Roma 3 - U Maganda A Baheta Ni Jesu-Cristo

¹ Nadid, kodya a mas higit u Judio hide tu bakán hide a Judio? Ánya u kahalagaan nu pagigin ture de?

² Tahod a mas higit u Judio hide tu makpal a bagay: Dipalongo tu atanan, hide u nángkatiwalaan nu Diyos tu upos na.

³ Maski ni awan maniwala u sangan nide tu pananto nu Diyos, u gusto na beman a kagiyán ay awan dán tapat u Diyos tu págtupad na tu pananto na hide?

⁴ Awan, dipo tapat u Diyos tu upos na, maske mabule u atanan a tolay. Konna ngane tu kinagi na tu Kautusan, “Talaga a mapatunayan a tapat ka tu upos mo Panginoon Diyos. Sakay ni kagiyán nu tolay ate pagkakamale ka mapatunayan a awan ka ti págkakamale.”

⁵ Nadid, te agum a tolay a magkagi a masmaganda kan a maggimet kitam ti madukás, para ketan kan nu tolay hide a tama u gimet nu Diyos. Kaya kákkagiyán de a awan na kitam kan dapat a parusaan tu kasalanan tam.

⁶ Bakán a konna hod! Male itod! Dipo ni awan makatarungan u Diyos kodya na hatulan u tolay hide ti munduway.

⁷ Sakay te magkagi pa ti konna he, “Ni tu págbule-bule ko ay ketan u kadakilaan nu Diyos a awan siya magbule-bule, bakin a parusaanák na bilang essa a makasalanan?”

⁸ Ni konna hod u katuwiran mo, ay kumán mo a kinagi a maggimet kitam ti madukás para lumuwas u maganda. Sakay ayun tu tolay hide a mangsássida nikame, konna kan hod u itáttoldu me. I tolayan ina hide ay dapat la a parusaan nu Diyos.

Awan ti Matuwid

⁹ Ánya nadid u makagi tam? Hikitam beman a Judio ay mas higit tu bakán hide a Judio? Awan! impaliwanag ko dán, a atanan a tolay ay makasalanan, Judio man oni bakán a Judio.

¹⁰ A konna tu kinagi na tu Kautusan, “Awan ti malinis tu pangileng nu Diyos maskin essa.

¹¹ Awan ti makaintendi tungkul tu Diyos, awan ti nagsikap para matenggi siya.

¹² U atanan ay immadág tu Diyos sakay nagin awan ti pagseserbiyan. Awan ti naggimet ti maganda, awan maski ni essa.”

¹³ “U pággupos de ay kumán a u lábbáng a mabuyok, dipo palagi hide a mágga-upusán ti kakabuliyan. U upos a lumuwas tu labi de ay kumán a kaget nu makamandag a ulag dipo mangsida tu kapatkákka de.”

¹⁴ Sakay u lumuwas tu labi de ay puro a págseste sakay mágkasaket a upos.

¹⁵ Tu badit la a dahilan ay agad dán hide a mamuno ti tolay.

¹⁶ Maske ni hádya u angayan de ay kapahamakan sakay kalungkutan u ipabate de.

¹⁷ Awan de tukoy a mabiyag ti mapayapa,

¹⁸ sakay awan hide ti ánteng tu Diyos.

¹⁹ Nadid, tukoy tamon a atanan a kinagi tu Kautusan ay para nikitam a Judio hide a sakup nu Kautusan, tánni awan ti me dahilan u ti deyaman a awan siya dapat maparusaan. U atanan a tolay ti munduway ay managut tu Diyos.

²⁰ Dipo awan ni ti deyaman u ibilang nu Diyos a awan ti kasalanan tu pamamag-itan nu kássunud tu Kautusan. Nan u Kautusan u mángpeta tu kasalanan nu tolay.

Inbilang nu Diyos a Awan ti Kasalanan u Tolay

²¹ Pero nadid ay inhayag dán nu Diyos ni kodya na a inbilang a awan ti kasalanan u tolay. Iye ay bakán a tu kássunud tu Kautusan. Mismo u Kautusan sakay u insulat nu prupeta hide u mangpatunay ti iye.

²² U tolay ay inturing nu Diyos a awan ti kasalanan tu pamamag-itan nu pánnampalataya de ni Jesu-Cristo, sakay awan ti kampiyan u Diyos. Kaya u tideyaman a sumampalataya ni Jesu-Cristo ay ibilang a matuwid.

²³ Dipo u atanan ay nagkasala sakay awan hide nagin karapat-dapat tu pangileng nu Diyos.

²⁴ Pero dipo tu kagbi na nikitam, imbilang na kitam a awan ti kasalanan tu pamamag-itan ni Cristo Jesus a nangtubus nikitam. Iye ay rigalo nu Diyos.

²⁵ Ti Jesu-Cristo u pinaangay he nu Diyos ti munduwáy tánni iyalay na u biyag na, para maibut u iyamut nu Diyos nikitam, sakay tu pamamag-itan nu dige na ay napatawad dán u kasalanan tam ni sumampalataya kitam nikuna. Ginimet iye nu Diyos tánni ipeta na a siya ay matuwid, dipo tu purumero ay nagpasensiya siya sakay pinalipas na la u kasalanan a nagimet nu tolay hide a nakwa pinarusaan na dán hide.

²⁶ Pero nadid pinaangay na he ti Cristo tánni ipeta na a matuwid siya. Dipo ti iye a ginimet na, pinatunayan na a tama siya tu pangturing na a matuwid u sumampalataya hide ni Jesus.

²⁷ Kaya awan kitam ti ipagmadakál, dipo u pángturing nikitam a matuwid ay bakán a tu kássunud tam tu Kautusan, nan tu pánnampalataya tam ni Jesus.

²⁸ Dipo maniwala kitam a ituring nu Diyos a matuwid u tolay tu pamamag-itan nu kássampalataya na ni Cristo, bakán a tu kássunud tu Kautusan.

²⁹ U Diyos ay bakán la a Diyos nu Judio hide, nan Diyos labe siya nu bakán hide a Judio, dipo Diyos siya nu atanan.

³⁰ Eessa la u Diyos para tu Judio hide sakay tu bakán a Judio, sakay pareho hide a ituring nu Diyos a awan ti kasalanan dipo tu pánnampalataya de ni Cristo.

³¹ U gusto na beman a kagiyán ay bali-awanán mi dán u Kautusan? Awan! Dipo u tatahoden ay mas lalo mi pa a tinupad u layunin nu Kautusan.