Roma 5 - U Maganda A Baheta Ni Jesu-Cristo

U Bunga nu Págpatawad nu Diyos

¹ Kanya nadid ay imbilang kitamon nu Diyos a awan ti kasalanan dipo tu pánnampalataya tam tu Panginoon tam a ti Jesu-Cristo, kanya tehhod kitamon a maganda a rilasyon tu atubang nu Diyos.

² Tu pamamag-itan ni Jesus sakay dipo tu pánnampalataya tam ay mabati tamon u habag na sakay masaya kitamon dipo tu pag-asa tam a makahate kitam tu kadakilaan nu Diyos.

³ Sakay masaya kitam maske ni maranasan tam u hirap hide, dipo matuto kitam a magtiis.

⁴ Dipo u resulta nu págtiis ay maganda a ugale sakay u risulta nu maganda a ugale ay pag-asa a makahate kitam tu kadakilaan nu Diyos.

⁵ Sakay awan kitam mabigu-bigu tu pag-asa tam dipo impabate na nikitam u págmahal na tu pamamag-itan nu Ispirito Santo a inyatád nikitam nu Diyos.

⁶ Nikuna awan kitam ti magimet para makaligtas tu parusa, natay ti Cristo para tu kasalanan tam hide tu panahun a intakda nu Diyos.

⁷ Bihira a mangyare a iyalay nu essa a tolay u biyag na para tu essa a matuwid a tolay. Maare labe a tehhod a magbegsák-isip a máng-atád tu biyag na para tu mabait a tolay.

⁸ Pero impeta nikitam nu Diyos u págmahal na ti konna he a paraan: Maske tu itod nikuna a makasalanan kitam palla, natay ti Cristo para nikitam.

⁹ Sakay nadid ay nebilang kitamon a awan ti kasalanan tu pamamag-itan nu dige ni Cristo, kanya siguradu dán u kaligtasan tam tu parusa nu Diyos dipo ni Cristo.

¹⁰ Tu itod ay kadima kitam nu Diyos, pero nadid ay tinanggap na kitamon a kaibigan na tu pamamag-itan nu kákkatay nu Anak na. Kanya nadid a tehhod kitamon a maganda a relasyon tu Diyos siguradu dán a iligtas na kitam tu pamamag-itan nu biyag ni Cristo.

¹¹ Sakay bakán la sa ina, masaya kitam tu rilasyon tam tu Diyos, dipo tu ginimet nu Panginoon tam a ti Jesu-Cristo. Dipo nikuna ay tinanggap kitam nu Diyos a kaibigan na.

Ti Adan sakay ti Cristo

¹² Nadid, nagkahod ti kasalanan ti munduway dipo tu kassuway ni Adan tu utus nu Diyos. Sakay dipo tu kasalanan na ay nagkahod be ti kamatayan. Kanya matay u atanan a tolay, dipo nagkasala u atanan.

¹³ Bagu a inyatád nu Diyos u Kautusan, ay maggimet dán ti kasalanan u tolay hide pero awan meturing a kasalanan itod ni awan u Kautusan.

¹⁴ Konna pa man hod, ay naghare pade u kamatayan sapul ni Adan hanggan ni Moises, maski ni u kasalanan de ay awan kapareho nu kássuway ni Adan. Ti Adan ay kumán a letrato ni Cristo a inasaan tu itod a dumemát. Dipo pareho hide a te impamana tu katolayan.

¹⁵ Pero u impamana ni Jesu-Cristo sakay tu kasalanan a impamana ni Adan ay dakál u pagkakaiba. Tatahoden a nakapangatád ti kamatayan tu makpal a tolay u kasalanan ni Adan, pero mas higit u kagbi sakay kaluub nu Diyos a dummemát tu makpal a tolay tu pamamagitan nu essa a tolay a ti Jesu-Cristo.

¹⁶ Iba talaga u risulta nu kaluub nu Diyos tu risulta nu kássuway ni Adan. U kássuway ni Adan ay nagresulta ti hatul a kaparusaan, pero u kaluub nu Diyos a dimmemát maske ni makpal a págsuway ay nagrisulta ti págpatawad.

¹⁷ Ta dipo tu kasalanan nu essa a tolay ay naghare u kamatayan. Pero dipo tu ginimet nu essa a tolay a ti Jesu-Cristo, u tolay hide a timmanggap ti kagbi sakay kaluub nu Diyos, ay imbilang na a awan ti kasalanan, sakay maghare hide tu biyag a awan ti kahad.

¹⁸ Kanya dipo tu kasalanan nu essa a tolay, u atanan ay nahatulan tu kaparusaan. Konna man hod, dipo tu matuwid a ginimet nu essa a tolay, u atanan ay mebilang a awan ti kasalanan sakay maatádden ti biyag a awan ti kahád.

¹⁹ Dipo tu kássuway nu essa a tolay makpal a nagin makasalanan. Konna man hod, dipo tu kássunud nu essa a tolay ay makpal a imbilang u Diyos a matuwid.

²⁰ U Kautusan ay inyatád nu Diyos tánni ketan nu tolay a makpal u kasalanan de, sakay nadag-dagen pa dipo tu Kautusan. Pero maski ni nadag-dagen u págsuway ay mas lalo a nadagdagen u habag nu Diyos.

²¹ Kanya ni kodya a naghare u kasalanan tu pamamag-itan nu kamatayan, konna labe hod, maghare u habag nu Diyos sakay tu pángbilang na nikitam a awan ti kasalanan tu pamamag-itan nu Panginoon tam a ti Jesu-Cristo, tánni maranasan tam u biyag a awan ti kahád.