Roma 6 - U Maganda A Baheta Ni Jesu-Cristo

U Bigu Tam a Biyag ni Cristo

¹ Ánya nadid u makagi tam? Tulos-tulos kitam pade tu págkakasala tánni madagdagen u habag nu Diyos nikitam?

² Awan! Awan kitamon dapat mabiyag, tu págkakasala dipo konna kitam tu essa a patay a awan dán magkasala.

³ Awan moy beman tukoy a atanan tam ay nabawtismuwan ni Cristo Jesus, u gusto na a kagiyán ay kaguman kitam tu kákkatay na?

⁴ Kanya nikuna a nabawtismuwan kitam, nelábbáng kitam a kaguman ni Cristo tánni makaguman na kitam be a mabiyag. Kanya ni kodya a nabiyag ti Cristo tu pamamag-itan nu dakila a kapangyariyan nu Ama, hikitam be ay mabiyag tu bigu a biyag.

⁵ Dipo ni nákpagkaessa kitam ni Cristo tu kamatayan na, talaga a makaguman na kitam tu kákkabiyag na a huway.

⁶ Tukoy tam a u date tam a pagkatolay ay nepako dán tu kudus a kaguman ni Cristo, tánni matay u makasalanan tam a bággi, tánni awan kitamon maalipin pa nu kasalanan.

⁷ Dipo u tolay a patay dán ay napalaya dán tu kapangyariyan nu kasalanan.

⁸ Sakay ni hikitam ay natay a kaguman ni Cristo, maniwala kitam a mabiyag kitam be a kaguman na.

⁹ Dipo tukoy tam a ti Cristo ay nabiyag a huway sakay awan dán matay a huway. Awan dán nikuna ti kapangyariyan u kamatayan.

¹⁰ Nikuna a natay siya, ay natay siya a pumensan para tu kasalanan nu tolay hide, sakay u biyag na nadid ay para tu ikasaya nu Diyos.

¹¹ Kanya dapat moy a ibilang u sadile moy a patay dán tu kasalanan, pero biyag para tu Diyos dipo tu pákpagkaessa moy ni Cristo Jesus.

¹² Dyan moy dán pabayan a maghare u kasalanan tu bággi moy a matay tánni awan kamon maalipin tu atanan a kagustuwan na.

¹³ Dyan moy dán gamitán u hádya man a parte nu bággi moy tu pággimet ti kasalanan. Nan iyalay moy tu Diyos u sadile moy bilang tolay a inatádden ti bigu a biyag. Ilaan moy tu Diyos u bággi moy tu pággimet ti maganda.

¹⁴ Dipo awan dán dapat a maghare pa nikam u kasalanan, dipo awan kamon sakup nu Kautusan ni awan sakup dán nu habag nu Diyos.

U Alipin hide nu Katuwiran

¹⁵ Nadid, maggimet kitam pa beman ti kasalanan dipo awan kitamon sakup nu kapangyariyan nu Kautusan, nan sakup dán nu kapangyariyan nu habag nu Diyos? Awan!

¹⁶ Awan moy beman tukoy a ni sakup kam ni ti deyaman bilang essa a alipin, alipin kam ngane nu sássunudán moy. Kanya ni sássunudán tam u kasalanan alipin kitam nu kasalanan sakay u risulta na ay kamatayan. Pero ni sássunudán tam u Diyos alipin kitam nu Diyos a u risulta na ay matuwid a kákkabiyag.

¹⁷ Pero salamat tu Diyos dipo hikam a date a alipin nu kasalanan ay buo a puso moy dán a sinunud u adal a intoldu nikam.

¹⁸ Nadid, ay napalaya kamon tu kasalanan sakay alipin kamon nu katuwiran.

¹⁹ Magupusák tu pangkaraniwan a paraan para alisto moy a maintendiyan. Nikuna a nagpaalipin kam tu kadukássan sakay nagin madukás kam ngane. Nadid ay paalipin kam tu katuwiran tánni magin tunay kam a banal.

²⁰ Nikuna a alipin kam palla nu kasalanan, awan moy naisip a gimitán u bagay hide a neayun tu kagustuwan nu Diyos.

²¹ Pero ánya u inábbang moy tu date moy a kákkabiyag a ikasanike moy dán nadid? U hantunan na ay kamatayan.

²² Pero napalaya kamon tu kasalanan sakay alipin kamon nu Diyos. Sakay u natanggap moy ay kabanalan sakay biyag a awan ti kahád.

²³ Dipo u bayad nu kasalanan ay kamatayan, pero u kaluub nu Diyos ay biyag a awan ti kahád tu pamamag-itan ni Cristo-Jesus a Panginoon tam.