Roma 4 - U Maganda A Baheta Ni Jesu-Cristo

Ginimet a Halimbawa ti Abraham

¹ Nadid, bilang essa a halimbawa ni kodya a inturing nu Diyos a matuwid u tolay, isipan moy ti Abraham a Ama nu Judio hide ti pilas.

² Ni inbilang siya nu Diyos a awan ti kasalanan dipo tu nagimet na hide, nakwa ay tehhod siya a mepagmadakál. Pero awan siya ti mepagmadakál tu Diyos,

³ dipo kinagi na tu Kautusan, “Nanampalataya ti Abraham tu Diyos, sakay dipo hod ay inbilang siya nu Diyos a matuwid.”

⁴ U meatád tu essa a tolay a nagtarabaho ay upa bakán a kaluub.

⁵ Pero inturing kitam nu Diyos a matuwid bakán a tu mágkaganda tam a gimet nan tu pánnampalataya tam tu Diyos a siya u nángturing tu makasalanan a matuwid hide.

⁶ Iye u gusto a kagiyán ni hare a David nikuna a banggitán na u tungkul tu pagigin mapalad, nu tolay hide a inturing nu Diyos a matuwid bakán a tu mágkaganda de a gimet.

⁷ “Kinagi na, Pinagpala u tolay a pinatawad na sakay linimon dán nu Diyos u kasalanan na hide.

⁸ Pinagpala u tolay a imbilang nu Panginoon a awan dán managut tu kasalanan na hide.”

⁹ I kinagiyan iye hide ni hare a David ay bakán la a para tu Judio hide, nan pate labe tu bakán hide a Judio. Tukoy moy iye dipo binanggit mi dán, “Imbilang nu Diyos a matuwid ti Abraham dipo tu pánnampalataya na.”

¹⁰ Nikan beman siya a nebilang a matuwid? Awan beman nikuna a awan palla siya nature?

¹¹ Tinure siya bilang tanda a ibilang dán siya a matuwid dipo tu pánnampalataya na. Kanya ti Abraham ay imbilang a ama nu atanan a manampalataya a awan nature. Sakay dipo ngane tu pánnampalataya de, ay imbilang hide nu Diyos a matuwid.

¹² Sakay siya be u ama nu Judio hide a nature, bakán la ta nature hide tu bággi, nan dipo manampalataya be hide a konna tu ninuno tam a ti Abraham nikuna a awan padla siya nature.

Matanggap u Pananto nu Diyos tu Pamamag-itan nu Pánniwala

¹³ Impananto nu Diyos ni Abraham sakay tu lahe na hide a hide u mangmana ti munduway. U pananto a iye ay inyatád nu Diyos ni Abraham bakán a dipo tu kássunud na tu Kautusan, nan dipo inbilang siya nu Diyos a matuwid tu pamamag-itan nu pánnampalataya na.

¹⁴ Ni u sumássunud la hide tu Kautusan u magin tagapagmana, awan ti kabuluhan u pánnampalataya sakay u pananto nu Diyos.

¹⁵ U Kautusan u dahilan ni bakin tehhod a parusa a gábwat tu Diyos. Dipo ni awan ti Kautusan ay awan be ti págsuway.

¹⁶ Kanya u pananto nu Diyos ay nakabase tu pánnampalataya, tánni iye ay magin págpapala sakay talaga a matanggap nu atanan a lahe ni Abraham, bakán la tu Judio hide a timmanggap tu Kautusan, nan maske tu bakán hide a Judio a mánnampalataya a konna ni Abraham dipo siya u ama tam a atanan.

¹⁷ Konna he u kinagi na tu Kasulatan, “Ginimet taka a ama nu makpal a bansa.” Iye a pananto ay tehhod a bisa tu atubang nu Diyos a panaligan na, u Diyos a nangbiyag tu patay hide sakay manglalang tu atanan a bagay a awan palla.

¹⁸ Maske ni awan dán ti pag-asa ti Abraham a magkahod ti anak, nanampalataya pade siya a tupadán nu Diyos u pananto na a magin ama siya nu makpal a bansa. Ayun tu kinagi nikuna nu Diyos, “Konna ti kakpal tu biton ti langet u magin lahe mo.”

¹⁹ Awan siya nanghina tu pánnampalataya na maski ni magdatos dán u idad na, sakay mahina dán u babággi na, sakay tukoy na be a baug ti Sara awan dán maare a magenak. Konna man hod, ay awan nanghina u pánnampalataya na.

²⁰ Awan siya nagduwwa-duwwa tu pananto nu Diyos, nan mas lalo pa siya a tinumibay tu pánnampalataya na sakay nagpure tu Diyos.

²¹ Dipo nanalig siya ti husto a tupadán nu Diyos u pananto na.

²² Kanya imbilang nu Diyos a matuwid ti Abraham dipo tu pánnampalataya na.

²³ Pero u upos a, “Inturing a matuwid,” ay bakán la a para ni Abraham,

²⁴ nan para be nikitam. Nebilang kitam a awan ti kasalanan dipo tu pánnampalataya tam tu Diyos a nangbiyag a huway tu Panginoon tam a ti Jesus.

²⁵ Impabuno de ti Jesus, dipo tu kasalanan tam hide, sakay biniyag a huway tánni mebilang kitam a awan ti kasalanan.