipo ni gusto ko a maggimet ti maganda, ay awan ko labe iye magimet.

¹⁹ Awan ko magimet u mágkaganda hide a bagay a gusto ko a gimitán, pero u mágkadukás a bagay a umád ko a gimitán, ay itod be u gággimitán ko.

²⁰ Ni gimitán ko u umád ko a gimitán, bakán dán a hikán u manggimet hod ni awan u makasalanan ko a pagkatolay.

²¹ Sa iye u natukuyan ko tu sadile ko. Ni gusto ko a maggimet ti maganda, ay hadlanganák nu madukás ko a pagkatolay.

²² Buo a pusowák a masaya tu Kautusan nu Diyos.

²³ Pero tehhod a agum a kapangyariyan a magahikad tu sadili ko. Tu isip ko ay gustu ko a maggimet ti maganda pero iba be u gimitán nu bágge ko dipo u madukás a kagustuwan nu bágge ko u lagi a masunud kanyaák a magkasala.

²⁴ Kakagbi u kalagayan ko! ti deya u mángligtas nikán tu makasalanan a bággi a makapangatád nikán ti kamatayan?

²⁵ Salamat tu Diyos, dipo siya u mángligtas nikán tu pamamag-itan ni Jesu-Cristo a Panginoon tam. Ni konna hod, iye u kalagayan ko, u isip ko ay magpasakupák tu Kautusan nu Diyos, pero dipo tu makasalanan ko a pagkatolay ay magkasalaák pade.